ചൂരൽമലയിൽ പ്രത്യേക മെഡിക്കൽ, റേഷൻ സൗകര്യങ്ങൾ ഉറപ്പാക്കുമെന്ന് മന്ത്രി ടി സിദ്ദീഖ്
വയനാട് കള്ളാടി മണ്ണിടിച്ചിൽ പ്രദേശത്ത് കനത്ത മഴയെത്തുടർന്ന് മണ്ണ് നീക്കുന്നത് പ്രതിസന്ധിയിൽ. നിർമാണ കമ്പനിക്കെതിരെ അന്വേഷണം പ്രഖ്യാപിച്ച് മന്ത്രി പി.കെ ബഷീർ. ചൂരൽമല നിവാസികൾക്ക് പ്രത്യേക മെഡിക്കൽ റേഷൻ സൗകര്യങ്ങൾ ലഭ്യമാക്കുമെന്ന് മന്ത്രി ടി സിദ്ദീഖ്.
അനില എം കൃഷ്ണൻ 
കള്ളാടി മണ്ണിടിച്ചിൽ: മണ്ണ് മാറ്റുന്നത് പ്രതിസന്ധിയിലെന്ന് മന്ത്രി പി.കെ ബഷീർ; ചൂരൽമലക്കാർക്ക് പ്രത്യേക മെഡിക്കൽ-റേഷൻ സൗകര്യങ്ങളെന്ന് മന്ത്രി ടി. സിദ്ദീഖ്
കൽപ്പറ്റ: കള്ളാടിയിലുണ്ടായ മണ്ണിടിച്ചിൽ മേഖലയിൽ കനത്ത മഴ തുടരുന്നതിനാൽ മണ്ണ് നീക്കം ചെയ്യുന്നതിനുള്ള രക്ഷാപ്രവർത്തനങ്ങൾ കടുത്ത പ്രതിസന്ധിയിലെന്ന് പൊതുമരാമത്ത് വകുപ്പ് മന്ത്രി പി.കെ ബഷീർ. അപകടസ്ഥലം സന്ദർശിച്ച് സ്ഥിതിഗതികൾ വിലയിരുത്തിയ ശേഷം സംസാരിക്കുകയായിരുന്നു അദ്ദേഹം. നിലവിലെ സാഹചര്യത്തിൽ മണ്ണ് മാറ്റിയാൽ കൂടുതൽ അപകടങ്ങൾക്ക് സാധ്യതയുണ്ടെന്നാണ് വിലയിരുത്തൽ. അതിനാൽ അതീവ സുരക്ഷിതമായ നടപടികളാണ് ഇപ്പോൾ സ്വീകരിച്ചു വരുന്നത്.
നിർമാണ സ്ഥലത്ത് കൂട്ടിയിട്ടിരിക്കുന്ന മണ്ണ് നീക്കം ചെയ്യാൻ ബന്ധപ്പെട്ട കമ്പനിക്ക് പലതവണ മുന്നറിയിപ്പ് നൽകിയിരുന്നതായി മന്ത്രി വ്യക്തമാക്കി. ജൂലൈ ഒന്നിനും കമ്പനി അധികൃതരോട് മണ്ണ് നീക്കാൻ ആവശ്യപ്പെട്ടിരുന്നെങ്കിലും പ്രശ്നമില്ലെന്ന നിലപാടാണ് അവർ സ്വീകരിച്ചത്. അപകടത്തെക്കുറിച്ച് സമഗ്രമായ അന്വേഷണം നടത്തി കർശന തുടർനടപടികൾ സ്വീകരിക്കും. നിർമാണ പ്രവൃത്തികൾക്ക് കമ്പനിക്ക് ലഭിച്ച അനുമതി ഉൾപ്പെടെയുള്ള കാര്യങ്ങൾ പരിശോധിക്കുമെന്നും മന്ത്രി കൂട്ടിച്ചേർത്തു.
ഇതോടൊപ്പം ബൈരക്കുപ്പ പാലത്തിന്റെ നിർമാണം സംബന്ധിച്ച് കേന്ദ്ര സർക്കാരുമായി ചർച്ച നടത്തിയിട്ടുണ്ടെന്നും നിർമാണത്തിന് ഫണ്ട് അനുവദിക്കാമെന്ന് കേന്ദ്രം അറിയിച്ചതായും മന്ത്രി പറഞ്ഞു. വരും നവംബറോടെ പാലത്തിന്റെ തറക്കല്ലിടൽ കർമം നിർവഹിക്കും. പൂഴിത്തോട് - പടിഞ്ഞാറത്തറ ബദൽ പാതയുടെ സർവേ ഇതുവരെ പൂർത്തിയായിട്ടില്ലെന്നും, ഇത് വേഗത്തിലാക്കാൻ വിവിധ വകുപ്പുകളുടെ യോഗം ഉടൻ വിളിച്ചുചേർക്കുമെന്നും മന്ത്രി പി.കെ ബഷീർ അറിയിച്ചു.
ചൂരൽമലക്കാർക്ക് യാത്രാ തടസ്സമുണ്ടാകില്ല: മന്ത്രി ടി. സിദ്ദീഖ്
കള്ളാടി മണ്ണിടിച്ചിലിനെ തുടർന്ന് ചൂരൽമല പ്രദേശത്തുകാർക്ക് യാത്രാ പ്രശ്നങ്ങൾ ഉണ്ടാകാതിരിക്കാൻ ആവശ്യമായ നടപടികൾ സ്വീകരിക്കുമെന്ന് കൃഷി വകുപ്പ് മന്ത്രി ടി. സിദ്ദീഖ് പറഞ്ഞു. അപകടസ്ഥലത്തെ രക്ഷാപ്രവർത്തനങ്ങൾ നിരീക്ഷിച്ച ശേഷം സംസാരിക്കുകയായിരുന്നു അദ്ദേഹം.
ചൂരൽമല നിവാസികൾക്കായി ഡോക്ടർ, നഴ്സ്, മരുന്നുകൾ എന്നിവ ഉൾപ്പെടെയുള്ള മെഡിക്കൽ സൗകര്യങ്ങൾ യുദ്ധകാലാടിസ്ഥാനത്തിൽ ഉറപ്പാക്കും. മഴ തുടരുകയാണെങ്കിൽ പ്രദേശത്തുകാർക്ക് പ്രത്യേക റേഷൻ അനുവദിക്കാനുള്ള ക്രമീകരണങ്ങൾ ചെയ്യും. ഇതിനായി പ്രദേശത്ത് താമസിക്കുന്നവരുടെ കൃത്യമായ പട്ടിക തയാറാക്കാൻ ജില്ലാ കളക്ടർക്ക് നിർദേശം നൽകിയിട്ടുണ്ട്. അപകട സ്ഥലത്തുനിന്ന് നീക്കം ചെയ്യുന്ന മണ്ണ് റോഡരികിൽ നിക്ഷേപിച്ചതിലുള്ള ബുദ്ധിമുട്ടുകൾ ഉടൻ പരിഹരിക്കുമെന്നും മന്ത്രി ടി. സിദ്ദീഖ് വ്യക്തമാക്കി.
