എൽഡിഎഫ് 90 സീറ്റിലധികം നേടി അധികാരം നിലനിർത്തും എം.വി. ഗോവിന്ദൻ
കേരളത്തിൽ ഇത്തവണയും എൽഡിഎഫ് അധികാരത്തിലെത്തുമെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദൻ. യുഡിഎഫിന്റെ അവകാശവാദങ്ങൾ തള്ളിയ അദ്ദേഹം വോട്ടിങ് കണക്കുകളിലെ യാഥാർത്ഥ്യം വിശദീകരിച്ചു
അനില എം കൃഷ്ണൻ 
എൽഡിഎഫ് 90 സീറ്റിലധികം നേടി ഭരണം തുടരും; വോട്ട് വർധനയെന്ന യുഡിഎഫ് പ്രചാരണം അടിസ്ഥാനരഹിതം: എം.വി. ഗോവിന്ദൻ
തിരുവനന്തപുരം: കേരളത്തിൽ ഇത്തവണയും എൽഡിഎഫ് 90-ലധികം സീറ്റുകൾ നേടി അധികാരം നിലനിർത്തുമെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദൻ. കഴിഞ്ഞ രണ്ട് നിയമസഭാ തിരഞ്ഞെടുപ്പുകളിലും 90-ലധികം സീറ്റുകൾ നേടിയാണ് എൽഡിഎഫ് അധികാരത്തിലെത്തിയത്. ഇത്തവണയും ജനങ്ങൾ ആ വലിയ അംഗീകാരം നൽകുമെന്നും തിരഞ്ഞെടുപ്പ് വിശകലനത്തിന് ശേഷം നടത്തിയ വാർത്താസമ്മേളനത്തിൽ അദ്ദേഹം വ്യക്തമാക്കി.
സർക്കാരിനെതിരെ ഭരണവിരുദ്ധ വികാരമില്ലെന്നും ഭരണത്തുടർച്ച വേണമെന്ന ആഗ്രഹം ജനങ്ങൾക്കിടയിൽ ശക്തമാണെന്നും അദ്ദേഹം പറഞ്ഞു. നൂറിലധികം സീറ്റുകൾ നേടുമെന്ന യുഡിഎഫിന്റെ അവകാശവാദം വെറും പൊള്ളയാണെന്നും അദ്ദേഹം കൂട്ടിച്ചേർത്തു.
വോട്ടിങ് ശതമാനത്തിലെ അവകാശവാദം തള്ളി
വോട്ടിങ് ശതമാനം വർധിച്ചത് ഭരണവിരുദ്ധ വികാരത്തിന്റെ തെളിവാണെന്ന യുഡിഎഫ് പ്രചാരണത്തിന് യാതൊരു വസ്തുതയുമില്ലെന്ന് എം.വി. ഗോവിന്ദൻ പറഞ്ഞു. വോട്ടർ പട്ടികയിലെ ക്രമീകരണങ്ങൾക്ക് ശേഷം (SIR) വോട്ടർമാരുടെ എണ്ണത്തിൽ മാറ്റം വന്നിട്ടുണ്ട്. 2021-നെ അപേക്ഷിച്ച് 71 മണ്ഡലങ്ങളിൽ ഇത്തവണ വോട്ട് ശതമാനം കുറവാണ്. അസാധാരണമായ വോട്ട് വർധന ഉണ്ടായി എന്ന പ്രചാരണം അടിസ്ഥാനരഹിതമാണെന്നും അദ്ദേഹം ചൂണ്ടിക്കാട്ടി.
സതീശന് മറുപടി, ബിജെപിക്ക് അക്കൗണ്ടില്ല
തിരഞ്ഞെടുപ്പ് ജയിച്ചില്ലെങ്കിൽ വനവാസത്തിന് പോകുമെന്ന് പറഞ്ഞ വി.ഡി. സതീശനെയും അദ്ദേഹം പരിഹസിച്ചു. സതീശൻ വനവാസത്തിന് പോകേണ്ട കാര്യമില്ലെന്നും രാഷ്ട്രീയ പ്രവർത്തനത്തിൽ പരാജയങ്ങൾ സ്വാഭാവികമാണെന്നും അദ്ദേഹം പറഞ്ഞു. ബിജെപി ഇത്തവണയും കേരളത്തിൽ അക്കൗണ്ട് തുറക്കില്ലെന്ന് ഗോവിന്ദൻ ആവർത്തിച്ചു.
തിരഞ്ഞെടുപ്പ് കമ്മീഷന്റെ വീഴ്ചകളെയും അദ്ദേഹം രൂക്ഷമായി വിമർശിച്ചു. തിരഞ്ഞെടുപ്പ് ഡ്യൂട്ടിയിലുണ്ടായിരുന്ന 20,000-ത്തോളം പേർക്ക് വോട്ട് ചെയ്യാൻ സാധിച്ചില്ലെന്നും ഉത്തരവാദിത്തമുള്ള ഏജൻസി എന്ന നിലയിൽ കമ്മീഷന് വലിയ വീഴ്ച സംഭവിച്ചെന്നും അദ്ദേഹം കുറ്റപ്പെടുത്തി.
