മൂവാറ്റുപുഴ ജനറൽ ആശുപത്രിയിൽ വയോധികയുടെ മാല പൊട്ടിക്കാൻ ശ്രമിച്ച തമിഴ്നാട് സ്വദേശിനി അറസ്റ്റിൽ

മൂവാറ്റുപുഴയിൽ വയോധികയുടെ മാല പൊട്ടിക്കാൻ ശ്രമം; തമിഴ്‌നാട് സ്വദേശിനി പോലീസ് പിടിയിൽ

​മൂവാറ്റുപുഴ: ജനറൽ ആശുപത്രിയിൽ ഡോക്ടറെ കാണാനെത്തിയ വയോധികയുടെ സ്വർണ്ണമാല കവർന്നുപരിക്കാൻ ശ്രമിച്ച തമിഴ്‌നാട് സ്വദേശിനിയെ പോലീസ് അറസ്റ്റ് ചെയ്തു. മധുര സ്വദേശിനി സെൽവി (46) യെയാണ് മൂവാറ്റുപുഴ പോലീസ് പിടികൂടിയത്. മുളവൂർ സ്വദേശിയായ വയോധികയുടെ മൂന്നര പവൻ തൂക്കം വരുന്ന സ്വർണ്ണ മാലയാണ് പ്രതി പൊട്ടിച്ചെടുക്കാൻ ശ്രമിച്ചത്.

​ബുധനാഴ്ച മൂവാറ്റുപുഴ ജനറൽ ആശുപത്രിയിലായിരുന്നു സംഭവം. തിരക്കിനിടയിൽ വയോധികയുടെ മാല പൊട്ടിക്കാൻ ശ്രമിച്ചതോടെ ഇവർ ബഹളം വെക്കുകയായിരുന്നു. തുടർന്ന് ആശുപത്രിയിലുണ്ടായിരുന്ന രോഗികളും ജീവനക്കാരും ചേർന്ന് പ്രതിയെ തടഞ്ഞുവെക്കുകയും പോലീസിൽ വിവരമറിയിക്കുകയുമായിരുന്നു. ഉടൻ തന്നെ സ്ഥലത്തെത്തിയ പോലീസ് സംഘം പ്രതിയെ കസ്റ്റഡിയിലെടുത്തു.

​അറസ്റ്റിലായ സെൽവിക്ക് സംസ്ഥാനത്തിനകത്തും പുറത്തുമായി സമാന രീതിയിലുള്ള നിരവധി മോഷണക്കേസുകൾ നിലവിലുണ്ടെന്ന് പോലീസ് പറഞ്ഞു. മൂവാറ്റുപുഴ പോലീസ് ഇൻസ്പെക്ടർ അനിൽ ജോർജ്ജിൻ്റെ നേതൃത്വത്തിലുള്ള അന്വേഷണ സംഘത്തിൽ എസ്.ഐമാരായ സി.ആർ രഞ്ജുമോൾ, കെ.എസ് ജയൻ, ജി. അനൂപ്, പി.സി ജയകുമാർ, സീനിയർ സിവിൽ പോലീസ് ഓഫീസർമാരായ ഷിജു രാജപ്പൻ, കെ.വി ഗിരീഷ് കുമാർ, പ്രതിഷ, എം.എ മജീഷ എന്നിവരും ഉണ്ടായിരുന്നു.

​പ്രതി സമാനമായ മറ്റ് കുറ്റകൃത്യങ്ങളിൽ ഉൾപ്പെട്ടിട്ടുണ്ടോ എന്ന് പോലീസ് അന്വേഷിച്ചു വരികയാണ്. പ്രതിയെ കോടതിയിൽ ഹാജരാക്കും.