മാക്ട ഓക്സിജൻ സിനിമാ അവാർഡുകൾ പ്രഖ്യാപിച്ചു; സിനിമകൾക്ക് ജൂൺ 20 മുതൽ അപേക്ഷിക്കാം
മലയാള ചലച്ചിത്ര സാങ്കേതിക പ്രവർത്തകരുടെ കൂട്ടായ്മയായ മാക്ട യും പ്രമുഖ ബ്രാൻഡായ ഓക്സിജൻ ഗ്രൂപ്പും ചേർന്ന് ഈ വർഷത്തെ സിനിമാ അവാർഡുകൾ പ്രഖ്യാപിച്ചു. വിശദവിവരങ്ങൾ വായിക്കാം
A S Dinesh 
മലയാള സിനിമയ്ക്ക് പുത്തൻ ആവേശം: 'മാക്ട - ഓക്സിജൻ സിനിമാ അവാർഡുകൾ' പ്രഖ്യാപിച്ചു
കൊച്ചി: മലയാള ചലച്ചിത്ര സാങ്കേതിക പ്രവർത്തകരുടെ ആദ്യത്തെ സംഘടനയും പ്രമുഖ കൂട്ടായ്മയുമായ 'മാക്ട' (Malayalam Cine Technician's Association), പ്രമുഖ ഇലക്ട്രോണിക്സ് - ഗൃഹോപകരണ വ്യാപാര ശൃംഖലയായ 'ഓക്സിജൻ ഗ്രൂപ്പുമായി' സഹകരിച്ച് ഈ വർഷത്തെ സിനിമാ അവാർഡുകൾ പ്രഖ്യാപിച്ചു. 'മാക്ട - ഓക്സിജൻ സിനിമാ അവാർഡ്' എന്ന പേരിലായിരിക്കും ഈ വർഷത്തെ പുരസ്കാരങ്ങൾ അറിയപ്പെടുക.
മുഖ്യധാരാ-മധ്യവർത്തി-സമാന്തര സിനിമകളിലെ പ്രശസ്ത കലാകാരന്മാരെ ഒരു കുടക്കീഴിൽ അണിനിരത്തിക്കൊണ്ട് 1994-ൽ സ്ഥാപിതമായ സംഘടനയാണ് മാക്ട. മൂന്ന് പതിറ്റാണ്ടിലേറെയായുള്ള തങ്ങളുടെ പ്രവർത്തന പാരമ്പര്യത്തിലെ എക്കാലത്തെയും വലിയ സ്വപ്നങ്ങളിൽ ഒന്നാണ് ഈ അവാർഡിലൂടെ യാഥാർത്ഥ്യമാകുന്നതെന്ന് മാക്ട ഭാരവാഹികൾ വാർത്താസമ്മേളനത്തിൽ അറിയിച്ചു. മികച്ച സിനിമകളെയും സിനിമാ പ്രവർത്തകരെയും ആദരിക്കുന്നതിലൂടെ കൂടുതൽ നല്ല സിനിമകൾ ഉണ്ടാവുന്നതിനും, ഗുണപരമായ ചലച്ചിത്രാസ്വാദന സംസ്കാരത്തിന് ഇത് വഴിവെക്കുമെന്നും അവർ പ്രത്യാശ പ്രകടിപ്പിച്ചു. ഓക്സിജൻ ഗ്രൂപ്പ് സി.ഇ.ഓ. ശ്രീ. ഷിജോ കെ. തോമസും വാർത്താസമ്മേളനത്തിൽ പങ്കെടുത്തു.
അവാർഡ് വിവരങ്ങളും യോഗ്യതയും
മികച്ച സിനിമയുടെ നിർമ്മാതാവ്, സംവിധായകൻ എന്നിവർക്ക് പുറമെ അഭിനേതാക്കൾ, ഗായകർ, മറ്റ് പ്രധാന സാങ്കേതിക പ്രവർത്തകർ എന്നിവർക്കായി വിവിധ വിഭാഗങ്ങളിലാണ് പുരസ്കാരങ്ങൾ നൽകുന്നത്. ക്യാഷ് അവാർഡും ശിൽപ്പവും പ്രശസ്തിപത്രവും അടങ്ങുന്നതാണ് പുരസ്കാരം.
ആർക്കൊക്കെ അപേക്ഷിക്കാം?: 2025 ജനുവരി 1 മുതൽ ഡിസംബർ 31 വരെ സെൻസർ ചെയ്യപ്പെട്ട മലയാള സിനിമകളായിരിക്കും അവാർഡിന് പരിഗണിക്കുക. തീയേറ്ററുകളിൽ റിലീസ് ചെയ്യാത്ത ചിത്രങ്ങൾക്കും അപേക്ഷിക്കാവുന്നതാണ്.
ഫോമുകൾ ലഭ്യമാകുന്ന തീയതി: അവാർഡിനുള്ള നിർദ്ദിഷ്ട ഫോറവും നിബന്ധനകളും മറ്റ് വിശദവിവരങ്ങളും ജൂൺ 20 മുതൽ മാക്ട ഓഫീസിൽ നിന്നും ഔദ്യോഗിക വെബ്സൈറ്റിൽ നിന്നും ലഭ്യമാകും.
തിരക്കഥാ മത്സര പുരസ്കാര വിതരണം ജൂൺ 27-ന്
പുതിയ എഴുത്തുകാരെ പ്രോത്സാഹിപ്പിക്കുന്നതിനായി മാക്ട സംഘടിപ്പിച്ച തിരക്കഥാ മത്സരത്തിലെ വിജയികൾക്കുള്ള പുരസ്കാരങ്ങൾ ജൂൺ 27-ന് എറണാകുളത്ത് നടക്കുന്ന മാക്ടയുടെ വാർഷിക പൊതുയോഗത്തിൽ വച്ച് വിതരണം ചെയ്യും. മത്സരത്തിന് പുതിയ എഴുത്തുകാരിൽ നിന്നും മികച്ച പ്രതികരണമാണ് ലഭിച്ചതെന്ന് ഭാരവാഹികൾ വ്യക്തമാക്കി.
പ്രശസ്ത സംവിധായകനും തിരക്കഥാ മത്സരത്തിന്റെ ജൂറി ചെയർമാനുമായ ഭദ്രൻ, പ്രമുഖ നിർമ്മാതാക്കൾ, ചലച്ചിത്ര സാങ്കേതിക പ്രവർത്തകർ എന്നിവരുടെ സാന്നിധ്യത്തിലായിരിക്കും പുരസ്കാരങ്ങൾ വിതരണം ചെയ്യുകയെന്നും മാക്ട നേതൃത്വം അറിയിച്ചു.
