അന്താരാഷ്ട്ര നിയമവേദിയിൽ നുവാൽസിന് തിളക്കം; യുഎസിലെ ജെസ്സപ് മൂട്ട് മത്സരത്തിൽ ചരിത്രനേട്ടം
അമേരിക്കയില് നടന്ന ലോകപ്രശസ്തമായ ഫിലിപ്പ് സി ജെസ്സപ്പ് അന്താരാഷ്ട്ര നിയമ മൂട്ട് കോർട്ട് മത്സരത്തില് റിച്ചാര്ഡ് ആര് ബാക്സ്റ്റര് അവാര്ഡ് കരസ്ഥമാക്കി കൊച്ചി നുവാല്സിലെ വിദ്യാര്ത്ഥികള്.
അനില എം കൃഷ്ണൻ 
അന്താരാഷ്ട്ര നേട്ടവുമായി നുവാല്സ് വിദ്യാര്ഥികള്; യുഎസിലെ ജെസ്സപ് മൂട്ട് മത്സരത്തില് ചരിത്ര ജയം
കൊച്ചി: ലോകത്തിലെ ഏറ്റവും വലിയ അന്താരാഷ്ട്ര നിയമ മൂട്ട് കോർട്ട് മത്സരമായ ഫിലിപ്പ് സി. ജെസ്സപ്പിൽ (Philip C. Jessup International Law Moot Court Competition) മികച്ച നേട്ടം കൈവരിച്ച് കൊച്ചി നുവാൽസിലെ (NUALS) വിദ്യാർത്ഥികൾ. അന്താരാഷ്ട്ര തലത്തിലെ മികച്ച 'അപ്ലിക്കന്റ് മെമോറിയൽ' വിഭാഗത്തിനുള്ള പ്രശസ്തമായ റിച്ചാര്ഡ് ആര്. ബാക്സ്റ്റര് അവാര്ഡാണ് നുവാല്സ് ടീം കരസ്ഥമാക്കിയത്.
അവസാനവര്ഷ വിദ്യാര്ഥികളായ അനശ്രുത റോയ്, ദിവ്യ ഉപാധ്യായ്, നിയതി പ്രഭു, ശ്രുതി സൂസന് മാത്യൂ, നാലാം വര്ഷ വിദ്യാര്ഥിയായ ഉസ്തത് കൗര് സേതി എന്നിവരടങ്ങുന്ന സംഘമാണ് ഈ നേട്ടം കൈവരിച്ചത്.
വാഷിങ്ടണ് ഡിസിയിലെ ക്യാപിറ്റോള് ഹില് ഹയാത് റീജന്സിയില് മാര്ച്ച് 28 മുതല് ഏപ്രില് 4 വരെയായിരുന്നു മത്സരം നടന്നത്. വാദിഭാഗത്തിനായി തയ്യാറാക്കുന്ന നിയമ വാദഗതികളുടെ (Memorials) മികവ് പരിഗണിച്ചാണ് ഈ പുരസ്കാരം നൽകുന്നത്. 99 രാജ്യങ്ങളില് നിന്നായി 806 ടീമുകളാണ് ഇത്തവണ മത്സരത്തിൽ പങ്കെടുത്തത്. വിദ്യാർത്ഥികളുടെ ആഴത്തിലുള്ള നിയമ ഗവേഷണ ശേഷിയും വിശകലന പാടവവും അടിവരയിടുന്നതാണ് ഈ അന്താരാഷ്ട്ര അംഗീകാരം.
ഐക്യരാഷ്ട്രസഭയുടെ അന്താരാഷ്ട്ര നീതിന്യായ കോടതിയുടെ (ICJ) മാതൃകയിൽ നടക്കുന്ന ഈ മത്സരത്തിൽ, ലോകമെമ്പാടുമുള്ള നിയമ വിദ്യാർത്ഥികൾ സാങ്കൽപ്പിക കേസുകളിൽ വാദി-പ്രതി ഭാഗങ്ങളെ പ്രതിനിധീകരിച്ച് വാദമുഖങ്ങൾ നിരത്തുന്നു. നിയമവിദ്യാർത്ഥികളിൽ അഭിഭാഷക വൈദഗ്ധ്യം വളർത്തുന്നതിനായി സംഘടിപ്പിക്കപ്പെടുന്ന ലോകത്തിലെ തന്നെ ഏറ്റവും പഴക്കമുള്ള വേദിയാണിത്.
