പൊലീസുകാരന്റെ ബൈക്ക് കത്തിച്ച കേസിൽ യുവതികൾ അറസ്റ്റിൽ പിന്നാലെ നാടകീയ രംഗങ്ങൾ

പുനലൂർ: സിവിൽ പൊലീസ് ഓഫീസറുടെ വീടിന്റെ കാർ പോർച്ചിൽ സൂക്ഷിച്ചിരുന്ന ബൈക്ക് രാത്രിയിൽ തീവെച്ച് നശിപ്പിച്ച കേസിൽ രണ്ട് യുവതികളെ പൊലീസ് അറസ്റ്റ് ചെയ്തു. ശൂരനാട് സ്വദേശി ആരതി, ഇടുക്കി സ്വദേശി ഗായത്രി എന്നിവരാണ് പൊലീസിന്റെ പിടിയിലായത്. അതിനിടെ, പൊലീസ് കസ്റ്റഡിയിലായ പ്രതികളിലൊരാളായ ആരതിയെ വിഷം ഉള്ളിൽച്ചെന്ന നിലയിൽ പാരിപ്പള്ളി ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

​ആർച്ചൽ പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ ഊർജിതമായ അന്വേഷണത്തിനൊടുവിലാണ് യുവതികളെ പൊലീസ് സംഘം വലയിലാക്കിയത്. ആറന്മുള പൊലീസ് സ്റ്റേഷനിലെ സി.പി.ഒ ആയ വി.എസ്. വിവേകും പ്രതിയായ ആരതിയും തമ്മിലുള്ള വ്യക്തിപരമായ തർക്കങ്ങളാണ് ബൈക്ക് കത്തിക്കുന്നതിലേക്ക് നയിച്ചതെന്ന് പൊലീസ് പറഞ്ഞു. കഴിഞ്ഞ ശനിയാഴ്ച അർധരാത്രിയോടെയായിരുന്നു സംഭവം. കാർ പോർച്ചിൽ നിന്നും തീയും പുകയും ഉയരുന്നത് കണ്ട് വിവേകും മാതാപിതാക്കളും ഓടിയെത്തിയപ്പോഴേക്കും ബൈക്ക് പൂർണ്ണമായും കത്തി നശിച്ചിരുന്നു.

​അന്വേഷണം വഴിതെറ്റിക്കാൻ രാഷ്ട്രീയ നാടകം

​സംഭവസ്ഥലത്തിന് സമീപത്തുനിന്നും പൊലീസിന് ഒരു ഭീഷണിക്കത്ത് ലഭിച്ചിരുന്നു. മൂന്ന് വർഷം മുൻപ് പുനലൂർ കോളജിൽ വച്ച് വിവേക് ഉൾപ്പെടുന്ന പൊലീസ് സംഘം ഒരു പ്രമുഖ വിദ്യാർഥി സംഘടനയുടെ പ്രവർത്തകരെ മർദ്ദിച്ചതിലുള്ള പ്രതികാരമായാണ് ബൈക്ക് കത്തിച്ചതെന്നാണ് കത്തിൽ എഴുതിയിരുന്നത്. എന്നാൽ, ഇത് പൊലീസിന്റെ അന്വേഷണ ദിശ മാറ്റാനുള്ള മനഃപൂർവ്വമായ ശ്രമമാണെന്ന് ആദ്യഘട്ടത്തിൽ തന്നെ അന്വേഷണസംഘത്തിന് വ്യക്തമായിരുന്നു.

​പ്രതികൾക്ക് ബൈക്ക് കത്തിക്കാൻ പ്രാദേശികമായി മറ്റാരുടെയെങ്കിലും സഹായം ലഭിച്ചിട്ടുണ്ടോ എന്ന കാര്യവും, സംഭവത്തിന് പിന്നിലെ കൂടുതൽ വിവരങ്ങളും പൊലീസ് ശേഖരിച്ചുവരികയാണ്. ആശുപത്രിയിൽ കഴിയുന്ന പ്രതിയുടെ ആരോഗ്യനില നിലവിൽ തൃപ്തികരമാണെന്നാണ് വിവരം.