അമ്മത്തൊട്ടിലിൽ ആദ്യ അതിഥി ഒൻപത് ദിവസം പ്രായമുള്ള പെൺകുഞ്ഞിന് ഇതൾ എന്ന് പേരിട്ടു

അമ്മക്കൂടിൽ ഇതൾ വിരിഞ്ഞു; മഞ്ചേരിയിലെ പുതിയ അമ്മത്തൊട്ടിലിൽ ആദ്യ അതിഥി

​മഞ്ചേരി: അമ്മയുടെ മടിയുടെ ചൂട് നഷ്ടപ്പെട്ട ഒരു കുരുന്നിന് സർക്കാരിന്റെ കരുതലിന്റെ അമ്മക്കൂട് തുറന്നു. മഞ്ചേരി മെഡിക്കൽ കോളേജിൽ പുനർനിർമ്മിച്ച ഹൈടെക് അമ്മത്തൊട്ടിലിൽ ആദ്യമായി ലഭിച്ച പെൺകുഞ്ഞിന് "ഇതൾ" എന്ന് പേരിട്ടു.

​വ്യാഴാഴ്ച പകൽ 1.58 നായിരുന്നു ഒൻപത് ദിവസം മാത്രം പ്രായമുള്ള കുഞ്ഞ് അമ്മത്തൊട്ടിലിൽ എത്തിയത്. 2.7 കിലോ ഭാരവും 50 സെന്റിമീറ്റർ പൊക്കവുമുള്ള കുഞ്ഞ് പൂർണ ആരോഗ്യവതിയാണെന്ന് മഞ്ചേരി മെഡിക്കൽ കോളേജിൽ നടത്തിയ പ്രാഥമിക പരിശോധനയിൽ കണ്ടെത്തി. കഴിഞ്ഞ വർഷം ഓഗസ്റ്റ് 19-നാണ് സംസ്ഥാന ശിശുക്ഷേമ സമിതി മഞ്ചേരിയിലെ അമ്മത്തൊട്ടിൽ അത്യാധുനിക സൗകര്യങ്ങളോടെ നവീകരിച്ചത്. നവീകരണത്തിന് ശേഷം ഇവിടെയെത്തുന്ന ആദ്യ കുരുന്നാണ് ഇതൾ.

​ദത്തെടുക്കൽ കേന്ദ്രത്തിലേക്ക് മാറ്റി

​ചൈൾഡ് വെൽഫെയർ കമ്മിറ്റിയുടെ (CWC) ഉത്തരവുപ്രകാരം കുഞ്ഞിനെ മലപ്പുറം പട്ടറക്കടവിലെ സംസ്ഥാന ശിശുക്ഷേമ സമിതിയുടെ ദത്തെടുക്കൽ കേന്ദ്രത്തിലേക്ക് മാറ്റിയിട്ടുണ്ട്. ഇതളിന്റെ ദത്തെടുക്കൽ നടപടികൾ ഉടൻ ആരംഭിക്കുമെന്ന് അധികൃതർ അറിയിച്ചു. കുഞ്ഞിന് അവകാശികളായി ആരെങ്കിലുമുണ്ടെങ്കിൽ സംസ്ഥാന ശിശുക്ഷേമ സമിതി അധികൃതരുമായി അടിയന്തരമായി ബന്ധപ്പെടണമെന്ന് ജനറൽ സെക്രട്ടറി അഡ്വ. ജി.എൽ. അരുൺ ഗോപി അറിയിച്ചു.

​ഉപേക്ഷിക്കപ്പെട്ടാലും അവഗണിക്കപ്പെടാത്ത ഒരു സമൂഹത്തിന്റെ പ്രതീകമാണ് ഓരോ അമ്മത്തൊട്ടിലുമെന്ന് അദ്ദേഹം ഓർമ്മിപ്പിച്ചു. മഞ്ചേരിയിൽ ഇതൾ വിരിഞ്ഞതോടെ ആ പ്രതീക്ഷയ്ക്ക് കൂടുതൽ നിറം കൂടിയിരിക്കുകയാണെന്നും അദ്ദേഹം കൂട്ടിച്ചേർത്തു.

​അഭയമേകി അമ്മത്തൊട്ടിലുകൾ

​2002 നവംബർ 14-ന് തിരുവനന്തപുരത്ത് ആദ്യ അമ്മത്തൊട്ടിൽ ആരംഭിച്ചതു മുതൽ ഇതുവരെ 998 കുട്ടികൾക്കാണ് അമ്മക്കൂട് അഭയം നൽകിയത്. 2023 മാർച്ച് മുതൽ ഇതുവരെ സംസ്ഥാനത്തെ വിവിധ അമ്മത്തൊട്ടിലുകളിലായി 110 കുരുന്നുകളെ ലഭിച്ചു. ഇതിൽ ഏറ്റവും കൂടുതൽ കുട്ടികൾ എത്തിയത് തിരുവനന്തപുരത്താണ് (66 പേർ). ഏറ്റവും കുറവ് മലപ്പുറത്താണ് (1 മഞ്ചേരിയിൽ ലഭിച്ച കുഞ്ഞ്).

​നടപ്പു വർഷമായ 2026-ൽ ഇതുവരെ 20 കുട്ടികളാണ് സംസ്ഥാനത്തെ വിവിധ അമ്മത്തൊട്ടിലുകൾ വഴി ശിശുക്ഷേമ സമിതിയുടെ കൈകളിൽ എത്തിയത്.

(തിരുവനന്തപുരം - 7, കോഴിക്കോട് - 9, ആലപ്പുഴ - 2, കൊല്ലം - 1, മലപ്പുറം - 1).

​കുട്ടികളെ സുരക്ഷിതമായി ദത്ത് നൽകുന്ന നടപടികളും സമിതി കാര്യക്ഷമമായി നടത്തുന്നുണ്ട്. 2023 മാർച്ച് മുതൽ ഇതുവരെ 247 കുട്ടികളെയാണ് വിവിധ രാജ്യങ്ങളിലേക്ക് ദത്ത് നൽകിയത്. കഴിഞ്ഞ ചൊവ്വാഴ്ചയും തിരുവനന്തപുരം ദത്തെടുക്കൽ കേന്ദ്രത്തിൽ നിന്ന് ഒരു പെൺകുഞ്ഞിനെ ഇറ്റലിയിലെ ലൂക്കയിലേക്ക് ദത്ത് നൽകിയതായി ജനറൽ സെക്രട്ടറി വ്യക്തമാക്കി.