റീഇമേജിനിംഗ് കേരളം കോൺഫറൻസിന് തുടക്കമായി

റീഇമേജിനിംഗ് കേരളം ബജറ്റ് പ്രഖ്യാപനങ്ങൾ കാര്യക്ഷമമാക്കാൻ ത്രിദിന റൗണ്ട് ടേബിൾ കോൺഫറൻസിന് തിരുവനന്തപുരത്ത് തുടക്കമായി

​തിരുവനന്തപുരം: സംസ്ഥാന ബജറ്റ് പ്രഖ്യാപനങ്ങൾ സമയബന്ധിതമായും കാര്യക്ഷമമായും നടപ്പാക്കുന്നതിനായി സംഘടിപ്പിക്കുന്ന ‘റീഇമേജിനിംഗ് കേരളം’ ത്രിദിന റൗണ്ട് ടേബിൾ കോൺഫറൻസിന് തിരുവനന്തപുരത്ത് തുടക്കമായി. തിരുവനന്തപുരം ലെമണ്‍ ട്രീ ഹോട്ടലില്‍ നടന്ന ചടങ്ങിൽ മുഖ്യമന്ത്രി വി. ഡി. സതീശന്‍ കോണ്‍ഫറന്‍സ് ഉദ്ഘാടനം ചെയ്തു. സെപ്തംബർ 18-നാണ് സമ്മേളനം സമാപിക്കുന്നത്.

​ബജറ്റ് പ്രഖ്യാപനങ്ങൾ വിവിധ കാരണങ്ങളാൽ നടപ്പാകാതെ പോകുന്ന സാഹചര്യം ഒഴിവാക്കാനും, പദ്ധതി നിർവഹണത്തിൽ ജനങ്ങൾക്ക് വിശ്വാസ്യത ഉറപ്പാക്കാനുമാണ് കോൺഫറൻസ് ലക്ഷ്യമിടുന്നത്. വകുപ്പുകൾ തമ്മിലുള്ള ഏകോപനക്കുറവ് മൂലമുണ്ടാകുന്ന കാലതാമസം ഒഴിവാക്കാൻ പദ്ധതികളെ വിവിധ ക്ലസ്റ്ററുകളായി തിരിച്ചാണ് ചർച്ചകൾ പുരോഗമിക്കുന്നത്.

​പദ്ധതികളുടെ നിർവഹണം, ആസൂത്രണം, വകുപ്പുതല ഏകോപനം എന്നിവ സമ്മേളനത്തിൽ വിശദമായി പരിശോധിക്കും. കൂടാതെ ഓരോ പദ്ധതിയുടെയും വിശദമായ പ്രൊജക്റ്റ് റിപ്പോർട്ട് (DPR) തയാറാക്കും. പദ്ധതികളുടെ വ്യാപ്തി, തന്ത്രപരമായ ലക്ഷ്യങ്ങൾ, സാമ്പത്തിക മാതൃക, നിർവഹണ രീതി, സമയപരിധി എന്നിവയും റൗണ്ട് ടേബിളിൽ തീരുമാനിക്കും.

​നയവിദഗ്ധർ, അക്കാദമിക്-ഗവേഷണ സ്ഥാപനങ്ങൾ, വികസന പങ്കാളികൾ, സാമ്പത്തിക സ്ഥാപനങ്ങൾ, നിക്ഷേപകർ, വ്യവസായികൾ, സ്റ്റാർട്ടപ്പുകൾ തുടങ്ങിയ വിവിധ മേഖലകളിലെ പ്രധാന പങ്കാളികളെ ഉൾപ്പെടുത്തിയാണ് കോൺഫറൻസിലെ ചർച്ചകൾ ക്രമീകരിച്ചിരിക്കുന്നത്.