അല്ലു അർജുൻ ചിത്രം ഹാപ്പി വീണ്ടും തിയേറ്ററുകളിലേക്ക് ജൂൺ 12 ന് 4K അൾട്രാ അറ്റ്മോസ് റീ റിലീസ്
ജെൻസി തലമുറയ്ക്കും 2K പ്രേമികൾക്കും ആഘോഷമാക്കാൻ അല്ലു അർജുൻ്റെ സൂപ്പർഹിറ്റ് ചിത്രം ഹാപ്പി വീണ്ടും തിയേറ്ററുകളിലെത്തുന്നു. ജൂൺ 12 ന് 4K നിലവാരത്തിൽ റീ റിലീസ് ചെയ്യും.
Siva Prasad 
അല്ലു അർജുൻ്റെ സൂപ്പർഹിറ്റ് ചിത്രം 'ഹാപ്പി' വീണ്ടും തിയേറ്ററുകളിലേക്ക്; ജൂൺ 12-ന് 4K അൾട്രാ അറ്റ്മോസ് റീ-റിലീസ്
കൊച്ചി: കേരളത്തിൽ വലിയ ആരാധകവൃന്ദമുള്ള അന്യഭാഷാ താരം അല്ലു അർജുൻ്റെ കരിയറിലെ എക്കാലത്തെയും മികച്ച ഹിറ്റുകളിലൊന്നായ 'ഹാപ്പി' വീണ്ടും ബിഗ് സ്ക്രീനിലേക്ക്. 'ജെൻസി'കൾക്കും 2K പ്രേമികൾക്കും ഒരുപോലെ ആഘോഷിക്കാൻ പാകത്തിൽ, അത്യാധുനിക 4K അൾട്രാ അറ്റ്മോസ് സാങ്കേതിക മികവോടെയാണ് ചിത്രം പുനഃപ്രദർശനത്തിന് ഒരുങ്ങുന്നത്. ജൂൺ 12 വെള്ളിയാഴ്ച ചിത്രം കേരളത്തിലെ തിയേറ്ററുകളിൽ റീ-റിലീസ് ചെയ്യും.
മലയാളികളുടെ പ്രിയപ്പെട്ട 'മല്ലു അർജുൻ' ആയി താരം മാറിയതിൻ്റെ തുടക്കകാലത്ത് പുറത്തിറങ്ങിയ ചിത്രമാണ് 'ഹാപ്പി'. എ. കരുണാകരൻ്റെ സംവിധാനത്തിൽ ഒരുങ്ങിയ ഈ പ്രണയ-ആക്ഷൻ ചിത്രം റിലീസ് ചെയ്ത സമയത്ത് കേരളത്തിൽ 150 ദിവസത്തിലധികം വിജയകരമായി പ്രദർശിപ്പിച്ചിരുന്നു. റിലീസ് ചെയ്ത് 20 വർഷം തികയുന്ന വേളയിലാണ് ചിത്രം പുതിയ ദൃശ്യ-ശ്രാവ്യ ഭംഗിയോടെ പ്രേക്ഷകരിലേക്ക് വീണ്ടുമെത്തുന്നത്.
സാങ്കേതികവിദ്യ: 4K അൾട്രാ ഇംപാക്റ്റ്, അൾട്രാ അറ്റ്മോസ് സൗണ്ട്.
പ്രധാന അഭിനേതാക്കൾ: അല്ലു അർജുൻ, ജെനീലിയ ഡിസൂസ, മനോജ് ബാജ്പേയ്.
സംഗീതം: യുവാൻ ശങ്കർ രാജ.
രഥക് ആർട്സിൻ്റെ ബാനറിൽ ഖാദർ ഹസൻ ആണ് ചിത്രത്തിൻ്റെ മലയാളം പതിപ്പ് വീണ്ടും തിയേറ്ററുകളിൽ എത്തിക്കുന്നത്. ചിത്രത്തിൽ അല്ലു അർജുനൊപ്പം ജെനീലിയ ഡിസൂസ, മനോജ് ബാജ്പേയി എന്നിവർ പ്രധാന വേഷങ്ങളിലെത്തുന്നു. യുവതലമുറ ഇന്നും നെഞ്ചിലേറ്റുന്ന, യുവാൻ ശങ്കർ രാജ ഈണമിട്ട ചിത്രത്തിലെ ഗാനങ്ങൾ 4K റീ-റിലീസിൻ്റെ പ്രധാന ആകർഷണമായിരിക്കും
