പൊരുതിനേടിയ സ്വാതന്ത്ര്യം, കാവൽനിൽക്കുന്ന ധീരത ഭാരതം എൺപതാം സ്വാതന്ത്ര്യപ്പുലരിയിൽ

പൊരുതിനേടിയ സ്വാതന്ത്ര്യം, കാവൽനിൽക്കുന്ന ധീരത ഭാരതം എൺപതാം സ്വാതന്ത്ര്യപ്പുലരിയിൽ

മൂവാറ്റുപുഴ: ചോരയും നീരും നൽകി സ്വാതന്ത്ര്യം നേടിത്തന്ന ധീരദേശാഭിമാനികളുടെ സ്മരണ പുതുക്കി രാജ്യം ഇന്ന് എൺപതാം സ്വാതന്ത്ര്യദിനം ആഘോഷിക്കുന്നു. ബ്രിട്ടീഷ് ഭരണകൂടത്തിന്റെ ക്രൂരമായ അടിച്ചമർത്തലുകൾക്കെതിരെ അഹിംസയെ ആയുധമാക്കി മഹാത്മാഗാന്ധിയും, സായുധ പോരാട്ടത്തിലൂടെ നേതാജി സുഭാഷ് ചന്ദ്രബോസും ഭഗത് സിംഗും ചന്ദ്രശേഖർ ആസാദും നയിച്ച സമാനതകളില്ലാത്ത പോരാട്ടങ്ങളുടെ ഫലമായാണ് 1947 ഓഗസ്റ്റ് 15-ന് ഭാരതം സ്വാതന്ത്ര്യത്തിന്റെ പുലരി കണ്ടത്.

​കശ്മീരിലെ മൈനസ് ഡിഗ്രി തണുപ്പിലും രാജസ്ഥാനിലെ ചുട്ടുപൊള്ളുന്ന മരുഭൂമിയിലും ഒരുപോലെ രാജ്യത്തിന് കാവൽ നിൽക്കുന്ന നമ്മുടെ സായുധ സേനാംഗങ്ങളുടെ തടസ്സമില്ലാത്ത സേവനത്തെയും രാജ്യം ഇന്ന് വാനോളം പുകഴ്ത്തുന്നു. അതിർത്തിയിലെ ശത്രുക്കളോട് പോരാടി വീരമൃത്യു വരിച്ചവർക്ക് പുറമെ, രാജ്യത്തെ ഉലച്ച പ്രകൃതിദുരന്തങ്ങളിൽ സ്വന്തം ജീവൻ പണയം വെച്ച് ആയിരക്കണക്കിന് മനുഷ്യജീവനുകൾ കാത്ത സൈനികരുടെ ത്യാഗവും ഇന്ന് രാജ്യം അനുസ്മരിക്കും.

​വയനാട് ഉരുൾപൊട്ടൽ ദുരന്തം പോലുള്ള മഹാമാരികളുടെ സമയത്ത്, സർവ്വതും നഷ്ടപ്പെട്ട മനുഷ്യർക്ക് പ്രതീക്ഷയുടെ വെളിച്ചമായി മാറിയത് നമ്മുടെ സൈനികരായിരുന്നു. പ്രളയത്തിലും കുത്തിയൊലിക്കുന്ന മണ്ണിലും പാലങ്ങൾ നിർമ്മിച്ചും, ചോരയിറ്റുന്ന കൈകൾ കൊണ്ട് അവശിഷ്ടങ്ങൾ നീക്കിയും ജീവനുകൾ രക്ഷിച്ച ഇന്ത്യൻ ആർമിയുടെയും നാവികസേനയുടെയും വ്യോമസേനയുടെയും എൻ.ഡി.ആർ.എഫിന്റെയും പോരാട്ടം രാജ്യം കടപ്പാടോടെ ഓർക്കുന്നു.

​ഭഗത് സിംഗും നേതാജി സുഭാഷ് ചന്ദ്രബോസും മഹാത്മാഗാന്ധിയും വെട്ടിത്തെളിച്ച സ്വാതന്ത്ര്യത്തിന്റെ വഴിയിൽ, ഇന്ന് രാജ്യത്തിന്റെ സുരക്ഷ ഉറപ്പാക്കുന്നത് ഇത്തരം ധീരന്മാരായ സൈനികരാണ്. കശ്മീരിലെ മഞ്ഞുമലകളിലും കടലിലും ആകാശത്തും ദുരന്തമുഖങ്ങളിലും ഭാരതാംബയുടെ കാവലാളായി നിൽക്കുന്ന ഓരോ സൈനികനും ആദരമർപ്പിച്ചാണ് ഇത്തവണത്തെ സ്വാതന്ത്ര്യദിന ആഘോഷങ്ങൾ നടക്കുന്നത്.

​നല്ലൊരു നാളെയ്ക്കായി പ്രതിജ്ഞയെടുക്കാം

​അതിർത്തിയിൽ കാവൽ നിൽക്കുന്ന സൈനികനും, വയലിൽ പണിയെടുക്കുന്ന കർഷകനും, തെരുവ് വെളിച്ചത്തിൽ പഠിക്കുന്ന കുട്ടിക്കും ഒരുപോലെ സുരക്ഷിതമായി ജീവിക്കാൻ കഴിയുമ്പോഴാണ് സ്വാതന്ത്ര്യം അർത്ഥപൂർണ്ണമാകുന്നത്. ഭരണഘടന ഉറപ്പുനൽകുന്ന അവകാശങ്ങൾ സംരക്ഷിക്കുന്നതിനൊപ്പം, ഒരു നല്ല പൗരനായി രാജ്യത്തിന്റെ പുരോഗതിക്കായി പങ്കാളിയാകാൻ ഇന്ന് നമുക്ക് പ്രതിജ്ഞ ചെയ്യാം.

​സ്വാതന്ത്ര്യം എന്നത് കേവലം ഒരു പതാക ഉയർത്തലോ ആഘോഷമോ മാത്രമല്ല; അത് പരസ്പരബഹുമാനത്തോടെയും സാഹോദര്യത്തോടെയും ജീവിക്കാനുള്ള അവകാശവും ഉത്തരവാദിത്തവുമാണ്. ജാതി-മത-ഭാഷാ ചിന്തകൾക്കതീതമായി 'ഭാരതീയർ' എന്ന ഒറ്റ വികാരത്തോടെ ഒന്നിച്ചുനിൽക്കാൻ സാധിക്കുന്നിടത്താണ് നമ്മുടെ നാടിന്റെ വിജയം. പ്രകൃതിയെ സംരക്ഷിച്ചുകൊണ്ടും, ഭരണഘടനാ മൂല്യങ്ങൾ കാത്തുസൂക്ഷിച്ചുകൊണ്ടും, പട്ടിണിയും അനീതിയും ഇല്ലാത്ത ഒരു നല്ല നാളെക്കായി കൈകോർക്കാമെന്ന് ഈ ഓഗസ്റ്റ് 15-ന് നമുക്ക് പ്രതിജ്ഞ ചെയ്യാം.

​ഫോർസ്റ്റാർ ന്യൂസിന്റെ ആറുലക്ഷത്തിൽ അധികം വരുന്ന വായനക്കാർക്ക് ഹൃദയം നിറഞ്ഞ സ്വാതന്ത്ര്യദിനാശംസകൾ

മാനേജിംഗ് എഡിറ്റർ

വർഗീസ് പണിക്കർ