സുവർണചകോരം ജാപ്പനീസ് ചിത്രം ടു സീസൺസ് ടു സ്ട്രേഞ്ചേഴ്സിന്
30-ാമത് ഐ എഫ് എഫ് കെ സമാപിച്ചു സുവർണചകോരം ജാപ്പനീസ് ചിത്രം ടു സീസൺസ് ടു സ്ട്രേഞ്ചേഴ്സിന് തലസ്ഥാനം നഗരിയെ ഒരാഴ്ചക്കാലം ആവേശത്തിലാഴ്ത്തി
അനില എം കൃഷ്ണൻ 
30-ാമത് ഐ.എഫ്.എഫ്.കെ സമാപിച്ചു സുവർണചകോരം ജാപ്പനീസ് ചിത്രം 'ടു സീസൺസ് ടു സ്ട്രേഞ്ചേഴ്സിന്'
തിരുവനന്തപുരം: തലസ്ഥാന നഗരിയെ ഒരാഴ്ചക്കാലം ആവേശത്തിലാഴ്ത്തിയ 30-ാമത് കേരള രാജ്യാന്തര ചലച്ചിത്രമേളയ്ക്ക് (IFFK) പ്രൗഢഗംഭീരമായ സമാപനം. സമാപന സമ്മേളനം മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. സാംസ്കാരിക വകുപ്പ് മന്ത്രി സജി ചെറിയാൻ ചടങ്ങിൽ അധ്യക്ഷത വഹിച്ചു.
ജാപ്പനീസ് സംവിധായകൻ ഷോ മിയാക്കെയുടെ 'ടു സീസൺസ് ടു സ്ട്രേഞ്ചേഴ്സ്' (Two Seasons Two Strangers) ആണ് ഇത്തവണത്തെ മികച്ച ചിത്രത്തിനുള്ള സുവർണചകോരം സ്വന്തമാക്കിയത്. 20 ലക്ഷം രൂപയും പ്രശസ്തിപത്രവും അടങ്ങുന്ന പുരസ്കാരം മുഖ്യമന്ത്രി സമ്മാനിച്ചു.
മലയാളി പ്രേക്ഷകർക്ക് അഭിമാനമായി ഉണ്ണികൃഷ്ണൻ ആവള സംവിധാനം ചെയ്ത 'തന്തപ്പേര്' മികച്ച ചിത്രത്തിനുള്ള പ്രേക്ഷക പുരസ്കാരം നേടി. ചോലനായ്ക്കരുടെ അതിജീവനത്തിന്റെ കഥ പറയുന്ന ഈ ചിത്രം അന്താരാഷ്ട്ര മത്സരവിഭാഗത്തിലാണ് പ്രദർശിപ്പിച്ചത്. മന്ത്രി സജി ചെറിയാനിൽ നിന്നും അണിയറപ്രവർത്തകർ പുരസ്കാരം ഏറ്റുവാങ്ങി.
അർജന്റീനിയൻ ചിത്രം 'ബിഫോർ ദ ബോഡി' (Before the Body) സംവിധാനം ചെയ്ത കരീന പിയാസയും ലൂസിയ ബ്രാസെലിസും മികച്ച സംവിധായകർക്കുള്ള രജതചകോരം പങ്കിട്ടു. നാല് ലക്ഷം രൂപയും പ്രശസ്തിപത്രവും ഫലകവുമാണ് ഇവർക്ക് ലഭിച്ചത്.
