തട്ടിയെടുത്ത പണം കൊണ്ട് സിനിമ നിർമ്മിച്ചു ടൊവിനോ ചിത്രത്തിനെതിരെ ദുബായ് വ്യവസായിയുടെ ഗുരുതര ആരോപണം
ടൊവിനോ തോമസ് നായകനായ ‘പള്ളിച്ചട്ടമ്പി’ സിനിമയുടെ റിലീസ് തടയണമെന്നാവശ്യപ്പെട്ട് ദുബായ് വ്യവസായി ഹൈക്കോടതിയിൽ. 15 കോടിയുടെ സാമ്പത്തിക തട്ടിപ്പ് ആരോപണം
Angel Varghese 
ടൊവിനോ ചിത്രം ‘പള്ളിച്ചട്ടമ്പി’ നിയമക്കുരുക്കിൽ; റിലീസ് തടയണമെന്നാവശ്യപ്പെട്ട് ദുബായ് വ്യവസായി ഹൈക്കോടതിയിൽ
കൊച്ചി: ടൊവിനോ തോമസിനെ നായകനാക്കി ഡിജോ ജോസ് ആന്റണി സംവിധാനം ചെയ്യുന്ന ബിഗ് ബജറ്റ് ചിത്രം ‘പള്ളിച്ചട്ടമ്പി’യുടെ റിലീസ് പ്രതിസന്ധിയിൽ. സിനിമയുടെ നിർമ്മാതാക്കൾക്കെതിരെ ഗുരുതര സാമ്പത്തിക ആരോപണങ്ങളുമായി ദുബായ് വ്യവസായി മംഗിലാൽ സുനിൽ അഗർവാൾ ഹൈക്കോടതിയെ സമീപിച്ചു. തന്നിൽ നിന്നും തട്ടിയെടുത്ത 15 കോടിയിലധികം രൂപ (61 ലക്ഷം ദിർഹം) ഉപയോഗിച്ചാണ് സിനിമ നിർമ്മിച്ചതെന്ന് ആരോപിച്ചാണ് ഹർജി.
നിർമ്മാതാക്കളായ നൗഫൽ അഹമ്മദ്, ബ്രിജീഷ് മുഹമ്മദ് എന്നിവർക്കെതിരെ സിബിഐ, എൻഫോഴ്സ്മെന്റ് ഡയറക്ടറേറ്റ് (ED) അന്വേഷണം വേണമെന്നും ഹർജിയിൽ ആവശ്യപ്പെടുന്നു.
ഹർജിയിലെ പ്രധാന ആരോപണങ്ങൾ:
സാമ്പത്തിക തട്ടിപ്പ്: 2019-ൽ വ്യവസായ ആവശ്യങ്ങൾക്കായി ഹർജിക്കാരനിൽ നിന്ന് വാങ്ങിയ 15 കോടി രൂപ മടക്കി നൽകിയില്ല. ഇവർ നൽകിയ ചെക്കുകൾ മടങ്ങിയതിനെ തുടർന്ന് ദുബായിൽ നിയമനടപടികൾ നേരിടുകയാണ്.
വ്യാജ പാസ്പോർട്ട്: ദുബായ് കോടതി ശിക്ഷിച്ചതിനെ തുടർന്ന് പ്രതികൾ വ്യാജ പാസ്പോർട്ട് ഉപയോഗിച്ചാണ് ഇന്ത്യയിലേക്ക് കടന്നതെന്ന് ഹർജിയിൽ പറയുന്നു.
കള്ളപ്പണം വെളുപ്പിക്കൽ: വിദേശത്തുനിന്നും ഹവാല മാർഗങ്ങളിലൂടെ എത്തിച്ച പണം ഉപയോഗിച്ചാണ് ‘വേൾഡ് വൈഡ് ഫിലിംസ് ഇന്ത്യ’ എന്ന പേരിൽ സിനിമ നിർമ്മിച്ചത്. അതിനാൽ കള്ളപ്പണം വെളുപ്പിക്കൽ നിരോധന നിയമം (PMLA), ഫെമ (FEMA) എന്നിവ പ്രകാരം അന്വേഷണം വേണം.
റിലീസ് തടയണം: കുറ്റകൃത്യത്തിലൂടെ സമ്പാദിച്ച പണമാണ് സിനിമയിൽ നിക്ഷേപിച്ചിരിക്കുന്നത് എന്നതിനാൽ അന്വേഷണം പൂർത്തിയാകുന്നതുവരെ ഏപ്രിൽ 10-ന് നിശ്ചയിച്ചിരിക്കുന്ന റിലീസ് തടയണം.
ടൊവിനോ തോമസ്, കയാദു ലോഹർ എന്നിവർ പ്രധാന വേഷങ്ങളിലെത്തുന്ന ചിത്രത്തിന്റെ ടീസർ കഴിഞ്ഞ ദിവസമാണ് പുറത്തിറങ്ങിയത്. സിനിമയുടെ ഭാവി ഇനി ഹൈക്കോടതിയുടെ നിലപാടിനെ ആശ്രയിച്ചിരിക്കും
