വിജയ്ക്കെതിരായ ഗവർണറുടെ നിലപാട് ഭരണഘടനാ വിരുദ്ധം
ടിവികെ നേതാവ് വിജയിയുടെ സർക്കാർ രൂപീകരണ അവകാശവാദം തള്ളിയ ഗവർണറുടെ നടപടിയെ വിമർശിച്ച് പ്രകാശ് രാജ്. ഗവർണറുടെ നിലപാട് ഭരണഘടനാ വിരുദ്ധമാണെന്ന് അദ്ദേഹം പറഞ്ഞു.
Angel Varghese 
വിജയ്ക്കെതിരായ ഗവർണറുടെ നിലപാട് ഭരണഘടനാ വിരുദ്ധം; കടുത്ത വിമർശനവുമായി പ്രകാശ് രാജ്
ചെന്നൈ: തമിഴക വെട്രി കഴകം (ടിവികെ) അധ്യക്ഷൻ വിജയിയുടെ സർക്കാർ രൂപീകരിക്കാനുള്ള അവകാശവാദം തള്ളിയ ഗവർണർ രാജേന്ദ്ര അർലേക്കറുടെ നടപടിക്കെതിരെ നടൻ പ്രകാശ് രാജ്. ഗവർണറുടെ പെരുമാറ്റം അറപ്പുളവാക്കുന്നതും ഭരണഘടനാ വിരുദ്ധവുമാണെന്ന് അദ്ദേഹം പറഞ്ഞു. നമുക്കിടയിൽ രാഷ്ട്രീയ അഭിപ്രായവ്യത്യാസങ്ങൾ ഉണ്ടാകാമെങ്കിലും, വിജയ്ക്ക് ജനഹിതം ലഭിച്ചിട്ടുണ്ടെന്നും നിയമസഭയിൽ ഭൂരിപക്ഷം തെളിയിക്കാൻ അദ്ദേഹത്തെ അനുവദിക്കണമെന്നും പ്രകാശ് രാജ് ആവശ്യപ്പെട്ടു.
ഗവർണറുടെ നിലപാടും തർക്കവും
നിലവിൽ 108 എംഎൽഎമാരാണ് ടിവികെയ്ക്കുള്ളത്. കേവല ഭൂരിപക്ഷത്തിന് 118 സീറ്റുകളാണ് വേണ്ടത്. കോൺഗ്രസിന്റെ 5 അംഗങ്ങൾ ഉൾപ്പെടെ 113 എംഎൽഎമാർ ഒപ്പിട്ട പിന്തുണക്കത്താണ് വിജയ് ഗവർണർക്ക് കൈമാറിയത്. എന്നാൽ, 118 പേരുടെ പിന്തുണ വ്യക്തമാക്കുന്ന കത്ത് ഹാജരാക്കിയാൽ മാത്രമേ സത്യപ്രതിജ്ഞയ്ക്ക് അനുമതി നൽകൂ എന്ന കർശന നിലപാടിലാണ് ഗവർണർ രാജേന്ദ്ര അർലേക്കർ.
നിർണ്ണായക നീക്കങ്ങളുമായി ടിവികെ
ഗവർണറുടെ നടപടി തിരിച്ചടിയായതോടെ സർക്കാർ രൂപവത്കരണത്തിനുള്ള നീക്കങ്ങൾ വിജയ് ശക്തമാക്കിയിട്ടുണ്ട്. ഇതിന്റെ ഭാഗമായി ടിവികെ എംഎൽഎമാരുടെ അടിയന്തര യോഗം പാർട്ടി ആസ്ഥാനത്ത് വിളിച്ചുചേർത്തു. പിന്തുണ ഉറപ്പാക്കാനുള്ള ചർച്ചകൾക്ക് ശേഷം രാവിലെ 11 മണിയോടെ പാർട്ടി നേതാക്കൾ വീണ്ടും ഗവർണറെ കണ്ട് കാര്യങ്ങൾ വിശദീകരിക്കും.
