ഇറാനിയൻ കപ്പൽ കൊച്ചിയിൽ സമുദ്രനിയമ കേന്ദ്രമായി കേരളം മാറുന്നുവെന്ന് ജസ്റ്റിസ് വി.എം. ശ്യാംകുമാർ

ഇറാനിയൻ കപ്പലിന്റെ കൊച്ചിയിലെ സാന്നിധ്യം സമുദ്രനിയമ ചർച്ചകളിൽ കേരളത്തിന്റെ പ്രസക്തി വർധിപ്പിക്കുന്നു: ജസ്റ്റിസ് വി. എം. ശ്യാംകുമാർ

​കൊച്ചി: ഇറാനിയൻ കപ്പലായ ഐ.ആർ.ഐ.എസ് ലാവൻ കൊച്ചിയിൽ അഭയം തേടിയ സംഭവം അന്താരാഷ്ട്ര സമുദ്ര നിയമവിഷയങ്ങളിൽ കേരളവും കൊച്ചിയും വഹിക്കുന്ന സുപ്രധാന പങ്കിന്റെ തെളിവാണെന്ന് കേരള ഹൈക്കോടതി ജഡ്ജി ജസ്റ്റിസ് വി. എം. ശ്യാംകുമാർ. ‘നാവിഗേറ്റിങ് ചേഞ്ച്: ഇന്ത്യയുടെ പുതിയ സമുദ്രനിയമങ്ങളും ആഗോള ഏകീകരണവും’ (Navigating Change: India’s New Maritime Laws and Global Integration) എന്ന വിഷയത്തിൽ പ്രത്യേക പ്രഭാഷണം നടത്തുകയായിരുന്നു അദ്ദേഹം.

​രാജ്യത്തെ പുതിയ സമുദ്രനിയമ പരിഷ്‌കാരങ്ങളും അവ അന്താരാഷ്ട്ര വ്യാപാരത്തിലും ആഗോള നിയമസംവിധാനങ്ങളിലും വരുത്തുന്ന മാറ്റങ്ങളും അദ്ദേഹം വിശദീകരിച്ചു. നുവാൽസ് സെന്റർ ഫോർ പാർലമെന്ററി സ്റ്റഡീസ് ആൻഡ് ലോ റീഫോംസും ഇന്ത്യൻ ലോ ഇൻസ്റ്റിറ്റ്യൂട്ട് കേരള സ്റ്റേറ്റ് യൂണിറ്റും സംയുക്തമായാണ് പരിപാടി സംഘടിപ്പിച്ചത്.

​നുവാൽസ് വൈസ് ചാൻസലർ പ്രൊഫ. (ഡോ.) ജി. ബി. റെഡ്ഡി അധ്യക്ഷത വഹിച്ച ചടങ്ങിൽ, സമുദ്രനിയമങ്ങളിലെ സമകാലിക വികാസങ്ങളെക്കുറിച്ച് നിയമ വിദ്യാർത്ഥികൾക്കും ഗവേഷകർക്കും വിദഗ്ധർക്കും അറിവ് പകരുന്നതായിരുന്നു പ്രഭാഷണം. നുവാൽസ് പ്രൊഫസർ പ്രൊഫ. (ഡോ.) അനിൽ ആർ. നായർ, ഹൈക്കോടതി അഭിഭാഷകൻ അഡ്വ. വി. ബി. ഹരി നാരായണൻ എന്നിവരും ചടങ്ങിൽ സംസാരിച്ചു.