കേരള വോട്ടെണ്ണൽ മുഖ്യമന്ത്രിയും 13 മന്ത്രിമാരും പിന്നിൽ; യുഡിഎഫ് മുന്നേറ്റം, നേമത്ത് രാജീവ് ചന്ദ്രശേഖർ
കേരള നിയമസഭാ തിരഞ്ഞെടുപ്പ് വോട്ടെണ്ണൽ ഫലസൂചനകൾ പുറത്തുവരുമ്പോൾ മുഖ്യമന്ത്രി പിണറായി വിജയനും 13 മന്ത്രിമാരും പിന്നിൽ. യുഡിഎഫ് പ്രമുഖർ ലീഡ് ചെയ്യുന്നു.
Angel Varghese 
കേരളം ആര് ഭരിക്കും? വോട്ടെണ്ണൽ പുരോഗമിക്കുമ്പോൾ മുഖ്യമന്ത്രിയും 13 മന്ത്രിമാരും പിന്നിൽ; യുഡിഎഫിന് വൻ മുന്നേറ്റം
തിരുവനന്തപുരം: കേരള നിയമസഭാ തിരഞ്ഞെടുപ്പിന്റെ വോട്ടെണ്ണൽ രണ്ട് മണിക്കൂർ പിന്നിടുമ്പോൾ സംസ്ഥാന ഭരണകൂടത്തെ ഞെട്ടിക്കുന്ന ഫലസൂചനകൾ. മുഖ്യമന്ത്രി പിണറായി വിജയനും മന്ത്രിസഭയിലെ 13 പ്രമുഖ മന്ത്രിമാരും നിലവിൽ പിന്നിലാണ്. സംസ്ഥാനത്തുടനീളം ശക്തമായ യുഡിഎഫ് തരംഗം ദൃശ്യമാകുന്ന കാഴ്ചയാണ് വോട്ടെണ്ണലിന്റെ ആദ്യ മണിക്കൂറുകൾ സമ്മാനിക്കുന്നത്.
മന്ത്രിമാരുടെ നില പരുങ്ങലിൽ
എൽഡിഎഫ് നിരയിലെ പ്രമുഖരായ റോഷി അഗസ്റ്റിൻ, വി.എൻ. വാസവൻ, ആർ. ബിന്ദു, കെ.ബി. ഗണേഷ് കുമാർ, പി. രാജീവ്, ഒ.ആർ. കേളു, വി. ശിവന്കുട്ടി, വീണാ ജോർജ്, വി. അബ്ദുറഹിമാൻ, എം.ബി. രാജേഷ്, ജെ. ചിഞ്ചുറാണി, എ.കെ. ശശീന്ദ്രൻ, പി. പ്രസാദ് എന്നിവരാണ് വോട്ടെണ്ണലിന്റെ വിവിധ ഘട്ടങ്ങളിൽ പിന്നിലായിരിക്കുന്നത്.
പ്രധാന പോരാട്ടങ്ങൾ ഒറ്റനോട്ടത്തിൽ:
കോട്ടയം: വി.എൻ. വാസവനെ പിന്നിലാക്കി യുഡിഎഫ് സ്ഥാനാർത്ഥി നാട്ടകം സുരേഷ് ശക്തമായ മുന്നേറ്റം നടത്തുന്നു.
ഇരിങ്ങാലക്കുട: തുടക്കം മുതൽ തന്നെ ആർ. ബിന്ദുവിന് തിരിച്ചടിയാണ് ലഭിക്കുന്നത്. യുഡിഎഫിന്റെ തോമസ് ഉണ്ണിയാടനാണ് ഇവിടെ ലീഡ് ചെയ്യുന്നത്.
പത്തനാപുരം: കെ.ബി. ഗണേഷ് കുമാറിനെതിരെ ജ്യോതികുമാർ ചാമക്കാല അപ്രതീക്ഷിത മുന്നേറ്റം കാഴ്ചവെക്കുന്നു.
നേമം: ശക്തമായ ത്രികോണ മത്സരം നടക്കുന്ന നേമത്ത് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറാണ് മുന്നിൽ. യുഡിഎഫിന്റെ കെ.എസ്. ശബരീനാഥൻ രണ്ടാം സ്ഥാനത്തുണ്ട്.
തൃത്താല: എം.ബി. രാജേഷും വി.ടി. ബൽറാമും തമ്മിൽ ഇഞ്ചോടിഞ്ച് പോരാട്ടമാണ് നടക്കുന്നത്.
ആറൻമുള: വീണാ ജോർജിനെതിരെ യുഡിഎഫ് യുവനേതാവ് അബിൻ വർക്കി ലീഡ് ഉയർത്തുകയാണ്.
അതേസമയം, എൽഡിഎഫിന് ആശ്വാസമായി പേരാവൂരിൽ കെ.കെ. ശൈലജയും ബേപ്പൂരിൽ പി.എ. മുഹമ്മദ് റിയാസും ലീഡ് നിലനിർത്തുന്നുണ്ട്. എലത്തൂരിലും ചേർത്തലയിലും യഥാക്രമം എ.കെ. ശശീന്ദ്രനും പി. പ്രസാദും പിന്നിലായത് ഇടത് ക്യാമ്പുകളെ ആശങ്കയിലാക്കുന്നു. വോട്ടെണ്ണൽ പുരോഗമിക്കുമ്പോൾ കേരളം ആർക്കൊപ്പം നിൽക്കുമെന്ന ആകാംക്ഷയിലാണ് രാഷ്ട്രീയ കേന്ദ്രങ്ങൾ.
