വാണിജ്യ ഗ്യാസ് സിലിണ്ടർ വില വർധന മേയ് 6 ന് കേരളത്തിൽ ഹോട്ടൽ പണിമുടക്ക് ഭക്ഷണവില കൂടിയേക്കും

വാണിജ്യ പാചകവാതക വില വർധനയിൽ പ്രതിഷേധിച്ച് മേയ് 6 ന് കേരളത്തിലെ ഹോട്ടലുകൾ അടച്ചിടും. കേന്ദ്ര സർക്കാർ നടപടിക്കെതിരെ കേരള ഹോട്ടൽ ആൻഡ് റസ്റ്ററന്റ് അസോസിയേഷൻ സമരത്തിന് ആഹ്വാനം ചെയ്തു.

അനില എം കൃഷ്ണൻ

May 1, 2026 - 21:25

വാണിജ്യ ഗ്യാസ് സിലിണ്ടർ വില വർധന: മേയ് 6-ന് കേരളത്തിൽ ഹോട്ടൽ പണിമുടക്ക്

വാണിജ്യ സിലിണ്ടർ വില വർധന: മേയ് 6-ന് സംസ്ഥാനത്ത് ഹോട്ടൽ പണിമുടക്ക്

കൊച്ചി: വാണിജ്യ ആവശ്യങ്ങൾക്കുള്ള പാചകവാതക വില കുത്തനെ കൂട്ടിയതിൽ പ്രതിഷേധിച്ച് സംസ്ഥാനത്തെ ഹോട്ടലുകൾ പണിമുടക്കിലേക്ക്. മേയ് ആറിന് സംസ്ഥാനവ്യാപകമായി ഹോട്ടലുകൾ അടച്ചിടാൻ കേരള ഹോട്ടൽ ആൻഡ് റസ്റ്ററന്റ് അസോസിയേഷൻ (KHRA) തീരുമാനിച്ചു. കൊച്ചിയിൽ ചേർന്ന അസോസിയേഷൻ യോഗത്തിലാണ് സമര പ്രഖ്യാപനം ഉണ്ടായത്.

വാണിജ്യാവശ്യത്തിനുള്ള സിലിണ്ടറിന് ഒറ്റയടിക്ക് 993 രൂപ വർധിപ്പിച്ച കേന്ദ്ര സർക്കാർ നടപടി ഹോട്ടൽ മേഖലയെ തകർക്കുന്നതാണെന്ന് അസോസിയേഷൻ ചൂണ്ടിക്കാട്ടി. പുതിയ വർധനവോടെ 19 കിലോയുടെ സിലിണ്ടറിന് 3085 രൂപ നൽകേണ്ടി വരും. ഇത്രയും വലിയ തുക നൽകി ഹോട്ടൽ വ്യവസായം മുന്നോട്ട് കൊണ്ടുപോകാൻ കഴിയില്ലെന്ന് ഭാരവാഹികൾ വ്യക്തമാക്കി.

നിലവിലെ വിലക്കയറ്റം, ഉയർന്ന കെട്ടിട വാടക, ജീവനക്കാരുടെ കൂലി വർധനവ് എന്നിവ മൂലം വലിയ സാമ്പത്തിക പ്രതിസന്ധിയിലാണ് ഹോട്ടൽ ഉടമകൾ. ഇതിന് പുറമെ സിലിണ്ടർ ക്ഷാമം കൂടി രൂക്ഷമായതോടെ ഇപ്പോൾ തന്നെ 50 ശതമാനത്തിൽ താഴെ ഹോട്ടലുകൾ മാത്രമേ സംസ്ഥാനത്ത് പ്രവർത്തിക്കുന്നുള്ളൂ. വില വർധനവ് ഹോട്ടൽ ഭക്ഷണവില ഉയർത്താൻ നിർബന്ധിതമാക്കുമെന്നും ഇത് സാധാരണക്കാരെ സാരമായി ബാധിക്കുമെന്നും കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്റ് രാജു അപ്സര പറഞ്ഞു. ഹോട്ടൽ അസോസിയേഷന്റെ സമരത്തിന് വ്യാപാരി സമിതി പൂർണ്ണ പിന്തുണ പ്രഖ്യാപിച്ചിട്ടുണ്ട്.