പട്ടയ വിതരണത്തിൽ ചരിത്ര നേട്ടം 4.5 ലക്ഷം കുടുംബങ്ങൾക്ക് ഭൂമി നൽകി എൽ.ഡി.എഫ് സർക്കാർ മേള ഉദ്ഘാടനം ചെയ്ത് മുഖ്യമന്ത്രി.

പട്ടയ വിതരണത്തിൽ ചരിത്രം കുറിച്ച് എൽ.ഡി.എഫ് സർക്കാർ; 10 വർഷത്തിനിടെ 4.5 ലക്ഷം കുടുംബങ്ങൾക്ക് ഭൂമി

​തിരുവനന്തപുരം: കേരളത്തിലെ ഭൂരഹിതർക്ക് ആശ്വാസമേകി പട്ടയ വിതരണത്തിൽ പുതിയ ചരിത്രം സൃഷ്ടിച്ചിരിക്കുകയാണ് എൽ.ഡി.എഫ് സർക്കാരെന്ന് മുഖ്യമന്ത്രി പിണറായി വിജയൻ. സംസ്ഥാനതല പട്ടയ വിതരണ മേള ഓൺലൈനായി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കഴിഞ്ഞ പത്ത് വർഷത്തിനിടെ നാലര ലക്ഷം കുടുംബങ്ങൾക്ക് പട്ടയം നൽകാൻ സാധിച്ചത് അഭിമാനകരമായ നേട്ടമാണെന്ന് മുഖ്യമന്ത്രി വിശേഷിപ്പിച്ചു.

​"കേരളീയർക്ക് സന്തോഷവും അഭിമാനവും പകരുന്ന നിമിഷമാണിത്. അല്പം കൂടി സമയം ലഭിച്ചാൽ പട്ടയം ലഭിച്ചവരുടെ എണ്ണം അഞ്ച് ലക്ഷത്തിലേക്ക് എത്തിക്കാൻ സർക്കാരിന് സാധിക്കും," മുഖ്യമന്ത്രി പറഞ്ഞു. ജനങ്ങളുടെ വലിയ പിന്തുണയാണ് ഈ പദ്ധതിക്ക് ലഭിച്ചതെന്നും ജാതി-മത-രാഷ്ട്രീയ ഭേദമന്യേ എല്ലാവരും ഇതിനോട് സഹകരിച്ചതായും അദ്ദേഹം കൂട്ടിച്ചേർത്തു.

​വികസന കാര്യങ്ങളിൽ കേരളം മറ്റ് സംസ്ഥാനങ്ങളിൽ നിന്ന് വേറിട്ടുനിൽക്കുന്നത് ജനപക്ഷ നയങ്ങൾ മൂലമാണെന്നും മുഖ്യമന്ത്രി വ്യക്തമാക്കി. മുൻകാലങ്ങളിൽ സംസ്ഥാനം നേരിട്ട പ്രതിസന്ധികളെ മറികടന്നാണ് ഈ നേട്ടം. യു.ഡി.എഫിനെയും ബി.ജെ.പിയെയും പരോക്ഷമായി വിമർശിച്ച മുഖ്യമന്ത്രി, കോൺഗ്രസും ബി.ജെ.പിയും ഒരേ നയങ്ങളാണ് പിന്തുടരുന്നതെന്നും എന്നാൽ എൽ.ഡി.എഫ് ജനകീയ ബദലാണ് ഉയർത്തിപ്പിടിക്കുന്നതെന്നും ഓർമ്മിപ്പിച്ചു. സംസ്ഥാനത്തെ വികസനക്കുതിപ്പിനെ ഭയപ്പെടുന്ന ചിലർ ഈ നേട്ടങ്ങളെ തുരങ്കം വെക്കാൻ ശ്രമിക്കുന്നുണ്ടെന്നും അദ്ദേഹം പറഞ്ഞു.