അക്ഷയതൃതീയയിൽ റെക്കോർഡ് നേട്ടവുമായി മലബാർ ഗോൾഡ് വിറ്റുവരവ് 2,646 കോടി രൂപ, 53% വളർച്ച
ഈ വർഷത്തെ അക്ഷയതൃതീയയിൽ 2,646 കോടി രൂപയുടെ വിറ്റുവരവ് നേടി മലബാർ ഗോൾഡ് ആൻഡ് ഡയമണ്ട്സ് ചരിത്രപരമായ നേട്ടം സ്വന്തമാക്കി. മുൻവർഷത്തെ അപേക്ഷിച്ച് ഇന്ത്യൻ വിപണിയിൽ മാത്രം 71 ശതമാനത്തിന്റെ വർധനവാണ് രേഖപ്പെടുത്തിയത്.
അനില എം കൃഷ്ണൻ 
കോഴിക്കോട്: ഈ വർഷത്തെ അക്ഷയതൃതീയ ദിനത്തിൽ എക്കാലത്തെയും ഉയർന്ന വിൽപനയുമായി മലബാർ ഗോൾഡ് ആൻഡ് ഡയമണ്ട്സ്. ഒരൊറ്റ ദിവസം കൊണ്ട് 2,646 കോടി രൂപയുടെ വിറ്റുവരവാണ് ഗ്രൂപ്പ് സ്വന്തമാക്കിയത്. കഴിഞ്ഞ വർഷത്തെ അപേക്ഷിച്ച് ആഗോള വിൽപനയിൽ 53 ശതമാനത്തിന്റെ വൻ വളർച്ചയാണ് ഉണ്ടായിരിക്കുന്നത്.
ഇന്ത്യൻ വിപണിയിലെ മികച്ച മുന്നേറ്റമാണ് ഈ നേട്ടത്തിൽ നിർണ്ണായകമായത്. ഇന്ത്യയിലെ വിൽപനയിൽ 71 ശതമാനം വളർച്ച രേഖപ്പെടുത്തിയപ്പോൾ, രാജ്യാന്തര വിപണികളിൽ 22 ശതമാനം വളർച്ചയുണ്ടായി. മലബാർ ഗോൾഡ് ആൻഡ് ഡയമണ്ട്സിൽ ഉപഭോക്താക്കൾ അർപ്പിക്കുന്ന അചഞ്ചലമായ വിശ്വാസമാണ് ഈ വിജയത്തിന് പിന്നിലെന്ന് മലബാർ ഗ്രൂപ്പ് ചെയർമാൻ എം.പി. അഹമ്മദ് പറഞ്ഞു.
ഏകദേശം 1.25 ലക്ഷത്തിലധികം ഉപഭോക്താക്കളാണ് ഇത്തവണ അക്ഷയതൃതീയ ദിനത്തിൽ ആഭരണങ്ങൾ വാങ്ങാനായി മലബാർ ഗോൾഡ് ഷോറൂമുകളിൽ എത്തിയത്. നിലവിൽ 14 രാജ്യങ്ങളിലായി 445-ലേറെ ഷോറൂമുകളാണ് മലബാർ ഗോൾഡിന് ഉള്ളത്. ഗുണമേന്മയിലും സുതാര്യതയിലും പുലർത്തുന്ന വിട്ടുവീഴ്ചയില്ലാത്ത നിലപാടാണ് ആഗോളതലത്തിൽ ബ്രാൻഡിനെ മുൻനിരയിൽ എത്തിച്ചതെന്നും അദ്ദേഹം കൂട്ടിച്ചേർത്തു.
