അപ്പാനി ശരത്തും നിലമ്പൂർ ആയിഷയും വീണ്ടും അരങ്ങിൽ തുടരണമീ വിജയഗാഥ ശ്രദ്ധേയമാകുന്നു
കേരളത്തിന്റെ പുരോഗമന ചരിത്രവും വികസനവും പ്രമേയമാക്കി ഡോ. പ്രമോദ് പയ്യന്നൂർ ഒരുക്കിയ തുടരണമീ വിജയഗാഥ കണ്ണൂരിൽ അരങ്ങേറി. അപ്പാനി ശരത്ത്, മധുപാൽ തുടങ്ങി അറുപത്തഞ്ചോളം താരങ്ങളാണ് ഈ മെഗാ ഇവന്റിൽ അണിനിരന്നത്.
P R Sumeran 
ചരിത്രവും വികസനവും കൈകോർക്കുന്ന ദൃശ്യവിരുന്ന്; 'തുടരണമീ വിജയഗാഥ'യുമായി അപ്പാനി ശരത്തും സംഘവും
കൊച്ചി: കേരളത്തിന്റെ വിപ്ലവകരമായ പുരോഗമന ചരിത്രവും വർത്തമാനകാല വികസന മുന്നേറ്റങ്ങളും കോർത്തിണക്കി ഒരുക്കിയ 'തുടരണമീ വിജയഗാഥ' ശ്രദ്ധേയമാകുന്നു. പ്രമുഖ ചലച്ചിത്ര താരം അപ്പാനി ശരത്ത് കേന്ദ്ര കഥാപാത്രമായി എത്തിയ ഈ മെഗാ ദൃശ്യാവിഷ്കാരം കണ്ണൂർ ധർമ്മടത്താണ് അരങ്ങേറിയത്. പ്രശസ്ത നാടക-ചലച്ചിത്ര സംവിധായകൻ ഡോ. പ്രമോദ് പയ്യന്നൂരിന്റെ ആശയവും ആവിഷ്കാരവുമാണ് ഈ കലാരൂപത്തിന് പിന്നിൽ.
സിനിമ, നാടകം, നൃത്തം, സംഗീതം, കളരി തുടങ്ങിയ മേഖലകളിലെ അറുപത്തഞ്ചോളം പ്രതിഭകളാണ് 20 മിനിറ്റ് ദൈർഘ്യമുള്ള ഈ ദൃശ്യാവിഷ്കാരത്തിനായി വേദിയിലെത്തിയത്. കേരളീയ നവോത്ഥാനത്തിന്റെ നാഴികക്കല്ലുകളെ ഓർമ്മിപ്പിക്കുന്നതിനൊപ്പം നാടിന്റെ പുതുകാല വികസന കാഴ്ചകളും ദൃശ്യാവിഷ്കാരത്തിൽ പ്രതിഫലിക്കുന്നുണ്ട്.
താരസമ്പന്നമായ വേദി
നിലമ്പൂർ ആയിഷ, സിതാര ബാലകൃഷ്ണൻ, മധുപാൽ, സന്തോഷ് കീഴാറ്റൂർ, ഇർഷാദ്, കുഞ്ഞികൃഷ്ണൻ മാസ്റ്റർ, പ്രൊഫ. അലിയാർ, ഗിരിജാ സുരേന്ദ്രൻ, ഭാഗ്യലക്ഷ്മി, സ്റ്റീനാ രാജ് തുടങ്ങിയ വൻ താരനിരയാണ് ദൃശ്യാവിഷ്കാരത്തിൽ അണിനിരന്നത്.
ചലച്ചിത്ര സംവിധായകൻ ടി.വി. ചന്ദ്രൻ പരിപാടിയുടെ പോസ്റ്റർ പ്രകാശനം നിർവ്വഹിച്ചു. കവയിത്രി റോസ് മേരി പോസ്റ്റർ ഏറ്റുവാങ്ങി. ഡോ. പ്രമോദ് പയ്യന്നൂർ, മറ്റ് സാങ്കേതിക പ്രവർത്തകർ എന്നിവർ ചടങ്ങിൽ സംബന്ധിച്ചു.
സാങ്കേതിക മികവ്
അത്യന്തം ആധുനികമായ സാങ്കേതിക വിദ്യകൾ കോർത്തിണക്കിയാണ് ഷോ ഒരുക്കിയിരിക്കുന്നത്.
തിയേറ്റർ ടെക്സ്റ്റ്: രാജ് മോഹൻ നീലേശ്വരം
സ്ക്രീൻ ദൃശ്യ സംയോജനം: ശാന്തി കൃഷ്ണ കണ്ണോത്ത്
ഗ്രാഫിക്സ്: പ്രസാദ് എഡ്വേഡ്
ജിജി കുട്ടൻ, അനു പ്രവീൺ, സുനിൽ കുടവട്ടൂർ, ബിജു നാരായണൻ തുടങ്ങിയവരാണ് മറ്റ് സാങ്കേതിക വിഭാഗങ്ങൾ കൈകാര്യം ചെയ്തത്. വേദിയിലെ ഈ ദൃശ്യാനുഭവം വരും ദിവസങ്ങളിൽ ചെറിയ ഫിക്ഷൻ സെഗ്മെന്റുകളായി നവമാധ്യമങ്ങളിലൂടെ കേരളത്തിലെ എല്ലാ മണ്ഡലങ്ങളിലും എത്തും.
