സംസ്ഥാനത്ത് കഠിനമായ ചൂട് അതീവ ജാഗ്രതാ നിർദേശങ്ങളുമായി ദുരന്ത നിവാരണ അതോറിറ്റി ഉച്ചസമയത്ത് പുറത്തിറങ്ങുന്നത് ഒഴിവാക്കുക
കേരളത്തിൽ ചൂട് വർധിക്കുന്ന സാഹചര്യത്തിൽ സൂര്യാഘാതം, നിർജലീകരണം എന്നിവ ഒഴിവാക്കാൻ പൊതുജനങ്ങൾ പാലിക്കേണ്ട കർശന നിർദേശങ്ങൾ സംസ്ഥാന ദുരന്ത നിവാരണ അതോറിറ്റി പുറപ്പെടുവിച്ചു. 11 മണി മുതൽ 3 മണി വരെ നേരിട്ട് വെയിൽ ഏൽക്കരുത്.
Angel Varghese
114
തിരുവനന്തപുരം: സംസ്ഥാനത്ത് ചൂട് ക്രമാതീതമായി വർധിച്ചു വരുന്ന സാഹചര്യത്തിൽ പൊതുജനങ്ങൾക്കായി സംസ്ഥാന ദുരന്ത നിവാരണ അതോറിറ്റി ജാഗ്രത നിർദേശങ്ങൾ പുറപ്പെടുവിച്ചു. ഉയർന്ന ചൂട് സൂര്യാഘാതം, സൂര്യാതപം, നിർജലീകരണം തുടങ്ങി ഗുരുതരമായ ആരോഗ്യപ്രശ്നങ്ങൾക്ക് കാരണമായേക്കാം എന്നതിനാലാണ് നടപടി.
പ്രധാന നിർദേശങ്ങൾ:
സമയക്രമീകരണം: പകൽ 11 മണി മുതൽ 3 മണി വരെ നേരിട്ട് സൂര്യപ്രകാശം ഏൽക്കുന്നത് ഒഴിവാക്കണം. നിർമ്മാണത്തൊഴിലാളികൾ, കർഷകർ, വഴിയോരക്കച്ചവടക്കാർ എന്നിവർ ജോലി സമയം ഇതിനനുസരിച്ച് ക്രമീകരിക്കേണ്ടതാണ്.
ആരോഗ്യ സംരക്ഷണം: ദാഹമില്ലെങ്കിലും ധാരാളം വെള്ളം കുടിക്കുക. ഒ.ആർ.എസ് (ORS) ലായനി, സംഭാരം എന്നിവ പ്രോത്സാഹിപ്പിക്കുക. മദ്യം, കാപ്പി, ചായ, കാർബണേറ്റഡ് പാനീയങ്ങൾ എന്നിവ പകൽ സമയത്ത് ഒഴിവാക്കണം.
വസ്ത്രധാരണം: അയഞ്ഞ, ഇളം നിറത്തിലുള്ള കോട്ടൺ വസ്ത്രങ്ങൾ ധരിക്കുക. പുറത്തിറങ്ങുമ്പോൾ കുടയോ തൊപ്പിയോ ഉപയോഗിക്കുക.
കുട്ടികൾക്കും വിദ്യാലയങ്ങൾക്കും: സ്കൂളുകളിൽ ശുദ്ധമായ കുടിവെള്ളവും വായുസഞ്ചാരവും ഉറപ്പാക്കണം. വെയിലേൽക്കുന്ന അസംബ്ലികളും മറ്റ് പരിപാടികളും ഒഴിവാക്കണം. കുട്ടികളെ വാഹനങ്ങളിൽ ഇരുത്തി പോകാൻ പാടില്ല.
തൊഴിൽ മേഖലയിൽ: ഓൺലൈൻ ഭക്ഷണ വിതരണക്കാർക്ക് സ്ഥാപനങ്ങൾ വിശ്രമം അനുവദിക്കണം. പോലീസുകാർ, മാധ്യമപ്രവർത്തകർ എന്നിവർ വെയിൽ ഏൽക്കാതിരിക്കാൻ കുടകൾ ഉപയോഗിക്കണം.
അഗ്നിബാധ ജാഗ്രത: മാർക്കറ്റുകൾ, ഡംപിങ് യാർഡുകൾ എന്നിവിടങ്ങളിൽ ഫയർ ഓഡിറ്റ് നടത്തണം. കാട്ടുതീ തടയാൻ വനം വകുപ്പിന്റെ നിർദേശങ്ങൾ പാലിക്കണം.
മൃഗസംരക്ഷണം: കന്നുകാലികളെ വെയിലത്ത് കെട്ടിയിടരുത്. പക്ഷികൾക്കും മൃഗങ്ങൾക്കും കുടിവെള്ളം ഉറപ്പാക്കണം.
അസ്വസ്ഥതകൾ അനുഭവപ്പെട്ടാൽ ഉടനടി വിശ്രമിക്കാനും വൈദ്യസഹായം തേടാനും അതോറിറ്റി നിർദേശിച്ചു. കാലാവസ്ഥാ വകുപ്പിന്റെ ഔദ്യോഗിക അറിയിപ്പുകൾ ശ്രദ്ധിക്കണമെന്നും ജലം പാഴാക്കരുതെന്നും അധികൃതർ അറിയിച്ചു.
