വിവാഹിതനായ പുരുഷന്റെ ലിവ് ഇൻ റിലേഷൻ കുറ്റകരമല്ല അലഹബാദ് ഹൈക്കോടതിയുടെ സുപ്രധാന വിധി
വിവാഹിതനായ പുരുഷൻ മറ്റൊരു സ്ത്രീയുമായി ലിവ് ഇൻ റിലേഷനിൽ ഏർപ്പെടുന്നത് കുറ്റകരമല്ലെന്ന് അലഹബാദ് ഹൈക്കോടതി. വ്യക്തിസ്വാതന്ത്ര്യം സംരക്ഷിക്കണമെന്ന് കോടതി നിർദേശിച്ചു
Angel Varghese 
ലിവ്-ഇൻ റിലേഷൻ കുറ്റകരമല്ല: വിവാഹിതനായ പുരുഷനും പങ്കാളിക്കും സംരക്ഷണം നൽകി അലഹബാദ് ഹൈക്കോടതി
പ്രയാഗ്രാജ്: പ്രായപൂർത്തിയായ രണ്ടു വ്യക്തികൾ ഉഭയസമ്മതപ്രകാരം ഒരുമിച്ച് താമസിക്കുന്നത് കുറ്റകരമല്ലെന്ന് അലഹബാദ് ഹൈക്കോടതി. വിവാഹിതനായ പുരുഷൻ മറ്റൊരു സ്ത്രീയുമായി ലിവ്-ഇൻ റിലേഷനിൽ ഏർപ്പെടുന്നത് നിയമപരമായി തെറ്റല്ലെന്നും, ധാർമികതയും നിയമവും തമ്മിൽ വ്യക്തമായ വേർതിരിവുണ്ടെന്നും കോടതി നിരീക്ഷിച്ചു.
ഉത്തർപ്രദേശിലെ ഷാജഹാൻപുർ സ്വദേശികളായ അനാമികയും നേത്രപാലും നൽകിയ ഹർജി പരിഗണിക്കവെയാണ് ജസ്റ്റിസുമാരായ ജെ.ജെ. മുനീർ, തരുൺ സക്സേന എന്നിവരടങ്ങിയ ബെഞ്ചിന്റെ സുപ്രധാന ഉത്തരവ്. യുവതിയുടെ അമ്മ നൽകിയ പരാതിയിൽ പോലീസ് നടപടി ഭയന്നാണ് ദമ്പതികൾ കോടതിയെ സമീപിച്ചത്.
കോടതിയുടെ പ്രധാന നിരീക്ഷണങ്ങൾ:
നിയമവും ധാർമികതയും: കോടതിയുടെ നടപടികൾ സാമൂഹികമായ ധാർമികതയെയോ അഭിപ്രായങ്ങളെയോ അടിസ്ഥാനമാക്കിയല്ല, മറിച്ച് പൗരന്മാരുടെ മൗലികാവകാശങ്ങൾ സംരക്ഷിക്കാനാണെന്ന് കോടതി വ്യക്തമാക്കി.
അറസ്റ്റ് പാടില്ല: ഹർജിക്കാരെ അറസ്റ്റ് ചെയ്യരുതെന്ന് പോലീസിന് കർശന നിർദേശം നൽകി.
കുടുംബത്തിന് നിയന്ത്രണം: ദമ്പതികളുടെ ജീവിതത്തിൽ ഇടപെടാനോ അവർ താമസിക്കുന്നയിടം സന്ദർശിക്കാനോ യുവതിയുടെ കുടുംബത്തിന് അനുവാദമില്ല. നേരിട്ടോ അല്ലാതെയോ അവരുമായി ആശയവിനിമയം നടത്തരുതെന്നും കോടതി ഉത്തരവിട്ടു.
സുരക്ഷ: ഹർജിക്കാരുടെ സുരക്ഷാ ചുമതല പ്രദേശത്തെ പോലീസിനായിരിക്കും.
വിഷയത്തിൽ വിശദമായ വാദം കേൾക്കുന്നതിനായി കേസ് ഏപ്രിൽ എട്ടിലേക്ക് മാറ്റിയിട്ടുണ്ട്. വ്യക്തിസ്വാതന്ത്ര്യവും സ്വകാര്യതയും ഉയർത്തിപ്പിടിക്കുന്ന കോടതിയുടെ ഈ നിരീക്ഷണം ഏറെ ചർച്ചകൾക്ക് വഴിവെച്ചിരിക്കുകയാണ്.
