പരിസ്ഥിതി സംരക്ഷണ സന്ദേശവുമായി ബാലസഭകൾ
കുടുംബശ്രീ എറണാകുളം ജില്ലാ മിഷന്റെ നേതൃത്വത്തിൽ 102 സി.ഡി.എസുകളിലെ ബാലസഭകളിൽ ‘നോ വെഹിക്കിൾ ഡേ ചലഞ്ച്’ സംഘടിപ്പിച്ചു. പരിസ്ഥിതി സംരക്ഷണ സന്ദേശവുമായി കുട്ടികളുടെ ബോധവത്കരണ പ്രവർത്തനങ്ങൾ.
വാഹനങ്ങൾക്ക് ബ്രേക്ക്, പ്രകൃതിക്ക് പച്ചക്കൊടി; എറണാകുളത്തെ ബാലസഭകളിൽ ‘നോ വെഹിക്കിൾ ഡേ’
എറണാകുളം: പരിസ്ഥിതി ബോധവും കാർബൺ പുറന്തള്ളൽ കുറയ്ക്കുന്ന ജീവിതശൈലിയും കുട്ടികളിൽ വളർത്തുക എന്ന ലക്ഷ്യത്തോടെ കുടുംബശ്രീ ജില്ലാ മിഷന്റെ മേൽനോട്ടത്തിൽ എറണാകുളം ജില്ലയിലെ ബാലസഭകളിൽ ‘നോ വെഹിക്കിൾ ഡേ ചലഞ്ച്’ സംഘടിപ്പിച്ചു. ജില്ലയിലെ 102 സി.ഡി.എസ് (CDS) പരിധിയിലെ ബാലസഭകളിലാണ് ഓഗസ്റ്റ് മാസത്തെ തീമാറ്റിക് പ്രവർത്തനങ്ങളുടെ ഭാഗമായി വ്യത്യസ്തമായ ഈ പരിപാടി നടന്നത്. രണ്ടുമുതൽ മൂന്ന് വാർഡുകൾ വരെ ഉൾപ്പെടുന്ന ക്ലസ്റ്റർ അടിസ്ഥാനത്തിലായിരുന്നു പ്രവർത്തനങ്ങൾ ഏകോപിപ്പിച്ചത്.
വാഹനങ്ങളുടെ അമിത ഉപയോഗം കുറയ്ക്കുക, അന്തരീക്ഷ മലിനീകരണം നിയന്ത്രിക്കുക, പ്രകൃതി സൗഹൃദ ജീവിതശൈലി ശീലമാക്കുക എന്നിവയാണ് ചലഞ്ചിലൂടെ ലക്ഷ്യമിട്ടത്. സ്വകാര്യ വാഹനങ്ങൾ ഒഴിവാക്കി നടന്നും സൈക്കിൾ ഉപയോഗിച്ചും പൊതുഗതാഗത സംവിധാനങ്ങൾ പ്രയോജനപ്പെടുത്തിയുമാണ് ബാലസഭാംഗങ്ങളായ കുട്ടികൾ ചലഞ്ചിൽ പങ്കാളികളായത്.
കുട്ടികളുടെ നേതൃത്വത്തിൽ നടന്ന സൈക്കിൾ റാലി, വാക്കത്തോൺ, പോസ്റ്റർ-പ്ലക്കാർഡ് പ്രചാരണം എന്നിവ ശ്രദ്ധേയമായി. വാഹന മലിനീകരണത്തിനെതിരെയും പ്രകൃതി സംരക്ഷണത്തിന്റെ പ്രാധാന്യത്തെക്കുറിച്ചും കുട്ടികൾ പൊതുജനങ്ങളിൽ അവബോധം സൃഷ്ടിച്ചു.
കുട്ടികളുടെ വീടുകളിലും വാഹന ഉപയോഗം കുറയ്ക്കാനുള്ള പ്രവർത്തനങ്ങൾ നടന്നു. ഓരോ വീടുകളിലും ഉപയോഗിക്കുന്ന വാഹനങ്ങളുടെ എണ്ണം രേഖപ്പെടുത്താനും, ഒരു ദിവസം കൊണ്ട് വാഹന ഉപയോഗം എത്രത്തോളം കുറയ്ക്കാനായെന്ന് വിലയിരുത്താനും പ്രത്യേക 'വെഹിക്കിൾ കാർഡ്' നൽകിയിരുന്നു. തുടർന്നുള്ള മാസങ്ങളിലും ഒരു ദിവസം 'വാഹനരഹിത ദിനമായി' ആചരിക്കാൻ കുടുംബങ്ങളെ പ്രേരിപ്പിക്കുക എന്നതും ഇതിന്റെ ലക്ഷ്യമാണ്. പരിപാടിയുടെ ഭാഗമായി ബാലസഭാംഗങ്ങൾ പരിസ്ഥിതി സംരക്ഷണ പ്രതിജ്ഞയും എടുത്തു.
അഞ്ചു മുതൽ 18 വയസ്സു വരെയുള്ള കുട്ടികളെ ഉൾപ്പെടുത്തി കുടുംബശ്രീ രൂപീകരിക്കുന്ന കുട്ടികളുടെ കൂട്ടായ്മയാണ് ബാലസഭ. അയൽക്കൂട്ടം, വാർഡ്, തദ്ദേശ സ്വയംഭരണ സ്ഥാപനം എന്നീ മൂന്ന് തലങ്ങളിലാണ് ഇവ പ്രവർത്തിക്കുന്നത്. കുട്ടികളിൽ സാമൂഹിക ബോധവും നേതൃത്വ പാടവവും വളർത്തുന്നതിനൊപ്പം പ്രകൃതിസ്നേഹം ശീലമാക്കാനും ഇത്തരം പ്രവർത്തനങ്ങൾ സഹായിക്കുമെന്ന് ജില്ലാ മിഷൻ ഭാരവാഹികൾ വ്യക്തമാക്കി.
പൾസ് പോളിയോ ദിനാചരണം എറണാകുളം ജില്ലയിൽ 1.61 ലക്ഷം കുട്ടികൾക്ക് തുള്ളിമരുന്ന് നൽകും
കുഞ്ഞുങ്ങൾക്കായുള്ള സൗജന്യ ചികിത്സാ കൂട്ടായ്മകൾ മാതൃകാപരം മുഖ്യമന്ത്രി വി ഡി സതീശൻ
കൊലക്കേസ് പ്രതിയെ കാപ്പ ചുമത്തി വിയ്യൂർ ജയിലിൽ അടച്ചു നടപടി ജാമ്യത്തിലിറങ്ങി വീണ്ടും കവർച്ച നടത്തിയതോടെ
പ്രതിസന്ധികൾ മറികടന്ന് കബഡിയിൽ സ്വർണം നേടി അട്ടപ്പാടിയിലെ പെൺപട
സൗന്ദര്യവർദ്ധക ക്രീം ഉപയോഗിച്ച 17 കാരിക്ക് വൃക്കരോഗം ബാലാവകാശ കമ്മിഷൻ സ്വമേധയാ കേസെടുത്തു
അംഗീകാരമില്ലാത്ത കളരിപ്പയറ്റ് ചാമ്പ്യൻഷിപ്പ് കായികതാരങ്ങൾ ശ്രദ്ധിക്കണം 
