പ്രഥമ ഉമ്മൻചാണ്ടി പുരസ്കാരം നേടിയ ചെറുവയൽ രാമനെ വസതിയിലെത്തി ആദരിച്ച് മന്ത്രി ടി. സിദ്ദീഖ്
കാർഷിക മേഖലയിലെ സമഗ്ര സംഭാവനയ്ക്കുള്ള സംസ്ഥാന സർക്കാറിന്റെ പ്രഥമ ഉമ്മൻചാണ്ടി പുരസ്കാര ജേതാവ് പത്മശ്രീ ചെറുവയൽ രാമനെ മന്ത്രി ടി. സിദ്ദീഖ് വീട്ടിലെത്തി സന്ദർശിച്ചു. ചിങ്ങം ഒന്നിന് എറണാകുളത്ത് നടക്കുന്ന ചടങ്ങിൽ മുഖ്യമന്ത്രി പുരസ്കാരം സമ്മാനിക്കും.
അനില എം കൃഷ്ണൻ 
പ്രഥമ ഉമ്മൻചാണ്ടി പുരസ്കാര ജേതാവ് ചെറുവയൽ രാമനെ വീട്ടിലെത്തി അഭിനന്ദിച്ച് മന്ത്രി ടി. സിദ്ദീഖ്
കൽപ്പറ്റ: കാർഷിക മേഖലയിലെ സമഗ്ര സംഭാവന മുൻനിർത്തി സംസ്ഥാന സർക്കാർ ഏർപ്പെടുത്തിയ പ്രഥമ ഉമ്മൻചാണ്ടി പുരസ്കാര ജേതാവായ പത്മശ്രീ ചെറുവയൽ രാമനെ കൃഷി വകുപ്പ് മന്ത്രി അഡ്വ. ടി. സിദ്ദീഖ് വസതിയിലെത്തി ആദരിച്ചു. മാനന്തവാടി കമ്മനയിലുള്ള അദ്ദേഹത്തിന്റെ വീട്ടിലെത്തിയാണ് മന്ത്രി അഭിനന്ദനം അറിയിക്കുകയും പുരസ്കാര വിതരണ ചടങ്ങിലേക്ക് കുടുംബസമേതം ക്ഷണിക്കുകയും ചെയ്തത്.
ചിങ്ങം ഒന്നിന് (ഓഗസ്റ്റ് 17) എറണാകുളത്ത് നടക്കുന്ന സംസ്ഥാനതല കർഷക ദിനാചരണ ചടങ്ങിൽ മുഖ്യമന്ത്രി വി.ഡി. സതീശൻ പുരസ്കാരം സമ്മാനിക്കും. അഞ്ച് ലക്ഷം രൂപയും ഫലകവും പ്രശസ്തിപത്രവും അടങ്ങുന്നതാണ് പുരസ്കാരം.
അതിജീവനത്തിനായി പോരാടുന്ന കർഷകന്റെ പ്രതീകമായ ചെറുവയൽ രാമന് ഈ പുരസ്കാരം ലഭിച്ചത് വയനാടിനും സംസ്ഥാനത്തിനും അഭിമാനകരമാണെന്ന് മന്ത്രി പറഞ്ഞു. അഡീഷണൽ ചീഫ് സെക്രട്ടറിയുടെ നേതൃത്വത്തിൽ, കൃഷി വകുപ്പ് സ്പെഷ്യൽ സെക്രട്ടറിയും കൃഷി ഡയറക്ടറും അംഗങ്ങളായ സമിതി ഐക്യകണ്ഠേനയാണ് അദ്ദേഹത്തെ തിരഞ്ഞെടുത്തത്. പ്രകൃതിയോടും കൃഷിയോടും തികച്ചും സ്വാഭാവികമായി താദാത്മ്യം പ്രാപിച്ച വ്യക്തിയാണ് അദ്ദേഹമെന്നും മന്ത്രി കൂട്ടിച്ചേർത്തു.
തനിക്ക് വ്യക്തിപരമായി ഏറെ പ്രിയപ്പെട്ട നേതാവായ ഉമ്മൻചാണ്ടിയുടെ പേരിലുള്ള പുരസ്കാരം ലഭിച്ചതിൽ അതിയായ സന്തോഷമുണ്ടെന്ന് പത്മശ്രീ ചെറുവയൽ രാമൻ പ്രതികരിച്ചു.
ഉഷാ വിജയൻ എം.എൽ.എ, മാനന്തവാടി ബ്ലോക്ക് പഞ്ചായത്ത് പ്രസിഡന്റ് മീനാക്ഷി രാമൻ, മറ്റ് ജനപ്രതിനിധികൾ, കൃഷി വകുപ്പ് ഉദ്യോഗസ്ഥർ തുടങ്ങിയവരും മന്ത്രിയോടൊപ്പം സന്ദർശനത്തിൽ പങ്കെടുത്തു.
