അവഗണനകൾക്കെതിരെ ഹൈന്ദവ ഗർജ്ജനം ഹിന്ദു അവകാശ സംരക്ഷണ യാത്ര മാർച്ച് 18 ന് ഓച്ചിറയിൽ നിന്ന് ആരംഭിക്കുന്നു
വിവിധ ഹൈന്ദവ സംഘടനകളുടെ നേതൃത്വത്തിൽ സംഘടിപ്പിക്കുന്ന ഹിന്ദു അവകാശ സംരക്ഷണ യാത്ര 2026 മാർച്ച് 18 ന് ഓച്ചിറ പരബ്രഹ്മ ക്ഷേത്രത്തിൽ നിന്ന് ആരംഭിക്കുന്നു. ക്ഷേമനിധി ബോർഡ് രൂപീകരണം ഉൾപ്പെടെ 24 ആവശ്യങ്ങൾ ഉന്നയിച്ചാണ് യാത്ര.
അനില എം കൃഷ്ണൻ 
ഓച്ചിറ: ഹൈന്ദവ സമൂഹം നേരിടുന്ന വിവിധ അവഗണനകൾക്കെതിരെയും അവകാശ സംരക്ഷണത്തിനുമായി വിവിധ ഹൈന്ദവ സംഘടനകളുടെ നേതൃത്വത്തിൽ 'ഹിന്ദു അവകാശ സംരക്ഷണ യാത്ര' സംഘടിപ്പിക്കുന്നു. 2026 മാർച്ച് 18-ാം തീയതി രാവിലെ 7.30-ന് ഓച്ചിറ പരബ്രഹ്മ ക്ഷേത്ര സന്നിധിയിൽ നിന്ന് യാത്ര ആരംഭിക്കും. 19-ാം തീയതി ഉച്ചയ്ക്ക് 12 മണിക്ക് തിരുവനന്തപുരം സെക്രട്ടറിയേറ്റിന് മുന്നിൽ യാത്ര സമാപിക്കും.
ആദ്ധ്യാത്മികം, രാഷ്ട്രീയം, വിദ്യാഭ്യാസം, സംസ്കാരം തുടങ്ങിയ സമസ്ത മേഖലകളിലും ഹൈന്ദവ സമൂഹം നേരിടുന്ന അവഗണനകൾക്കെതിരെ പ്രതികരിക്കുക എന്നതാണ് യാത്രയുടെ ലക്ഷ്യം. ഭൂരിപക്ഷ സമൂഹമെന്ന നിലയിൽ ലഭിക്കേണ്ട ആനുകൂല്യങ്ങൾ നിഷേധിക്കപ്പെടുന്നുവെന്നും മതേതരത്വത്തിന്റെ മറവിൽ സനാതന ധർമ്മ വിരുദ്ധ പ്രവർത്തനങ്ങൾ ശക്തമാകുന്നുവെന്നും സംഘാടകർ വാർത്താക്കുറിപ്പിൽ അറിയിച്ചു.
പ്രധാന ആവശ്യങ്ങൾ:
യാത്രയുടെ ഭാഗമായി 24 ഇന അവകാശ പത്രിക സർക്കാരിന് സമർപ്പിക്കും. അതിൽ പ്രധാനപ്പെട്ടവ താഴെ പറയുന്നവയാണ്:
ഹൈന്ദവ ആദ്ധ്യാത്മിക ക്ഷേമനിധി ബോർഡ് രൂപീകരിക്കുക.
ക്ഷേത്ര ഭരണ സമിതികളിൽ സജീവ രാഷ്ട്രീയ പ്രവർത്തകർ വരുന്നത് തടയുന്ന നിയമം നടപ്പാക്കുക.
കേരളത്തിലെ മതം തിരിച്ചുള്ള ജനസംഖ്യാ കണക്ക് പുറത്തുവിടുക.
ക്ഷേത്രഭൂമികളിലെ അനധികൃത കയ്യേറ്റം ഒഴിപ്പിക്കുക.
ദേവസ്വം ബോർഡ് വരുമാനത്തിന്റെ 25 ശതമാനം പാവപ്പെട്ട ഹൈന്ദവരുടെ ക്ഷേമത്തിനായി വിനിയോഗിക്കുക.
നിർബന്ധിത മതപരിവർത്തന നിരോധന നിയമം നടപ്പാക്കുക.
ശ്രീനാരായണ ഗുരുദേവന്റെ 'ജാതിഭേദം മതദ്വേഷം...' എന്ന വചനം എല്ലാ പൊതുസ്ഥാപനങ്ങളിലും പ്രദർശിപ്പിക്കുക.
സംസ്കൃത പഠനം സ്കൂളുകളിൽ നിർബന്ധമാക്കുക.
യാത്രയുടെ വഴി:
മാർച്ച് 18-ന് ഓച്ചിറയിൽ നിന്ന് ആരംഭിച്ച് കരുനാഗപ്പള്ളി, ചവറ, കൊല്ലം, കൊട്ടാരക്കര, പുനലൂർ, അഞ്ചൽ, കിളിമാനൂർ വഴി വെഞ്ഞാറമ്മൂട് പിന്നിട്ട് പോത്തൻകോട് ഒന്നാം ദിവസത്തെ പര്യടനം അവസാനിക്കും. 19-ാം തീയതി രാവിലെ പോത്തൻകോട് നിന്ന് ആരംഭിച്ച് ചെമ്പഴന്തി, ശ്രീകാര്യം, പത്മനാഭസ്വാമി ക്ഷേത്രം വഴി ഉച്ചയ്ക്ക് 12 മണിക്ക് സെക്രട്ടറിയേറ്റിന് മുന്നിൽ സമാപിക്കും. തുടർന്ന് മുഖ്യമന്ത്രി ഉൾപ്പെടെയുള്ളവർക്ക് നിവേദനം നൽകും.
സംസ്ഥാന സന്യാസി സഭ രക്ഷാധികാരി വിശ്വബ്രഹ്മ ശങ്കരാചാര്യ പീഠാധീശ്വർ ദണ്ഡിസ്വാമി സാധു കൃഷ്ണാനന്ദ സരസ്വതി മഹാരാജാണ് മുഖ്യ രക്ഷാധികാരി. ഹിന്ദു അവകാശ സംരക്ഷണ യാത്ര നയിക്കുന്നത് യജ്ഞാചാര്യൻ ബ്രഹ്മശ്രീ: മാത്ര സുന്ദരേശനാണ്. ഹരിദാസ് എറണാകുളം (പ്രസിഡന്റ്), സിദ്ധൻ കല്ലുംപുറം (ജനറൽ കൺവീനർ) CP സുഗതൻ ഹിന്ദു പാർലമെൻ്റ് ജനറൽ സെക്രട്ടറി, ശ്രീജേഷ് കുമാർ യാത്രാ കൺവീനർ എന്നിവരാണ് മറ്റു ഭാരവാഹികൾ. സനാതന ധർമ്മ സംരക്ഷണ സമിതിയുടെയും ഹിന്ദു സേവാ സംഘത്തിന്റെയും പൂർണ്ണ പിന്തുണയോടെയാണ് യാത്ര സംഘടിപ്പിക്കുന്നത്
