നാളികേര മേഖലയിൽ വിപ്ലവകരമായ മാറ്റത്തിനൊരുങ്ങി രാജ്യം ദേശീയ സമ്മേളനം കൊച്ചിയിൽ ഉദ്ഘാടനം ചെയ്തു
നാളികേര വികസന ബോർഡിന്റെ നേതൃത്വത്തിൽ കൊച്ചിയിൽ ദേശീയ ഭക്ഷ്യ നിയന്ത്രണ വിശകലന സമ്മേളനം (RAFAC 2026) ആരംഭിച്ചു. ഗുണനിലവാര പരിശോധനയും കയറ്റുമതി സാധ്യതകളും ചർച്ചയാകും.
അനില എം കൃഷ്ണൻ 
ഭക്ഷ്യ വിശകലന മേഖലയിലെ നൂതന പ്രവണതകൾ; കൊച്ചിയിൽ ദേശീയ സമ്മേളനം (RAFAC 2026) ആരംഭിച്ചു
കൊച്ചി: നാളികേര വികസന ബോർഡിന്റെ ആഭിമുഖ്യത്തിൽ ഭക്ഷ്യ നിയന്ത്രണ വിശകലന മേഖലയിലെ ആധുനിക പ്രവണതകളെക്കുറിച്ച് ചർച്ച ചെയ്യുന്നതിനായി സംഘടിപ്പിച്ച ദ്വിദിന ദേശീയ സമ്മേളനം (RAFAC 2026) കൊച്ചിയിൽ തുടക്കമായി. ഇടപ്പള്ളി മാരിയറ്റ് ഹോട്ടലിൽ നടന്ന ചടങ്ങിൽ പ്രമുഖ ഗവേഷണ സ്ഥാപനങ്ങളുടെ മേധാവികൾ ചേർന്ന് സമ്മേളനം ഉദ്ഘാടനം ചെയ്തു.
നാഷണൽ ഇൻസ്റ്റിറ്റ്യൂട്ട് ഫോർ ഇന്റർഡിസിപ്ലിനറി സയൻസ് ആൻഡ് ടെക്നോളജി (NIIST) ഡയറക്ടർ ഡോ. സി. അനന്തരാമകൃഷ്ണൻ, സെൻട്രൽ ഫുഡ് ടെക്നോളജിക്കൽ റിസർച്ച് ഇൻസ്റ്റിറ്റ്യൂട്ട് (CFTRI) ഡയറക്ടർ ഡോ. ശ്രീദേവി സിംഗ്, സെൻട്രൽ ഇൻസ്റ്റിറ്റ്യൂട്ട് ഓഫ് ഫിഷറീസ് ടെക്നോളജി (CIFT) ഡയറക്ടർ ഡോ. ജോർജ് നൈനാൻ എന്നിവർ ചേർന്നാണ് ദീപം തെളിയിച്ചത്.
നാളികേര ഉൽപ്പന്നങ്ങളുടെ ഗുണനിലവാരം രാജ്യാന്തര നിലവാരത്തിലേക്ക് ഉയർത്തുക, വിപണിയിൽ വിശ്വാസ്യത ഉറപ്പാക്കുക എന്നിവയാണ് സമ്മേളനത്തിന്റെ പ്രധാന ലക്ഷ്യങ്ങൾ. ഇതിനായി ആധുനിക വിശകലന സാങ്കേതികവിദ്യകളും മൂല്യവർദ്ധിത ഉൽപ്പന്നങ്ങളും പ്രയോജനപ്പെടുത്തണമെന്ന് വിദഗ്ധർ ചൂണ്ടിക്കാട്ടി. കൃത്യമായ ഗുണനിലവാര പരിശോധനകൾ ആഭ്യന്തര വിപണിയിലും കയറ്റുമതി മേഖലയിലും ഇന്ത്യൻ നാളികേര ഉൽപ്പന്നങ്ങൾക്ക് വലിയ സ്വീകാര്യത നൽകുമെന്ന് ഉദ്ഘാടന പ്രസംഗത്തിൽ അവർ വ്യക്തമാക്കി.
ഭക്ഷ്യ വിശകലന മേഖലയിലെ പുതിയ മുന്നേറ്റങ്ങളെക്കുറിച്ചുള്ള 'ഹാൻഡ് ബുക്ക്' ചടങ്ങിൽ പ്രകാശനം ചെയ്തു. ശാസ്ത്രജ്ഞർ, ഗവേഷകർ, കർഷകർ, വ്യവസായ പ്രതിനിധികൾ എന്നിവർ പങ്കെടുക്കുന്ന ഈ രണ്ട് ദിവസത്തെ സമ്മേളനം നാളികേര മേഖലയിലെ പുതിയ ഗവേഷണങ്ങൾക്കും വ്യവസായ സഹകരണങ്ങൾക്കും വലിയ മുതൽക്കൂട്ടാകും.
