പീലിങ് ഷെഡ് പരിശോധന ഉടമകളുടെ സാന്നിധ്യത്തിൽ വേണംഷാനിമോൾ ഉസ്മാൻ

പീലിങ് ഷെഡ് പരിശോധന ഉടമകളുടെ സാന്നിധ്യത്തിൽ വേണം: ഡെ. സ്പീക്കർ ഷാനിമോൾ ഉസ്മാൻ

​അരൂർ: ഭക്ഷ്യസംസ്‌കരണ പ്ലാന്റുകളിലും പീലിങ് ഷെഡുകളിലും മലിനീകരണ നിയന്ത്രണ ബോർഡ് നടത്തുന്ന പരിശോധനകൾ ഉടമകളുടെ സാന്നിധ്യത്തിൽ മാത്രമായിരിക്കണമെന്ന് ഡെപ്യൂട്ടി സ്പീക്കർ ഷാനിമോൾ ഉസ്മാൻ നിർദേശിച്ചു. അരൂർ മണ്ഡലത്തിലെ ഭക്ഷ്യസംസ്കരണ മേഖല നേരിടുന്ന വിവിധ പ്രശ്നങ്ങൾ ചർച്ച ചെയ്യാൻ ജില്ലാ കളക്ടറുടെ ചേംബറിൽ വിളിച്ചുകൂട്ടിയ ഉന്നതതല യോഗത്തിലാണ് അവർ ഇക്കാര്യം വ്യക്തമാക്കിയത്.

​ആയിരക്കണക്കിന് സ്ത്രീ തൊഴിലാളികൾ ഉൾപ്പെടെയുള്ളവരുടെ പ്രധാന വരുമാനമാർഗ്ഗമായ മത്സ്യസംസ്കരണ മേഖലയെ സംരക്ഷിക്കാൻ സർക്കാർ ആവശ്യമായ എല്ലാ നടപടികളും സ്വീകരിക്കുമെന്ന് ഡെപ്യൂട്ടി സ്പീക്കർ വ്യക്തമാക്കി. ലൈസൻസ് ലഭിക്കുന്നതുമായി ബന്ധപ്പെട്ട പീലിങ് ഷെഡ് ഉടമകളുടെ ബുദ്ധിമുട്ടുകൾ പരിഹരിക്കാൻ തദ്ദേശസ്വയംഭരണ സ്ഥാപന സെക്രട്ടറിമാരുടെ അടിയന്തര യോഗം വിളിച്ചു ചേർക്കും. ചെറുകിട പീലിങ് ഷെഡുകളിലെ മലിനജലം ശാസ്ത്രീയമായി സംസ്കരിക്കുന്നതിന് സോക്പിറ്റ് അടക്കമുള്ള സംവിധാനങ്ങൾ ഒരുക്കാൻ മലിനീകരണ നിയന്ത്രണ ബോർഡ് ഉദ്യോഗസ്ഥർ സാങ്കേതിക സഹായം നൽകണമെന്നും അവർ നിർദേശിച്ചു.

​ചെമ്മീന്റെ ലഭ്യതക്കുറവ് ഉൾപ്പെടെയുള്ള പ്രതിസന്ധികളും യോഗത്തിൽ ചർച്ചയായി. സംരംഭകർ ലൈസൻസിനായി സമീപിക്കുമ്പോൾ ഉദ്യോഗസ്ഥർ നിയമങ്ങൾക്കുള്ളിൽ നിന്ന് അനുഭാവപൂർണ്ണമായ നിലപാട് സ്വീകരിക്കണമെന്ന് ജില്ലാ കളക്ടർ ഷാജി വി. നായർ നിർദേശിച്ചു. യോഗത്തിൽ ഡെപ്യൂട്ടി കളക്ടർ എസ്. ബിജു, എൽ.എസ്.ജി.ഡി എഡി സന്തോഷ് മാത്യു, വിവിധ വകുപ്പ് ഉദ്യോഗസ്ഥർ, പീലിങ് ഷെഡ് ഉടമകൾ, കയറ്റുമതിക്കാരുടെ സംഘടന പ്രതിനിധികൾ തുടങ്ങിയവർ പങ്കെടുത്തു.