നാളെ മുതൽ മിൽമ പാൽ വില കൂടും തൈരിനും വിലയേറും പുതുക്കിയ നിരക്കുകൾ ഇങ്ങനെ
കേരളത്തിൽ നാളെ മുതൽ മിൽമ പാലിനും തൈരിനും വില വർധിക്കും. പാലിന് ലീറ്ററിന് 4 രൂപയും തൈരിന് കിലോയ്ക്ക് 10 രൂപയുമാണ് കൂടുന്നത്. പുതുക്കിയ വിലവിവരങ്ങൾ അറിയാം.
Angel Varghese 
സംസ്ഥാനത്ത് നാളെ മുതൽ മിൽമ പാൽ വില കൂടും; തൈരിന് കിലോയ്ക്ക് 10 രൂപ വർധിക്കും
തിരുവനന്തപുരം: സംസ്ഥാനത്ത് പുതുക്കിയ മിൽമ പാൽ വില നാളെ മുതൽ പ്രാബല്യത്തിൽ വരും. പാൽ ലീറ്ററിന് 4 രൂപയാണ് വർധിക്കുന്നത്. തൈരിന് കിലോയ്ക്ക് 10 രൂപയുടെ വർധനവുണ്ടാകും. വരുംദിവസങ്ങളിൽ മറ്റ് മിൽമ പാൽ ഉൽപന്നങ്ങൾക്കും ആനുപാതികമായി വില കൂട്ടാനാണ് നീക്കം.
നിലവിൽ പാൽ കവറുകളിൽ പഴയ വില തന്നെയാണ് രേഖപ്പെടുത്തിയിട്ടുള്ളത്. പുതിയ വില പ്രിന്റ് ചെയ്യുന്നതിനുള്ള നടപടികൾ പുരോഗമിക്കുകയാണെന്നും ഇത് പൂർത്തിയാകാൻ ഒരു മാസം വരെ സമയമെടുക്കുമെന്നും മിൽമ അധികൃതർ അറിയിച്ചു. കവറുകളിൽ പഴയ വിലയാണെങ്കിലും നാളെ മുതൽ പുതുക്കിയ നിരക്കായിരിക്കും ഈടാക്കുക.
വർധനവിന്റെ 83.75 ശതമാനവും കർഷകർക്ക്
ക്ഷീരകർഷകരുടെ ഉൽപാദനച്ചെലവ് ക്രമാതീതമായി വർധിച്ച സാഹചര്യത്തിലാണ് വില കൂട്ടാൻ തീരുമാനിച്ചതെന്ന് മിൽമ വ്യക്തമാക്കി. ലീറ്ററിന് 4 രൂപ കൂട്ടുമ്പോൾ, ഈ തുകയുടെ 83.75 ശതമാനവും (അതായത് 3.35 രൂപ) കർഷകർക്ക് നേരിട്ട് ലഭിക്കും. എന്നാൽ നിലവിലെ പ്രതിസന്ധി മറികടക്കാൻ ഈ തുക അപര്യാപ്തമാണെന്നാണ് ക്ഷീരകർഷകരുടെ വാദം. ഇതിനുമുമ്പ് 2022 ഡിസംബർ ഒന്നിനായിരുന്നു മിൽമ അവസാനമായി വില വർധിപ്പിച്ചത്. അന്ന് ലീറ്ററിന് 6 രൂപയാണ് കൂട്ടിയത്.
പുതുക്കിയ വിലവിവരങ്ങൾ
(പുതുക്കിയ വില, ബ്രാക്കറ്റിൽ പഴയ വില എന്ന ക്രമത്തിൽ)
പാൽ ഇനങ്ങൾ:
ഡബിൾ ടോൺഡ് മിൽക് (മിൽമ സ്മാർട് - മഞ്ഞ കവർ) – 500 മില്ലി: ₹27 (₹25)
ഹോമോജനൈസ്ഡ് ടോൺഡ് മിൽക് (നീല കവർ) – 525 മില്ലി: ₹30 (₹28)
മിൽമ പ്രൈഡ് (ഹോമോജനൈസ്ഡ് - ഓറഞ്ച് കവർ) – 500 മില്ലി: ₹30 (₹28)
മിൽമ റിച്ച് സ്റ്റാൻഡേഡൈസ്ഡ് മിൽക് (പച്ച കവർ) – 500 മില്ലി: ₹32 (₹29)
കൗ മിൽക് (1 ലീറ്റർ ബോട്ടിൽ): ₹75 (₹70)
തൈര് ഇനങ്ങൾ:
ക്ലാസിക് തൈര് – 525 ഗ്രാം: ₹40 (₹35)
എലൈറ്റ് തൈര് – 500 ഗ്രാം: ₹45 (₹40)
