വേനൽക്കാലത്ത് വളർത്തുമൃഗങ്ങൾക്ക് പ്രത്യേക കരുതൽ വേണം മൃഗസംരക്ഷണ വകുപ്പിന്റെ നിർദ്ദേശങ്ങൾ
കടുത്ത വേനലിൽ വളർത്തുമൃഗങ്ങളുടെ ആരോഗ്യവും ഉൽപാദനക്ഷമതയും സംരക്ഷിക്കാൻ പാലിക്കേണ്ട പ്രധാന നിർദ്ദേശങ്ങളുമായി മൃഗസംരക്ഷണ വകുപ്പ്.
അനില എം കൃഷ്ണൻ 
വേനൽച്ചൂടിൽ വാടി വളർത്തുമൃഗങ്ങൾ; കരുതൽ വേണമെന്ന് മൃഗസംരക്ഷണ വകുപ്പ്
തിരുവനന്തപുരം: സംസ്ഥാനത്ത് കടുത്ത വേനൽ തുടരുന്ന സാഹചര്യത്തിൽ വളർത്തുമൃഗങ്ങളുടെ ആരോഗ്യകാര്യത്തിൽ പ്രത്യേക ശ്രദ്ധ വേണമെന്ന് മൃഗസംരക്ഷണ വകുപ്പ്. അമിതമായ ചൂട് മൃഗങ്ങളിൽ താപസമ്മർദത്തിനും (Heat Stress) ഉൽപാദനക്ഷമത കുറയുന്നതിനും കാരണമാകും. ഇത് പ്രതിരോധിക്കാൻ കർഷകർ ശാസ്ത്രീയമായ മുൻകരുതലുകൾ സ്വീകരിക്കണമെന്ന് അധികൃതർ അറിയിച്ചു.
ദാഹമകറ്റാൻ ശുദ്ധജലം; തൊഴുത്തിൽ തണുപ്പ്
കറവപ്പശുക്കൾക്ക് പ്രതിദിനം 100 മുതൽ 150 ലിറ്റർ വരെ ശുദ്ധജലം ലഭ്യമാക്കണം. ജലസംഭരണികളും പൈപ്പുകളും ചൂടാകാതിരിക്കാൻ വെള്ള പെയിന്റ് അടിക്കുകയോ ഇൻസുലേഷൻ നൽകുകയോ ചെയ്യണം. ചൂട് മൂലം നഷ്ടപ്പെടുന്ന ലവണങ്ങൾ വീണ്ടെടുക്കാൻ കുടിവെള്ളത്തിൽ ഇലക്ട്രോലൈറ്റുകൾ ചേർക്കാവുന്നതാണ്. തൊഴുത്തുകളിൽ ഫാനുകളോ മിസ്റ്റ് സംവിധാനങ്ങളോ ഏർപ്പെടുത്തുന്നതും മേൽക്കൂരയിൽ വൈക്കോലോ തെങ്ങോലയോ വിരിക്കുന്നതും അന്തരീക്ഷ താപനില കുറയ്ക്കാൻ സഹായിക്കും.
ഭക്ഷണക്രമത്തിലും മാറ്റം വേണം
ദഹനത്തിന് കൂടുതൽ സമയമെടുക്കുന്ന വൈക്കോൽ രാത്രികാലങ്ങളിൽ മാത്രം നൽകുക. പകൽ സമയത്ത് പച്ചപ്പുല്ലും അസോളയും നൽകുന്നത് ഗുണകരമാണ്. മൊത്തം തീറ്റയുടെ 70 ശതമാനവും അന്തരീക്ഷം തണുപ്പുള്ള പുലർച്ചെയോ വൈകുന്നേരമോ നൽകാൻ ശ്രദ്ധിക്കണം.
സൂര്യാഘാതം തിരിച്ചറിയാം
ശരീരതാപനില ഉയരുക, കഠിനമായ കിതപ്പ്, ഉമിനീർ ഒലിക്കുക, പെട്ടെന്നുണ്ടാകുന്ന തളർച്ച എന്നിവയാണ് പ്രധാന ലക്ഷണങ്ങൾ. സൂര്യാഘാതമേറ്റാൽ മൃഗത്തിന്റെ ശരീരത്തിൽ പച്ചവെള്ളം ഒഴിക്കുകയും അടിയന്തരമായി വെറ്ററിനറി ഡോക്ടറുടെ സേവനം തേടുകയും വേണം.
നിർദ്ദേശങ്ങൾ പാലിക്കാം, മിണ്ടാപ്രാണികളെ വേനൽച്ചൂടിൽ നിന്നും സംരക്ഷിക്കാം.
