കേരളത്തെ ഇളക്കിമറിച്ച് ഇ.ഡി റെയ്ഡ്; പിണറായിയുടെയും റിയാസിന്റെയും വസതികളിൽ പരിശോധന രാഷ്ട്രീയ വേട്ടയാടലെന്ന് സിപിഎം
മുൻ മുഖ്യമന്ത്രി പിണറായി വിജയൻ, മന്ത്രി മുഹമ്മദ് റിയാസ് എന്നിവരുടെ വീടുകൾ ഉൾപ്പെടെ 12 ഇടങ്ങളിൽ ഇഡി റെയ്ഡ്. രാഷ്ട്രീയ വേട്ടയാടലെന്ന് കെ.കെ ശൈലജ
Angel Varghese 
പിണറായി വിജയന്റെയും മുഹമ്മദ് റിയാസിന്റെയും വസതികളിൽ ഇ.ഡി റെയ്ഡ്; സംഘപരിവാറിന് മുന്നിൽ കുമ്പിടില്ലെന്ന് മുഹമ്മദ് റിയാസ്
തിരുവനന്തപുരം: മുൻ മുഖ്യമന്ത്രി പിണറായി വിജയൻ, മുൻ മന്ത്രി പി.എ. മുഹമ്മദ് റിയാസ് എന്നിവരുടെ വീടുകൾ ഉൾപ്പെടെ സംസ്ഥാനത്തെ പന്ത്രണ്ടിടങ്ങളിൽ എൻഫോഴ്സ്മെന്റ് ഡയറക്ടറേറ്റ് (ഇ.ഡി) റെയ്ഡ്. തിരുവനന്തപുരം ബേക്കറി ജങ്ഷനിലുള്ള പിണറായി വിജയന്റെ വാടകവീട്ടിലും കണ്ണൂരിലെ സ്വന്തം വീട്ടിലും, മുഹമ്മദ് റിയാസിന്റെ കോഴിക്കോട് കോട്ടൂളിയിലെ വീട്ടിലുമാണ് ഒരേസമയം പരിശോധന നടക്കുന്നത്. റെയ്ഡ് നടക്കുമ്പോൾ പിണറായി വിജയനും മകൾ വീണാ വിജയനും തിരുവനന്തപുരത്തെ വസതിയിലുണ്ട്. ഇവർക്ക് പുറമെ വിവാദ കരിമണൽ കമ്പനിയായ സി.എം.ആർ.എൽ (CMRL) എം.ഡി ശശിധരൻ കർത്തായുടെ വീട്ടിലും ഇ.ഡി സംഘം പരിശോധന നടത്തുന്നുണ്ട്.
അവസാന ശ്വാസം വരെ പോരാടും: മുഹമ്മദ് റിയാസ്
റെയ്ഡ് പുരോഗമിക്കുന്നതിനിടെ ശക്തമായ രാഷ്ട്രീയ പ്രതികരണവുമായി പി.എ. മുഹമ്മദ് റിയാസ് രംഗത്തെത്തി. "വളഞ്ഞിട്ടടിച്ചോളൂ.....പക്ഷേ സംഘപരിവാറിനു മുൻപിൽ കുമ്പിടില്ല. അവസാന ശ്വാസം വരെയും പോരാടും," എന്ന് റിയാസ് ഫേസ്ബുക്കിൽ കുറിച്ചു. സംഘപരിവാർ രാഷ്ട്രീയത്തോട് വിട്ടുവീഴ്ചയില്ലാത്ത പോരാട്ടം തുടരുമെന്ന പ്രഖ്യാപനമാണ് അദ്ദേഹം നടത്തിയത്.
റെയ്ഡ് രാഷ്ട്രീയപ്രേരിതം; ബിജെപി-കോൺഗ്രസ് ഒത്തുകളിയെന്ന് സിപിഐഎം
മുഖ്യമന്ത്രിയുടെ വസതിയിലെ ഇ.ഡി റെയ്ഡിനെ സിപിഐഎം നേതൃത്വം ശക്തമായി അപലപിച്ചു. ഇത് പ്രതിപക്ഷ നേതാക്കളെ ലക്ഷ്യമിട്ടുള്ള ബിജെപിയുടെ രാഷ്ട്രീയ ആക്രമണമാണെന്ന് സിപിഐഎം കേന്ദ്ര കമ്മിറ്റി അംഗം പി.കെ. ശ്രീമതി ആരോപിച്ചു. ഇത്തരം നടപടികൾ കൊണ്ട് പിണറായി വിജയനെയോ സിപിഐഎമ്മിനെയോ ഭയപ്പെടുത്താൻ കഴിയില്ലെന്ന് വ്യക്തമാക്കിയ അവർ, ഈ റെയ്ഡിൽ സംസ്ഥാനത്തെ യുഡിഎഫ് സർക്കാരിന് പങ്കുണ്ടോ എന്ന് ചോദിക്കുകയും ചെയ്തു.
ഇ.ഡി റെയ്ഡ് പൂർണ്ണമായും രാഷ്ട്രീയപ്രേരിതമാണെന്ന് മുൻ മന്ത്രി കെ.കെ. ശൈലജയും പ്രതികരിച്ചു. ഇത്തരം റെയ്ഡുകൾ വഴി സിപിഐഎമ്മിനെ ഇല്ലാതാക്കാമെന്ന് ആരും കരുതേണ്ടെന്നും കോൺഗ്രസിന്റെയും ബിജെപിയുടെയും ഒത്തുകളി ജനങ്ങൾ തിരിച്ചറിയുമെന്നും അവർ പറഞ്ഞു. പിണറായി വിജയനും കുടുംബത്തിനുമെതിരെ നടക്കുന്ന ഗൂഢാലോചനയാണിതെന്നും ശൈലജ ഫേസ്ബുക്ക് പോസ്റ്റിൽ കൂട്ടിച്ചേർത്തു.
കേസിന് ആസ്പദമായ പശ്ചാത്തലം
2019 ജനുവരിയിൽ ആദായനികുതി വകുപ്പ് സി.എം.ആർ.എൽ കമ്പനിയിൽ നടത്തിയ പരിശോധനയിൽ 132.82 കോടി രൂപയുടെ സാമ്പത്തിക ക്രമക്കേടുകൾ കണ്ടെത്തിയിരുന്നു. കമ്പനി ചെലവുകൾ പെരുപ്പിച്ചു കാട്ടിയായിരുന്നു ഈ വെട്ടിപ്പ്. ഈ തുകയിൽ 1.72 കോടി രൂപ പിണറായി വിജയന്റെ മകൾ വീണാ വിജയന്റെ ഐടി കമ്പനിക്ക് സേവനം നൽകാതെ കൈമാറി എന്ന ആരോപണമാണ് നിലവിലെ ഇ.ഡി അന്വേഷണത്തിലേക്ക് നയിച്ചിരിക്കുന്നത്.
