സിനിമാ ലോകത്തേക്ക് തേജാലക്ഷ്മി പ്രിയതമൻ ചിത്രീകരണം ചവറയിൽ ആരംഭിച്ചു

മനോജ് കെ. ജയൻ- ഉർവ്വശി ദമ്പതികളുടെ മകൾ തേജാലക്ഷ്മി സിനിമയിലേക്ക്; 'പ്രിയതമൻ' ചിത്രീകരണം ചവറയിൽ ആരംഭിച്ചു

കരുനാഗപ്പള്ളി: പ്രശസ്ത സിനിമാ താരങ്ങളായ മനോജ് കെ. ജയൻ-ഉർവ്വശി ദമ്പതിമാരുടെ മകൾ തേജാലക്ഷ്മി (കുഞ്ഞാറ്റ) ആദ്യമായി ക്യാമറയ്ക്ക് മുന്നിലെത്തുന്നു. ശ്രീനാഥ് ഭാസി നായകനാകുന്ന പുതിയ ചിത്രം 'പ്രിയതമൻ' ലൊക്കേഷനിലാണ് തേജാലക്ഷ്മിയുടെ അരങ്ങേറ്റം.

​ഉർവ്വശിയുടെ സ്വന്തം നാടായ കരുനാഗപ്പള്ളിക്കടുത്ത് ചവറ തെക്കുംഭാഗം സെന്റ് ജോസഫ് പള്ളിയുടെ അങ്കണത്തിൽ നടന്ന ചടങ്ങിൽ സെന്റ് ജോസഫ് പള്ളിവികാരി ഫാദർ ജോർജ് സെബാസ്റ്റ്യൻ ആദ്യ ഭദ്രദീപം തെളിയിച്ചതോടെയാണ് ചിത്രീകരണത്തിന് തുടക്കമായത്. പിതാവ് മനോജ് കെ. ജയനൊപ്പമാണ് തേജാലക്ഷ്മി സെറ്റിലെത്തിയത്.

​'സുഖമായിരിക്കട്ടെ' എന്ന ശ്രദ്ധേയ ചിത്രത്തിന് ശേഷം റെജി പ്രഭാകർ സംവിധാനം ചെയ്യുന്ന 'പ്രിയതമൻ' ഒരിടത്തരം പട്ടണത്തിന്റെ പശ്ചാത്തലത്തിൽ ഒരുങ്ങുന്ന ഒരു ഹ്യൂമർ ഫാമിലി ചിത്രമാണ്. അമ്മയുടെയും മകന്റെയും ജീവിതത്തിലേക്ക് എം.ബി.എ ബിരുദധാരിയായ ഒരു പെൺകുട്ടി കടന്നുവരുന്നതും തുടർന്നുണ്ടാകുന്ന രസകരമായ സംഭവങ്ങളുമാണ് ചിത്രം പറയുന്നത്. ചിത്രത്തിൽ 'വിശ്വാസ്' ആയി ശ്രീനാഥ് ഭാസിയും 'പ്രിയ' ആയി തേജാലക്ഷ്മിയും വേഷമിടുന്നു.

​ശ്രേയാനിധി ക്രിയേഷൻസിന്റെ ബാനറിൽ സുനിൽകുമാർ എസ്, മുനീർ അറക്കൽ എന്നിവർ ചേർന്നാണ് ചിത്രം നിർമ്മിക്കുന്നത്. നിരവധി പ്രശസ്ത സിനിമകൾക്ക് രചന നിർവ്വഹിച്ച കൃഷ്ണ പൂജപ്പുരയാണ് ഈ ചിത്രത്തിന്റെ തിരക്കഥ ഒരുക്കിയിരിക്കുന്നത്. സനു ഭാസ്കറിന്റേതാണ് കഥ.

​ശ്രീനാഥ് ഭാസിക്കും തേജാലക്ഷ്മിക്കും പുറമെ പത്മരാജ് രതീഷ്, സുധീർ കരമന, സുനിൽ സുഖദ, വിദ്യാ വിശ്വനാഥ്, ശാന്തി കൃഷ്ണ, ഇർഷാദ്, മീരാ നായർ, പി.പി. കുഞ്ഞികൃഷ്ണൻ മാഷ്, മഞ്ജു പത്രോസ്, ദിനേശ് പണിക്കർ തുടങ്ങി വൻ താരനിര തന്നെ ചിത്രത്തിൽ അണിനിരക്കുന്നുണ്ട്.

​റഫീഖ് അഹമ്മദ്, മനു മഞ്ജിത്ത് എന്നിവരുടെ വരികൾക്ക് രമേഷ് നാരായൺ, ബിജിപാൽ, റോണി റാഫേൽ എന്നിവർ സംഗീതം പകരുന്നു. ഛായാഗ്രഹണം: പ്രദീപ് നായർ, എഡിറ്റിംഗ്: സിയാൻ ശ്രീകാന്ത്. കരുനാഗപ്പള്ളിയിലും പരിസര പ്രദേശങ്ങളിലുമായി വാഗമണ്ണിലുമായി ചിത്രത്തിന്റെ പകർപ്പുകൾ പൂർത്തിയാകും.