പാങ്ങോട് സൈനിക ക്യാമ്പിൽ ആനക്കൊമ്പ് മോഷണം
തിരുവനന്തപുരം പാങ്ങോട് സൈനിക ക്യാമ്പിൽ നിന്ന് രണ്ട് കോടി രൂപയുടെ ആനക്കൊമ്പ് മോഷ്ടിച്ചു. ഡിജെ പാർട്ടിക്ക് എത്തിയ സംഘത്തെ പോലീസ് ചോദ്യം ചെയ്തു.
Angel Varghese 
തിരുവനന്തപുരം പാങ്ങോട് സൈനിക ക്യാമ്പിൽ മോഷണം: രണ്ട് കോടി വിലമതിക്കുന്ന ആനക്കൊമ്പുകൾ കവർന്നു
തിരുവനന്തപുരം: അതീവ സുരക്ഷാ മേഖലയായ പാങ്ങോട് സൈനിക ക്യാമ്പിൽ നിന്ന് രണ്ട് കോടി രൂപ വിലമതിക്കുന്ന ആനക്കൊമ്പുകൾ മോഷ്ടിക്കപ്പെട്ടു. ക്യാമ്പിൽ നടന്ന ഡിജെ പാർട്ടിക്ക് പിന്നാലെയാണ് മോഷണം നടന്നതെന്നാണ് പ്രാഥമിക വിവരം. സംഭവവുമായി ബന്ധപ്പെട്ട് പാർട്ടി നടത്താനെത്തിയ പ്രായപൂർത്തിയാവാത്തവർ ഉൾപ്പെടെ 17 പേരെ പൂജപ്പുര പോലീസ് ചോദ്യം ചെയ്തു.
കഴിഞ്ഞ ദിവസം സൈനിക ഉദ്യോഗസ്ഥർക്കായി ക്യാമ്പിൽ സംഘടിപ്പിച്ച ഡിജെ പാർട്ടിക്ക് ശേഷമാണ് ഓഫീസിൽ സൂക്ഷിച്ചിരുന്ന രണ്ട് ആനക്കൊമ്പുകൾ കാണാതായത്. അന്താരാഷ്ട്ര വിപണിയിൽ ഇവയ്ക്ക് രണ്ട് കോടിയിലധികം രൂപ വിലവരുമെന്നാണ് കണക്കാക്കുന്നത്. പാർട്ടിക്ക് എത്തിയ സംഘത്തിന് മോഷണത്തിൽ പങ്കുണ്ടോ എന്ന സംശയത്തെത്തുടർന്നാണ് 17 അംഗ സംഘത്തെ പോലീസ് കസ്റ്റഡിയിലെടുത്ത് ചോദ്യം ചെയ്തത്.
എന്നാൽ, ഇവരുടെ മൊഴികളിൽ നിന്ന് മോഷണവുമായി ബന്ധപ്പെട്ട സൂചനകളൊന്നും ഇതുവരെ ലഭിച്ചിട്ടില്ലെന്ന് പോലീസ് അറിയിച്ചു. സൈനിക ക്യാമ്പിലെ കർശനമായ സുരക്ഷാ പരിശോധനകൾ മറികടന്ന് ആനക്കൊമ്പ് പുറത്തെത്തിക്കുക പ്രയാസകരമാണ്. അതിനാൽ, ക്യാമ്പിലെ സാഹചര്യങ്ങളെക്കുറിച്ച് വ്യക്തമായ ധാരണയുള്ളവർ തന്നെയാകാം മോഷണത്തിന് പിന്നിലെന്ന നിഗമനത്തിലാണ് പോലീസ്. സൈനിക ഉദ്യോഗസ്ഥരുടെ മൊഴികൾ ശേഖരിച്ചുവരികയാണെന്നും വിപുലമായ അന്വേഷണം ആരംഭിച്ചതായും പൂജപ്പുര പോലീസ് വ്യക്തമാക്കി.
