റാം പോത്തിനേനി ഇനി സംവിധായകൻ റാപോ 23 സൈക്കോളജിക്കൽ ആക്ഷൻ ത്രില്ലറുമായി താരം വരുന്നു
പ്രശസ്ത തെലുങ്ക് താരം റാം പോത്തിനേനി സംവിധായകനായി അരങ്ങേറ്റം കുറിക്കുന്നു. കൃഷ്ണ പോത്തിനേനി നിർമ്മിക്കുന്ന റാപോ 23 ഒരു സൈക്കോളജിക്കൽ ആക്ഷൻ ത്രില്ലറാണ്
Sabari
3
റാം പോത്തിനേനി ഇനി സംവിധായകൻ; 'റാപോ 23' സൈക്കോളജിക്കൽ ആക്ഷൻ ത്രില്ലറുമായി താരം വരുന്നു
ഹൈദരാബാദ്: തെലുങ്ക് സിനിമാ ലോകത്തെ പ്രിയതാരം റാം പോത്തിനേനി പുതിയ വേഷപ്പകർച്ചയ്ക്ക് ഒരുങ്ങുന്നു. അഭിനയത്തിന് പുറമെ സംവിധായകനായി അരങ്ങേറ്റം കുറിക്കുന്ന താരത്തിന്റെ 23-ാം ചിത്രം ഔദ്യോഗികമായി പ്രഖ്യാപിച്ചു. 'റാപോ സിനിമാറ്റിക്സ്' (RaPo Cinematics) എന്ന ബാനറിൽ കൃഷ്ണ പോത്തിനേനിയാണ് ഈ ബിഗ് ബജറ്റ് ചിത്രം നിർമ്മിക്കുന്നത്.
തന്റെ മുൻ ചിത്രമായ 'ആന്ധ്ര കിംഗ്' എന്ന ചിത്രത്തിലൂടെ ഗായകനായും ഗാനരചയിതാവായും റാം ശ്രദ്ധ നേടിയിരുന്നു. ഇപ്പോൾ സംവിധായകന്റെ തൊപ്പി കൂടി അണിയുന്നതോടെ സീനിയർ എൻ.ടി.ആർ, കൃഷ്ണ, പവൻ കല്യാൺ തുടങ്ങിയ പ്രതിഭകളുടെ പട്ടികയിലേക്കാണ് റാം പോത്തിനേനിയും നടന്നു കയറുന്നത്.
വീരയായി റാം; ടാഗ്ലൈൻ 'ലോൺ വൂൾഫ്'
താരത്തിന്റെ ജന്മദിനത്തോടനുബന്ധിച്ചാണ് പ്രഖ്യാപനവും സ്പെഷ്യൽ പോസ്റ്ററും പുറത്തിറക്കിയത്. 'വീര' എന്ന കഥാപാത്രത്തെയാണ് താരം അവതരിപ്പിക്കുന്നത്. ഇരുണ്ടതും തീവ്രവുമായ ടോണിലുള്ള പോസ്റ്ററിൽ ലെതർ ജാക്കറ്റ് ധരിച്ചു നിൽക്കുന്ന റാം പോത്തിനേനിയെ കാണാം. ജാക്കറ്റിലെ ചുവന്ന നിറത്തിലുള്ള 'V' എന്ന അക്ഷരവും 'The Story of a Lone Wolf' എന്ന ടാഗ് ലൈനും ഏറെ നിഗൂഢതകൾ ഒളിപ്പിക്കുന്നു.
ഒരു സ്റ്റൈലിഷ് സൈക്കോളജിക്കൽ ആക്ഷൻ ത്രില്ലറായാണ് ചിത്രം ഒരുങ്ങുന്നത്. മുമ്പൊരിക്കലും കണ്ടിട്ടില്ലാത്ത ഗംഭീരമായ മേക്ക് ഓവറിലായിരിക്കും താരം ചിത്രത്തിൽ പ്രത്യക്ഷപ്പെടുക.
റിലീസ് ഈ വർഷം തന്നെ
ചിത്രത്തിന്റെ റെഗുലർ ഷൂട്ടിംഗ് ജൂൺ മാസത്തിൽ ആരംഭിക്കും. ഡിസംബറിൽ ചിത്രം തീയേറ്ററുകളിൽ എത്തിക്കാനാണ് അണിയറപ്രവർത്തകരുടെ തീരുമാനം. ചിത്രത്തിലെ മറ്റ് അഭിനേതാക്കളെയും സാങ്കേതിക പ്രവർത്തകരെയും കുറിച്ചുള്ള വിവരങ്ങൾ ഉടൻ പുറത്തുവിടും.
തിരക്കഥ, സംവിധാനം: റാം പോത്തിനേനി
നിർമ്മാണം: കൃഷ്ണ പോത്തിനേനി
ബാനർ: റാപോ സിനിമാറ്റിക്സ്
