ഭാരതീയത എന്നാൽ വിശ്വകർമ്മാവിന്റെ സൃഷ്ടിയും ശങ്കരന്റെ ജ്ഞാനവുമാണ് ഭേദചിന്തകൾ വെടിയാൻ സ്വാമി കൃഷ്ണാനന്ദ സരസ്വതി
ശ്രീ ശങ്കരാചാര്യരുടെ അദ്വൈത ദർശനവും വിശ്വകർമ്മ തത്വവും ഒന്നാണെന്നും, ജാതി വേർതിരിവുകൾ വെടിഞ്ഞ് സനാതന ധർമ്മത്തിൽ ഒന്നിക്കാൻ ഭാരതീയർ തയ്യാറാകണമെന്നും വിശ്വബ്രഹ്മ ശങ്കരാചാര്യ പീഠാധീശ്വർ സാധു കൃഷ്ണാനന്ദ സരസ്വതി മഹാരാജ്
അനില എം കൃഷ്ണൻ 
ഭാരതീയ ദർശനങ്ങളെയും ജഗദ്ഗുരു ശ്രീ ശങ്കരാചാര്യരുടെ അദ്വൈത തത്വത്തെയും സങ്കുചിതമായ ജാതിചിന്തകൾക്കപ്പുറം വിശ്വമാനവികതയുടെ വെളിച്ചത്തിൽ കാണാൻ ഭാരതീയർ തയ്യാറാകണമെന്ന് വിശ്വബ്രഹ്മ ശങ്കരാചാര്യ പീഠാധീശ്വർ ദണ്ഡിസ്വാമി സാധു കൃഷ്ണാനന്ദ സരസ്വതി മഹാരാജ്. ശങ്കരാചാര്യ ജയന്തിയോടനുബന്ധിച്ച് നൽകിയ സന്ദേശത്തിലാണ് അദ്ദേഹം ഇക്കാര്യം വ്യക്തമാക്കിയത്.
വിഘടിച്ചുനിൽക്കുന്ന മനസ്സിനെ ഒന്നിപ്പിക്കാൻ അദ്വൈതത്തേക്കാൾ വലിയൊരു ആയുധമില്ലെന്നും അദ്ദേഹം കൂട്ടിച്ചേർത്തു. "ബ്രഹ്മം സത്യം ജഗന്മിഥ്യ" എന്ന ശങ്കരദർശനം ജഗത്തിന്റെ സൃഷ്ടിതത്വവുമായി ആഴത്തിൽ ബന്ധപ്പെട്ടിരിക്കുന്നു. വിശ്വകർമ്മ സിദ്ധാന്തം പദാർത്ഥത്തിലൂടെ പരമാത്മാവിനെ കണ്ടെത്താൻ പഠിപ്പിക്കുമ്പോൾ, അദ്വൈതം ആത്മാവിന്റെ മോക്ഷത്തെക്കുറിച്ച് സംസാരിക്കുന്നു. ഇവ രണ്ടും ഒരേ സത്യത്തിന്റെ രണ്ട് വശങ്ങളാണ്.
ഋഗ്വേദത്തിലെ വിശ്വകർമ്മ സൂക്തങ്ങളെ ഉദ്ധരിച്ചുകൊണ്ട്, പ്രപഞ്ച ശില്പിയായ വിശ്വകർമ്മാവും ശങ്കരാചാര്യർ പഠിപ്പിച്ച ബ്രഹ്മവും ഒന്നാണെന്ന് സ്വാമിജി ചൂണ്ടിക്കാട്ടി. ആഭരണത്തിൽ സ്വർണ്ണത്തെ എന്നപോലെ ചരാചരങ്ങളിൽ ഈശ്വരനെ ദർശിക്കാനാണ് ആചാര്യർ പഠിപ്പിച്ചത്. കാശിയിൽ വെച്ച് ചണ്ഡാല രൂപത്തിലെത്തിയ ഭഗവാൻ ശിവനോട് 'മനീഷാ പഞ്ചകത്തിലൂടെ' ജാതിയല്ല ബ്രഹ്മജ്ഞാനമാണ് വലുതെന്ന് പ്രഖ്യാപിച്ച ആചാര്യനെ ഒരു പ്രത്യേക ജാതിയുടെ വക്താവായി കാണുന്നത് അജ്ഞതയാണെന്നും അദ്ദേഹം പറഞ്ഞു.
സനാതന ധർമ്മം ഒരു ചരടാണെങ്കിൽ അതിൽ കോർത്ത മുത്തുകളാണ് വിവിധ സമുദായങ്ങൾ. ആ ചരടാണ് അദ്വൈതം. ജാതിയുടെ പേരിൽ കലഹിക്കുന്നത് ധർമ്മത്തിന്റെ തകർച്ചയ്ക്ക് കാരണമാകും. ജനനം കൊണ്ടല്ല, ഗുണകർമ്മങ്ങൾ കൊണ്ടാണ് ഒരാൾ ബ്രാഹ്മണനാകുന്നത്. ശൂന്യതയിൽ നിന്ന് വിശ്വത്തെ നിർമ്മിച്ച വിശ്വകർമ്മാവും, അജ്ഞത നീക്കി ജ്ഞാനം നൽകിയ ശങ്കരനും ഭിന്നമല്ല. ജാതിയുടെ മതിലുകൾ പൊളിച്ച് സനാതന ധർമ്മത്തിന്റെ കുടക്കീഴിൽ ഒന്നിക്കാൻ നാം തയ്യാറാകണമെന്നും വിശ്വബ്രഹ്മ ശങ്കരാചാര്യ പീഠാധീശ്വർ ആഹ്വാനം ചെയ്തു.
