കാലടി സംസ്കൃത സർവകലാശാലയിൽ ഗവർണറുടെ പരിപാടി പങ്കെടുക്കാത്തവർക്ക് ഭീഷണി മുഴക്കി വകുപ്പ് മേധാവി
കാലടി സംസ്കൃത സർവകലാശാലയിൽ ഗവർണറുടെ സന്ദർശനവുമായി ബന്ധപ്പെട്ട് ഗവേഷക വിദ്യാർഥികൾക്ക് നേരെ വകുപ്പ് മേധാവിയുടെ ഭീഷണി. വിവാദ ശബ്ദരേഖ പുറത്ത്.
Angel Varghese 
ഗവർണറുടെ സന്ദർശനം: കാലടി സംസ്കൃത സർവകലാശാലയിൽ ഭീഷണി മുഴക്കി വകുപ്പ് മേധാവി; വിവാദ ശബ്ദരേഖ പുറത്ത്
കാലടി: ശ്രീ ശങ്കരാചാര്യ സംസ്കൃത സർവകലാശാലയിൽ ഗവർണറുടെ സന്ദർശനവുമായി ബന്ധപ്പെട്ട് വിവാദങ്ങൾ കൊഴുക്കുന്നു. ഗവർണർ പങ്കെടുക്കുന്ന പരിപാടിയിൽ പങ്കെടുക്കാത്ത ഗവേഷക വിദ്യാർഥികൾക്കെതിരെ നടപടിയുണ്ടാകുമെന്ന് വ്യാകരണ വിഭാഗം മേധാവി ഭീഷണിപ്പെടുത്തുന്ന ശബ്ദരേഖ പുറത്തുവന്നു. പരിപാടിയിലെ സഹകരണത്തിനനുസരിച്ചായിരിക്കും ആർ.എ.സി (RAC), ഓപ്പൺ ഡിഫൻസ് എന്നിവയിൽ വകുപ്പിന്റെ സഹായം ലഭിക്കുകയെന്നാണ് ശബ്ദരേഖയിലെ മുന്നറിയിപ്പ്.
ഭീഷണിയുമായി വകുപ്പ് മേധാവി
വ്യാകരണ വിഭാഗം മേധാവി ആർ.ഡി. സുനിൽ കുമാറിന്റേതെന്ന് പറയപ്പെടുന്ന വാട്സ്ആപ്പ് ഓഡിയോ സന്ദേശമാണ് ഇപ്പോൾ പുറത്തുവന്നിരിക്കുന്നത്. "ആരൊക്കെ ആത്മാർഥമായി സഹകരിക്കുന്നുണ്ടെന്ന് കൃത്യമായി രേഖപ്പെടുത്തി വെക്കും. സഹകരിച്ചില്ലെങ്കിൽ ഭാവിയിൽ ഡിപ്പാർട്ട്മെന്റിൽ നിന്നുള്ള ആനുകൂല്യങ്ങളും സഹായങ്ങളും പ്രതീക്ഷിക്കണ്ട" എന്ന് സന്ദേശത്തിൽ പറയുന്നു. ഗവേഷക വിദ്യാർഥികളുടെ നിർണായക ഘട്ടങ്ങളായ ആർ.എ.സി, ഓപ്പൺ ഡിഫൻസ് എന്നിവയെ പരാമർശിച്ചുകൊണ്ടുള്ള ഭീഷണി വിദ്യാർഥികൾക്കിടയിൽ വലിയ പ്രതിഷേധത്തിന് കാരണമായിട്ടുണ്ട്.
വിവാദ സർക്കുലറും പ്രതിഷേധവും
നേരത്തെ, ഗവർണർ എത്തുമ്പോഴും മടങ്ങുമ്പോഴും എഴുന്നേറ്റ് നിൽക്കണമെന്നും പ്രസംഗം കഴിയുമ്പോൾ കൈയടിക്കണമെന്നും നിർദ്ദേശിച്ചുകൊണ്ടുള്ള സർവകലാശാലയുടെ സർക്കുലർ വലിയ വിവാദമായിരുന്നു. പ്രതിഷേധം ശക്തമായതോടെ ഈ സർക്കുലർ പിൻവലിച്ചെങ്കിലും, പിന്നീട് പുറത്തിറക്കിയ പുതിയ മാർഗനിർദ്ദേശങ്ങളിലും നിയന്ത്രണങ്ങൾ തുടർന്നു.
ഗവർണർ രാജേന്ദ്ര വിശ്വനാഥ് ആർലേക്കർ പങ്കെടുത്ത ശ്രീശങ്കരജയന്തി ആഘോഷങ്ങൾക്കിടെ എസ്.എഫ്.ഐ പ്രവർത്തകർ ശക്തമായ പ്രതിഷേധം രേഖപ്പെടുത്തി. ക്യാമ്പസിനു പുറത്ത് പ്ലക്കാർഡുകളുയർത്തിയായിരുന്നു പ്രതിഷേധം. പോലീസ് ബലപ്രയോഗത്തിലൂടെ വിദ്യാർഥികൾ സ്ഥാപിച്ച ബാനറുകൾ നീക്കം ചെയ്തു. കനത്ത സുരക്ഷാ വലയത്തിലാണ് ഉദ്ഘാടന ചടങ്ങുകൾ നടന്നത്.
