തക്കലയെ ഇളക്കിമറിച്ച് ഇളംതലൈവർ വിജയ്ക്ക് ചെക്ക് വെച്ച് ഉദയനിധിയുടെ പടയോട്ടം
തമിഴ്നാട് രാഷ്ട്രീയത്തിൽ വിജയ് ഉയർത്തുന്ന വെല്ലുവിളിയെ നേരിടാൻ ഉദയനിധി സ്റ്റാലിനെ മുൻനിർത്തി ഡിഎംകെയുടെ തന്ത്രപരമായ നീക്കം. തക്കലയിലെ ഉജ്ജ്വല പ്രചാരണ വിശേഷങ്ങൾ.
Angel Varghese 
കന്യാകുമാരി: തമിഴ് മണ്ണിൽ ആവേശത്തിന്റെ അലയൊലികൾ തീർത്ത് ഡിഎംകെ നേതാവും തമിഴ്നാട് ഉപമുഖ്യമന്ത്രിയുമായ ഉദയനിധി സ്റ്റാലിന്റെ പ്രചാരണ പടയോട്ടം. സിനിമാ സ്റ്റൈലിനെ വെല്ലുന്ന ഡ്രോൺ ദൃശ്യങ്ങളുടെയും ആർപ്പുവിളികളുടെയും അകമ്പടിയോടെ തക്കലയിൽ എത്തിയ 'ഇളംതലൈവർ'ക്ക് ഉജ്ജ്വല സ്വീകരണമാണ് ജനങ്ങൾ നൽകിയത്. രാഷ്ട്രീയ പ്രവേശനം പ്രഖ്യാപിച്ച നടൻ വിജയ്ക്ക് മുഖ്യമന്ത്രി എം.കെ. സ്റ്റാലിൻ നൽകിയ കൃത്യമായ 'ചെക്ക്' ആയാണ് ഉദയനിധിയുടെ ഈ തമിഴ്നാട് പര്യടനത്തെ രാഷ്ട്രീയ നിരീക്ഷകർ വിലയിരുത്തുന്നത്.
തമിഴ് വീര്യവുമായി പ്രസംഗം
സൗമ്യമായ ഭാവത്തോടെയാണെങ്കിലും രാഷ്ട്രീയ എതിരാളികളെ കടന്നാക്രമിച്ചുകൊണ്ടായിരുന്നു ഉദയനിധിയുടെ പ്രസംഗം. അണ്ണാഡിഎംകെ നേതാവ് എടപ്പാടി പളനിസാമിയെയും പ്രധാനമന്ത്രി നരേന്ദ്ര മോദിയെയും ഉദയനിധി രൂക്ഷമായി വിമർശിച്ചു. മുൻപ് ശശികലയുടെ കാലിൽ വീണ എടപ്പാടി ഇപ്പോൾ ഡൽഹിയുടെ കാലിൽ വീണിരിക്കുകയാണെന്നും തമിഴ്നാടിന്റെ ആത്മാഭിമാനം പണയപ്പെടുത്തിയെന്നും അദ്ദേഹം പരിഹസിച്ചു.
"തിരഞ്ഞെടുപ്പ് വരുമ്പോൾ മാത്രമാണ് മോദി തമിഴ്നാട്ടിലേക്ക് വരുന്നത്. ഇത്രയും കാലം തമിഴ്നാടിന് എന്ത് നൽകിയെന്ന് നിങ്ങൾ മോദിയോട് ചോദിക്കണം. തമിഴ്നാട് ആരുടെയും അടിമയല്ല," ഉദയനിധി ജനക്കൂട്ടത്തോട് പറഞ്ഞു.
സഖ്യകക്ഷികളെ ചേർത്തുപിടിച്ച് ഡിഎംകെ
കഴിഞ്ഞ 20 വർഷമായി ഡിഎംകെയുടെ കോട്ടയായ പത്മനാഭപുരം മണ്ഡലത്തിൽ ഇത്തവണ സിപിഎം സ്ഥാനാർത്ഥിക്കായി വോട്ട് ചോദിച്ചാണ് ഉദയനിധി എത്തിയത്. സഖ്യകക്ഷികളായ കോൺഗ്രസ് സ്ഥാനാർത്ഥികളെയും പേരെടുത്ത് പറഞ്ഞ് പിന്തുണയ്ക്കണമെന്ന് അദ്ദേഹം അഭ്യർത്ഥിച്ചു. ഉദയനിധിയുടെ ഓരോ വാക്കിനും വൻ ജനപിന്തുണയാണ് തക്കലയിൽ ലഭിച്ചത്.
വിജയ് ലക്ഷ്യമിടുന്ന യുവജന വോട്ടുകൾ ഡിഎംകെ പാളയത്തിൽ തന്നെ ഉറപ്പിച്ചു നിർത്താൻ ഉദയനിധിയുടെ താരമൂല്യം സഹായിക്കുമെന്ന കണക്കുകൂട്ടലിലാണ് പാർട്ടി. 'ഇളയദളപതി' എന്ന വിജയ്യുടെ വിശേഷണത്തെ 'ഇളംതലൈവർ' എന്ന പേര് കൊണ്ട് നേരിടുകയാണ് ഡിഎംകെ അണികൾ. 'നൻട്രി, വണക്കം' പറഞ്ഞ് അടുത്ത മണ്ഡലത്തിലേക്ക് നീങ്ങിയ ഉദയനിധിക്ക് ഇത് അസ്തമയമില്ലാത്ത പ്രചാരണ കാലമാണ്.
