വാർഡ് പിടിച്ചെടുത്തത് യുഡിഎഫ് അനുവദിച്ച റോഡ് ഫണ്ട് എംഎൽഎ പിൻവലിച്ചു
തദ്ദേശ തിരഞ്ഞെടുപ്പിൽ എൽഡിഎഫിൽ നിന്ന് യുഡിഎഫ് പിടിച്ചെടുത്ത വാർഡിലെ റോഡ് നിർമാണത്തിന് അനുവദിച്ച ഫണ്ട് എംഎൽഎ പിൻവലിച്ചത് വിവാദമാകുന്നു.
അനില എം കൃഷ്ണൻ 
വാർഡ് പിടിച്ചെടുത്തത് യുഡിഎഫ്; അനുവദിച്ച റോഡ് ഫണ്ട് എംഎൽഎ പിൻവലിച്ചു: വൈക്കത്ത് രാഷ്ട്രീയ വിവാദം
വൈക്കം: തദ്ദേശ തിരഞ്ഞെടുപ്പിൽ എൽഡിഎഫിൽ നിന്ന് യുഡിഎഫ് പിടിച്ചെടുത്ത വാർഡിലെ റോഡ് നിർമാണത്തിന് അനുവദിച്ച ഫണ്ട് എംഎൽഎ പിൻവലിച്ചത് വിവാദമാകുന്നു. വൈക്കം നഗരസഭയിലെ 23-ാം വാർഡായ താലൂക്ക് ഹോസ്പിറ്റൽ ഭാഗത്തെ വയനവേലി റോഡിനായി സി.കെ.ആശ എംഎൽഎ അനുവദിച്ച 15 ലക്ഷം രൂപയാണ് പിൻവലിച്ചത്. രാഷ്ട്രീയ വിരോധമാണ് ഇതിന് പിന്നിലെന്ന് കോൺഗ്രസ് ആരോപിക്കുമ്പോൾ, എസ്റ്റിമേറ്റ് ലഭിക്കാത്തതിനാലാണ് നടപടിയെന്ന് എംഎൽഎ വിശദീകരിക്കുന്നു.
നാല് വർഷമായി തകർന്നു കിടക്കുന്ന ഈ റോഡ് ഉയർത്തി നിർമിക്കാനായി കഴിഞ്ഞ ജൂലൈ 18-നാണ് എംഎൽഎ ഫണ്ട് ശുപാർശ ചെയ്തത്. എന്നാൽ, കഴിഞ്ഞ ദിവസം ഈ പ്രവൃത്തി റദ്ദാക്കണമെന്ന് ആവശ്യപ്പെട്ട് എംഎൽഎ കലക്ടർക്ക് കത്ത് നൽകുകയായിരുന്നു. നിലവിൽ കോൺഗ്രസിലെ സോണി സണ്ണി പ്രതിനിധീകരിക്കുന്ന വാർഡാണിത്. എൽഡിഎഫിന്റെ സിറ്റിങ് സീറ്റായിരുന്ന ഇവിടെ യുഡിഎഫ് വിജയിച്ചതാണ് ഫണ്ട് പിൻവലിക്കാൻ കാരണമെന്ന് പ്രതിപക്ഷം ആരോപിക്കുന്നു.
എന്നാൽ, ജൂലൈയിൽ ആവശ്യപ്പെട്ട എസ്റ്റിമേറ്റ് ഈ മാസം വരെ ലഭിക്കാത്തതിനാലാണ് ഫണ്ട് ലാപ്സാകാതിരിക്കാൻ പിൻവലിച്ചതെന്നാണ് എംഎൽഎയുടെ മറുപടി. അതേസമയം, എസ്റ്റിമേറ്റ് കൃത്യമായി നൽകിയിട്ടുണ്ടെന്ന് നഗരസഭാ കൗൺസിലർ വ്യക്തമാക്കി. കലക്ടറുടെ നിർദ്ദേശപ്രകാരം നഗരസഭാ സെക്രട്ടറി തുടർനടപടികൾ സ്വീകരിച്ചു വരികയാണ്
