ബസ് സമയക്രമത്തെ ചൊല്ലി തർക്കം ആലുവയിൽ ഓടുന്ന ബസിന് വട്ടംവെച്ച് ജീവനക്കാരെ മർദ്ദിച്ച മൂന്ന് പേർ റിമാൻഡിൽ
ആലുവ ഫോർട്ട് കൊച്ചി റൂട്ടിലോടുന്ന സ്വകാര്യ ബസുകളിലെ ജീവനക്കാർ തമ്മിൽ സമയക്രമത്തെ ചൊല്ലിയുണ്ടായ തർക്കത്തെ തുടർന്ന് മൂന്ന് പേരെ ആലുവ പോലീസ് അറസ്റ്റ് ചെയ്തു.
Angel Varghese 
ബസ് സമയക്രമത്തെ ചൊല്ലി തർക്കം: ആലുവയിൽ സ്വകാര്യ ബസ് ജീവനക്കാർ തമ്മിൽ അടിപിടി, മൂന്ന് പേർ അറസ്റ്റിൽ
ആലുവ: ആലുവ-ഫോർട്ട് കൊച്ചി റൂട്ടിലോടുന്ന സ്വകാര്യ ബസുകളിലെ ജീവനക്കാർ തമ്മിലുണ്ടായ അടിപിടിയെ തുടർന്ന് മൂന്ന് പേരെ ആലുവ പോലീസ് അറസ്റ്റ് ചെയ്തു. 'ആൻസായി' ബസ്സിലെ ജീവനക്കാരായ കീഴ്മാട് എടത്തല കൊട്ടാരക്കൽ വീട്ടിൽ ജിതിൻ (35), തായിക്കാട്ടുകര പുത്തൻപീടികയിൽ വീട്ടിൽ അബ്ദുൽ സദ്ദാം (32), ആലുവ ഹിൽ റോഡിൽ കണ്ടെത്തിൽ പറമ്പിൽ അൻസൺ ജോബ് (38) എന്നിവരെയാണ് പോലീസ് പിടികൂടിയത്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.
ബസുകളുടെ സമയക്രമത്തെ ചൊല്ലിയുണ്ടായ തർക്കമാണ് അക്രമത്തിൽ കലാശിച്ചത്. ആലുവ-തോപ്പുംപടി റൂട്ടിലോടുന്ന 'അസ്ലൻ' എന്ന ബസ്സിന് പ്രതികൾ വട്ടം വെക്കുകയും, തുടർന്ന് ബസ്സിനകത്ത് അതിക്രമിച്ച് കയറി ജീവനക്കാരെ ആക്രമിക്കുകയുമായിരുന്നു. അക്രമത്തെ തുടർന്ന് ബസ്സിലുണ്ടായിരുന്ന യാത്രക്കാരെ ഇവർ നിർബന്ധിതമായി ഇറക്കിവിട്ടു.
സംഭവത്തെ തുടർന്ന് അക്രമം നടത്തിയ ബസ് പോലീസ് കസ്റ്റഡിയിലെടുത്തു. ആലുവ ഇൻസ്പെക്ടർ കെ.ജി ഗോപകുമാർ, എസ്.ഐമാരായ വന്ദന കൃഷ്ണൻ, ജോസി എം., ജോൺസൻ, സി.പി.ഒമാരായ മാഹിൻ ഷാ അബൂബക്കർ, മുഹമ്മദ് അമീർ, ഫയാസ് എന്നിവരടങ്ങിയ പോലീസ് സംഘമാണ് പ്രതികളെ അറസ്റ്റ് ചെയ്തത്.
