അതിജീവനത്തിന്റെയും പ്രത്യാശയുടെയും സന്ദേശവുമായി ലോകമെങ്ങും ഇന്ന് ഉയിർപ്പ് തിരുനാൾ
യേശുക്രിസ്തുവിന്റെ പുനരുത്ഥാനത്തിന്റെ ഓർമ്മ പുതുക്കി ഇന്ന് ലോകമെങ്ങും ഈസ്റ്റർ ആഘോഷിക്കുന്നു. കേരളത്തിലെ ദേവാലയങ്ങളിൽ പ്രത്യേക ഉയിർപ്പ് കുർബാനയും പ്രാർത്ഥനകളും നടന്നു.
Angel Varghese 
ഉയിർപ്പിന്റെ പ്രത്യാശയിൽ ലോകം; വിശ്വാസികൾ ഇന്ന് ഈസ്റ്റർ ആഘോഷിക്കുന്നു
കൊച്ചി: മാനവരാശിയുടെ പാപമോചനത്തിനായി കുരിശിലേറ്റപ്പെട്ട യേശുക്രിസ്തു മരണത്തെ കീഴടക്കി ഉയിർത്തെഴുന്നേറ്റതിന്റെ ഓർമ്മ പുതുക്കി ഇന്ന് ലോകമെമ്പാടും ഈസ്റ്റർ ആഘോഷിക്കുന്നു. അൻപത് ദിവസം നീണ്ടുനിന്ന വലിയ നോമ്പിനും പീഡാനുഭവ സ്മരണകൾക്കും സമാപ്തി കുറിച്ചുകൊണ്ടാണ് വിശ്വാസികൾ ഉയിർപ്പ് തിരുനാളിനെ വരവേൽക്കുന്നത്.
സംസ്ഥാനത്തെ വിവിധ ദേവാലയങ്ങളിൽ ശനിയാഴ്ച അർദ്ധരാത്രി മുതൽ പ്രത്യേക പ്രാർത്ഥനാ ശുശ്രൂഷകളും ഉയിർപ്പ് കുർബാനയും നടന്നു. തിന്മയുടെ മേൽ നന്മ നേടിയ വിജയമായും മരണത്തിന്മേലുള്ള ജീവന്റെ വിജയമായും ഈസ്റ്റർ ആഘോഷിക്കപ്പെടുന്നു. കേരളത്തിലെ പ്രമുഖ ദേവാലയങ്ങളിൽ നടന്ന ശുശ്രൂഷകളിൽ നൂറുകണക്കിന് വിശ്വാസികൾ പങ്കെടുത്തു.
പ്രത്യാശയുടെയും സ്നേഹത്തിന്റെയും സനദേശമാണ് ഈ ഈസ്റ്റർ കാലം പകരുന്നത്. ലോകത്തിന്റെ വിവിധ ഭാഗങ്ങളിൽ യുദ്ധവും ദുരിതങ്ങളും തുടരുന്ന സാഹചര്യത്തിൽ, സമാധാനത്തിനും മാനവിക ഐക്യത്തിനുമായുള്ള പ്രത്യേക പ്രാർത്ഥനകൾ ഇത്തവണത്തെ ചടങ്ങുകളുടെ സവിശേഷതയായിരുന്നു. ദേവാലയങ്ങളിലെ ശുശ്രൂഷകൾക്ക് ശേഷം കുടുംബാംഗങ്ങളോടൊപ്പം സ്നേഹവിരുന്നുകൾ ഒരുക്കിയും വിശ്വാസികൾ ഈ ദിനം ആഘോഷമാക്കുന്നു.
