എറണാകുളത്തിന് വികസന കുതിപ്പ് ബജറ്റിൽ വൻ പദ്ധതികൾ പ്രഖ്യാപിച്ച് സർക്കാർ
സംസ്ഥാന ബജറ്റിൽ എറണാകുളം ജില്ലയുടെ വികസനത്തിനായി വൻ തുക വകയിരുത്തി. ജെ.സി. ഡാനിയൽ ഫിലിം സിറ്റി, ഗ്ലോബൽ ഫർണിച്ചർ ഹബ്ബ്, ഗോൾഡ് ഹബ്ബ് എന്നിവയുൾപ്പെടെയുള്ള പ്രധാന പദ്ധതികൾക്ക് ഭരണകൂടം പച്ചക്കൊടി കാട്ടി.
അനില എം കൃഷ്ണൻ 
എറണാകുളത്തിന് വികസന കുതിപ്പ്: ബജറ്റിൽ വൻ പദ്ധതികൾ പ്രഖ്യാപിച്ച് സർക്കാർ
കൊച്ചി: സംസ്ഥാന ബജറ്റിൽ എറണാകുളം ജില്ലയുടെ അടിസ്ഥാന സൗകര്യ വികസനത്തിനും വ്യാവസായിക വളർച്ചയ്ക്കും മുൻഗണന നൽകിക്കൊണ്ട് വൻ പദ്ധതികൾ. ജില്ലയെ ആഗോള നിലവാരത്തിലുള്ള വ്യവസായ-വാണിജ്യ ഹബ്ബാക്കി മാറ്റുന്നതിനായി വിവിധ പദ്ധതികൾക്കായി വൻ തുകയാണ് വകയിരുത്തിയിരിക്കുന്നത്.
ചലച്ചിത്ര മേഖലയ്ക്ക് കരുത്തേകാൻ ഫിലിം സിറ്റി
മലയാള ചലച്ചിത്ര വ്യവസായത്തിന് അന്താരാഷ്ട്ര തലത്തിൽ അംഗീകാരം നേടിക്കൊടുക്കുന്നതിനും, ദേശീയ-അന്തർദേശീയ ചലച്ചിത്ര പ്രവർത്തകരെ ആകർഷിക്കുന്നതിനുമായി കൊച്ചിയിൽ 'ജെ.സി. ഡാനിയൽ ഇന്റർനാഷണൽ ഫിലിം സിറ്റി' സ്ഥാപിക്കും. ഇതിനായി 100 കോടി രൂപയാണ് ബജറ്റിൽ വകയിരുത്തിയിരിക്കുന്നത്.
വ്യവസായ-വാണിജ്യ കോറിഡോറുകൾ
ജില്ലയുടെ വ്യാവസായിക വളർച്ച ലക്ഷ്യമിട്ട് രണ്ട് പ്രധാന കോറിഡോറുകളാണ് ബജറ്റിൽ പ്രഖ്യാപിച്ചിരിക്കുന്നത്:
ഗ്ലോബൽ ഫർണിച്ചർ ഹബ്ബ്: കൊച്ചി-ആലുവ-പെരുമ്പാവൂർ ബെൽറ്റിനെ ഒരു പ്രമുഖ ഫർണിച്ചർ-ഹോംവെയർ നിർമ്മാണ ഹബ്ബായി ഉയർത്തും. പെരുമ്പാവൂരിന്റെ പ്ലൈവുഡ്-ഫർണിച്ചർ നിർമ്മാണ ശേഷി ഇതിലൂടെ കൂടുതൽ വിപുലീകരിക്കും. അടിസ്ഥാന സൗകര്യ വികസനത്തിനും പരിശീലനത്തിനുമായി 10 കോടി രൂപ അനുവദിച്ചു.
ഗ്ലോബൽ ഗോൾഡ് ഹബ്ബ്: കൊച്ചി-തൃശ്ശൂർ മേഖലയെ കേന്ദ്രീകരിച്ച് സ്വർണ്ണാഭരണ നിർമ്മാണ കോറിഡോർ സ്ഥാപിക്കും. ഗോൾഡ് എക്സ്ചേഞ്ച്, ജ്വല്ലറി മാനുഫാക്ചറിംഗ് പാർക്ക് എന്നിവ ഇതിന്റെ ഭാഗമാകും. ഇതിനായി 10 കോടി രൂപ നീക്കിവെച്ചു.
തുറമുഖ-ഗതാഗത മേഖലയിലെ വികസനം
കൊച്ചി, വിഴിഞ്ഞം തുറമുഖങ്ങളെ കേന്ദ്രീകരിച്ച് വ്യാവസായിക നിർമ്മാണ മേഖലകൾ (Industrial Manufacturing Zones), സ്റ്റഫിംഗ് സെന്ററുകൾ, ഡ്രൈ പോർട്ട് എന്നിവ സ്ഥാപിക്കുന്നതിന് സർക്കാർ നടപടികൾ സ്വീകരിക്കും. കൊച്ചി അന്താരാഷ്ട്ര വിമാനത്താവളത്തിന് സമീപമായി അന്താരാഷ്ട്ര നിലവാരത്തിലുള്ള 'ഗ്ലോബൽ കൺവെൻഷൻ സെന്റർ' ആരംഭിക്കുമെന്നും പ്രഖ്യാപനമുണ്ട്. കൂടാതെ, കൊച്ചിയിലെ ഗതാഗത സംവിധാനങ്ങൾ ഏകോപിപ്പിക്കുന്നതിനായി യൂണിഫൈഡ് മെട്രോപൊളിറ്റൻ ട്രാൻസ്പോർട്ട് അതോറിറ്റിയുടെ (UMTA) പ്രവർത്തനം കൂടുതൽ കാര്യക്ഷമമാക്കും.
ഏവിയേഷൻ ഹബ്ബ്
സംസ്ഥാനത്തെ നാല് അന്താരാഷ്ട്ര വിമാനത്താവളങ്ങളെ കേന്ദ്രീകരിച്ച് വിപുലമായ ഏവിയേഷൻ-ലോജിസ്റ്റിക്സ് ഹബ്ബ് ഒരുക്കും. ഈ പദ്ധതിക്കായി 200 കോടി രൂപയാണ് സർക്കാർ അനുവദിച്ചിരിക്കുന്നത്.
കിൻഫ്രയും ഇൻകെലും കൂടുതൽ ശക്തിപ്പെടുത്തും
ഭൂമി ഏറ്റെടുക്കൽ ഉൾപ്പെടെയുള്ള നിർണ്ണായക പ്രക്രിയകൾ സമയബന്ധിതവും സുതാര്യവുമാക്കുന്നതിനായി സംസ്ഥാന ഏജൻസികളായ കിൻഫ്ര (KINFRA), ഇൻകെൽ (INKEL) എന്നിവയെ സർക്കാർ കൂടുതൽ ശക്തിപ്പെടുത്തും. പദ്ധതികളുടെ വേഗത്തിലുള്ള പൂർത്തീകരണത്തിന് ഈ നടപടി സഹായകമാകുമെന്ന് സർക്കാർ വിലയിരുത്തുന്നു.
