മധുരയുടെ പെൺകരുത്ത് ക്രിക്കറ്റിൽ

പ്രതിസന്ധികളെ സിക്‌സറടിച്ച് കമാലിനി; 1.6 കോടിയുടെ തിളക്കത്തിൽ മധുരയുടെ പെൺകരുത്ത്

ചെന്നൈ: കഷ്ടപ്പാടുകളുടെയും കണ്ണുനീരിന്റെയും പിച്ചിൽ നിന്ന് പോരാടി നേടിയ വിജയത്തിന് 1.6 കോടി രൂപയുടെ തിളക്കം. മലേഷ്യയിൽ നടന്ന അണ്ടർ-19 ഏഷ്യാ കപ്പിൽ പാകിസ്താനെതിരെ 29 പന്തിൽ 44 റൺസുമായി മിന്നിയ തമിഴ്‌നാട് താരം കമാലിനിയെ വനിതാ പ്രീമിയർ ലീഗിൽ (WPL) വൻ തുകയ്ക്ക് മുംബൈ ഇന്ത്യൻസ് സ്വന്തമാക്കി. 16 വയസ്സ് മാത്രം പ്രായമുള്ള ഈ ഓൾറൗണ്ടറുടെ വളർച്ച ഇന്ത്യൻ ക്രിക്കറ്റിലെ തന്നെ വിസ്മയമായി മാറുകയാണ്.

​അച്ഛന്റെ സ്വപ്നം, മകളുടെ പോരാട്ടം

മധുരയിൽ സ്കേറ്റിങ്ങിൽ മികവ് തെളിയിച്ച കമാലിനി 11-ാം വയസ്സിലാണ് ക്രിക്കറ്റിലേക്ക് തിരിയുന്നത്. മക്കളുടെ ക്രിക്കറ്റ് കരിയറിനായി ബിസിനസ് ഉപേക്ഷിച്ച അച്ഛൻ ഗുണലൻ കുടുംബത്തോടൊപ്പം ചെന്നൈയിലേക്ക് താമസം മാറി. കമാലിനിയുടെ ബാറ്റിംഗ് ശൈലി മെച്ചപ്പെടുത്താൻ വലങ്കയ്യൻ ബാറ്ററായിരുന്ന മകളെ ഇടങ്കയ്യൻ ബാറ്ററാക്കി മാറ്റിയത് അച്ഛന്റെ ദീർഘവീക്ഷണമായിരുന്നു.

​ഐസിയുവിന് മുന്നിലെ കണ്ണുനീർ

കമാലിനിയുടെ കരിയർ വളർച്ചയ്ക്കിടെയാണ് കുടുംബത്തെ തളർത്തിക്കൊണ്ട് അച്ഛൻ ഗുണലന് ഹൃദയാഘാതം സംഭവിക്കുന്നത്. അച്ഛൻ ഐസിയുവിൽ മരണത്തോട് മല്ലിടുമ്പോഴും അച്ഛന്റെ ആഗ്രഹപ്രകാരം കണ്ണുനീരോടെയാണ് കമാലിനി ബിസിസിഐ സീനിയർ ടൂർണമെന്റിനായി വണ്ടി കയറിയത്. ആ ടൂർണമെന്റിൽ ഒരു സെഞ്ചുറി ഉൾപ്പെടെ നേടി കമാലിനി തന്റെ കരുത്ത് തെളിയിച്ചു.

ഏഷ്യാ കപ്പിലെ മികച്ച പ്രകടനത്തിന് പിന്നാലെ നടന്ന ലേലത്തിൽ 50 ലക്ഷം രൂപയെങ്കിലും ലഭിക്കുമെന്ന് കരുതിയ ശരണ്യയെയും കുടുംബത്തെയും അമ്പരപ്പിച്ചുകൊണ്ടാണ് മുംബൈ ഇന്ത്യൻസ് 1.6 കോടിക്ക് കമാലിനിയെ വിളിച്ചെടുത്തത്. ഓപ്പണറായും മികച്ച സ്പിന്നറായും തിളങ്ങുന്ന ഈ 16-കാരി ഇനി നീല ജഴ്‌സിയിൽ ഇന്ത്യയുടെ അഭിമാനമാകും