ഓണസമ്മാനമായി ഹെലികോപ്റ്റർ സവാരി ആകാശക്കാഴ്ചകളുടെ വിരുന്നൊരുക്കി മൂവാറ്റുപുഴനഗരസഭ

ആകാശക്കാഴ്ചകളുടെ വിരുന്നൊരുക്കി മൂവാറ്റുപുഴ നഗരസഭ മാത്യു കുഴൽനാടൻ എം.എൽ.എ, ഉദ്ഘാടനം ചെയ്തു

മൂവാറ്റുപുഴ: വിനോദസഞ്ചാര മേഖലയ്ക്ക് പുതിയ സാധ്യതകൾ തുറന്ന് മൂവാറ്റുപുഴയിൽ ഹെലികോപ്റ്റർ ടൂറിസത്തിന് തുടക്കമായി.

​നഗരസഭയുടെ നേതൃത്വത്തിൽ സംഘടിപ്പിച്ചിരുന്ന ത്രിവേണി ഓണം പരിപാടിയുടെ ഭാഗമായാണ് പൊതുജനങ്ങൾക്കായി ഹെലികോപ്റ്റർ യാത്രയ്ക്ക് അവസരമൊരുക്കിയത്.

​ഹെലികോപ്റ്റർ ടൂറിസം പദ്ധതിയുടെ ഫ്ലാഗ് ഓഫ് മാത്യു കുഴൽനാടൻ എം.എൽ.എ നിർവ്വഹിച്ചു. നഗരസഭാ ചെയർപേഴ്സൺ ജോയിസ് മേരി ആന്റണി അധ്യക്ഷയായി. ഡീൻ കുര്യാക്കോസ് എം.പി മുഖ്യാതിഥിയായി.

​ഓണാഘോഷത്തോടൊപ്പം മൂവാറ്റുപുഴയുടെ വിനോദസഞ്ചാര സാധ്യതകൾ കൂടി പരിചയപ്പെടുത്തുന്നതിനുള്ള ശ്രമം കൂടിയാണ് ഹെലികോപ്റ്റർ ടൂറിസത്തിലൂടെ നഗരസഭ ലക്ഷ്യമിടുന്നതെന്ന് മുനിസിപ്പൽ ചെയർപേഴ്സൺ ജോയിസ് മേരി ആന്റണി പറഞ്ഞു.

പദ്ധതിയുടെ ഉദ്ഘാടനത്തിന് ശേഷം നടന്ന കന്നി യാത്രയിൽ ഡീൻ കുര്യാക്കോസ് എം.പി, മാത്യു കുഴൽനാടൻ എം.എൽ.എ, നഗരസഭാ ചെയർപേഴ്സൺ ജോയിസ് മേരി ആന്റണി എന്നിവർ പങ്കാളികളായി. ജോൺസൺ മാർക്കോസ്, ആൻഡ്രിയ ജോൺസൺ, ജൈറ മൈഡൻ എന്നിവരായിരുന്നു കന്നി പറക്കലിൽ പങ്കെടുത്ത മറ്റ് യാത്രക്കാർ.

ത്രിവേണി ഓണാഘോഷത്തോട് അനുബന്ധിച്ച് മൂവാറ്റുപുഴയുടെ  നഗരത്തിന് മുകളിലൂടെയുള്ള ഹെലികോപ്റ്റർ സവാരി പ്രദേശവാസികൾക്കും സഞ്ചാരികൾക്കും വേറിട്ടൊരു അനുഭവമായി മാറി.