കാണികളെ കൈയിലെടുത്ത് കേരള പോലീസിന്റെ മിടുക്കന്മാർ വിസ്മയമായി ഡോഗ് സ്ക്വാഡ് ഷോ
തിരുവനന്തപുരം കനകക്കുന്നിൽ നടക്കുന്ന ഓണാഘോഷങ്ങൾക്ക് ആവേശം പകർന്ന് കേരള പോലീസ് ഡോഗ് സ്ക്വാഡിന്റെ അഭ്യാസപ്രകടനം. ലാബ്രഡോർ, ജർമ്മൻ ഷെപ്പേർഡ്, ബെൽജിയൻ മലിനോയിസ്, ബീഗിൾ ഉൾപ്പെടെയുള്ള നായ്ക്കളുടെ പ്രകടനം കാണികളെ ആകർഷിക്കുന്നു
അനില എം കൃഷ്ണൻ 
ഓണാഘോഷത്തിന് മാറ്റുകൂട്ടി പോലീസ് ഡോഗ് സ്ക്വാഡ്; കനകക്കുന്നിൽ വിസ്മയമായി ഡെമോൺസ്ട്രേഷൻ
തിരുവനന്തപുരം: തലസ്ഥാനത്തെ ഓണാഘോഷങ്ങൾക്ക് ആവേശം പകർന്ന് കനകക്കുന്ന് കൊട്ടാരവളപ്പിൽ കേരള പോലീസ് ഡോഗ് സ്ക്വാഡിന്റെ അഭ്യാസപ്രകടനങ്ങൾ. കാണികളെ ഒന്നടങ്കം ആകർഷിക്കുന്ന വൈവിധ്യമാർന്ന പ്രകടനങ്ങളാണ് പോലീസ് സേനയിലെ മിടുക്കന്മാരായ കേഡറ്റുകൾ കാഴ്ചവെക്കുന്നത്. തിരുവനന്തപുരം സിറ്റി, വെഞ്ഞാറമൂട്, ഇടുക്കി എന്നിവിടങ്ങളിൽ നിന്നുള്ള എട്ടോളം നായ്ക്കളാണ് ഇത്തവണ കനകക്കുന്നിലെ ആഘോഷങ്ങളുടെ ഭാഗമായി അണിനിരന്നിരിക്കുന്നത്.
കുറ്റകൃത്യങ്ങൾ തെളിയിക്കുന്നതിലും സുരക്ഷാ പരിശോധനകളിലും പോലീസ് സേനയ്ക്ക് കരുത്താകുന്ന പ്രമുഖ ബ്രീഡുകളാണ് ഷോയിൽ പങ്കെടുക്കുന്നത്. കൊലപാതകവും കവർച്ചയും ഉൾപ്പെടെയുള്ള കേസുകളിൽ പ്രതികളെ കണ്ടെത്താൻ സഹായിക്കുന്ന 'ട്രാക്കർ' നായ്ക്കൾ, സ്ഫോടകവസ്തുക്കൾ കണ്ടെത്തുന്ന 'സ്നിഫർ' നായ്ക്കൾ എന്നിവർ പ്രകടനത്തിൽ പ്രധാന ആകർഷണമാണ്.
വിമാനത്താവളങ്ങൾ, ബസുകൾ, ഇടുങ്ങിയ സ്ഥലങ്ങൾ എന്നിവിടങ്ങളിൽ എളുപ്പത്തിൽ പരിശോധന നടത്താൻ കഴിയുന്ന ചെറിയ ബ്രീഡായ 'ബീഗിൾ' ഇനത്തിൽപ്പെട്ട നായ്ക്കളുടെ പ്രകടനം കാണികളുടെ പ്രത്യേക ശ്രദ്ധ നേടി. കൂടാതെ മയക്കുമരുന്ന്, മദ്യം എന്നിവ കണ്ടെത്താനും ദുരന്തമുഖങ്ങളിൽ മൃതദേഹങ്ങൾ കണ്ടെത്താനുമുള്ള 'കഡാവർ' പരിശീലനം ലഭിച്ച നായ്ക്കളും പ്രദർശനത്തിലുണ്ട്. ലാബ്രഡോർ, ജർമ്മൻ ഷെപ്പേർഡ്, ബെൽജിയൻ മലിനോയിസ്, ബീഗിൾ എന്നീ ഇനങ്ങളാണ് അഭ്യാസപ്രകടനങ്ങളിൽ പങ്കെടുക്കുന്നത്.
മൂന്ന് മാസം പ്രായമുള്ളപ്പോൾ സ്റ്റേറ്റ് ഡോഗ് ട്രെയിനിങ് സ്കൂളിൽ എത്തിക്കുന്ന ഇവയ്ക്ക് ഒൻപത് മാസത്തെ കഠിനമായ പരിശീലനത്തിന് ശേഷമാണ് ഔദ്യോഗികമായി സേനയിലേക്ക് പ്രവേശനം നൽകുന്നത്. ദിവസവും രണ്ടുനേരം ഗ്രൂമിംഗും ഭാരത്തിന് അനുസൃതമായി കൃത്യമായ അളവിൽ 'എൻ ആൻഡ് ഡി' പാക്കറ്റ് ഭക്ഷണവുമാണ് നൽകുന്നത്. സിറ്റി പോലീസ് കമ്മീഷണറുടെയും മറ്റ് ഉന്നത ഉദ്യോഗസ്ഥരുടെയും മേൽനോട്ടത്തിലാണ് കനകക്കുന്നിൽ ഡോഗ് സ്ക്വാഡിന്റെ പ്രകടനം നടക്കുന്നത്.
