പനിയാത്ത് കോളനിയിലെ വെള്ളക്കെട്ടിന് ശാശ്വത പരിഹാരം ബ്ലോക്ക് പഞ്ചായത്ത് പ്രസിഡന്റും അംഗങ്ങളും പ്രദേശം സന്ദർശിച്ചു
തൈക്കാട്ടുശ്ശേരി പനിയാത്ത് കോളനിയിലെ വർഷങ്ങളായുള്ള വെള്ളക്കെട്ട് ദുരിതത്തിന് അടിയന്തര പരിഹാരം കാണുമെന്ന് ബ്ലോക്ക് പഞ്ചായത്ത് പ്രസിഡന്റ് അഡ്വ. വി.ആർ. രജിത. പ്രദേശം സന്ദർശിച്ച് നടപടികൾ ഉറപ്പുനൽകി.
P R Sumeran 
കോളനിയിലെ വെള്ളക്കെട്ട് പ്രതിസന്ധി: ബ്ലോക്ക് പഞ്ചായത്ത് പ്രസിഡന്റും അംഗങ്ങളും പ്രദേശം സന്ദർശിച്ചു
പൂച്ചാക്കൽ: തൈക്കാട്ടുശ്ശേരി ഗ്രാമപഞ്ചായത്തിലെ പത്താം വാർഡിൽ ഉൾപ്പെടുന്ന പനിയാത്ത് കോളനിയിലെ വർഷങ്ങളായുള്ള വെള്ളക്കെട്ട് ദുരിതത്തിന് ഒടുവിൽ ശാശ്വത പരിഹാരമാകുന്നു. പ്രദേശവാസികൾ നേരിടുന്ന രൂക്ഷമായ വെള്ളക്കെട്ട് പ്രതിസന്ധിക്ക് അടിയന്തരമായി പരിഹാരം കാണാൻ ആവശ്യമായ നടപടികൾ സ്വീകരിക്കുമെന്ന് തൈക്കാട്ടുശ്ശേരി ബ്ലോക്ക് പഞ്ചായത്ത് പ്രസിഡന്റ് അഡ്വ. വി.ആർ. രജിത അറിയിച്ചു.
വെള്ളക്കെട്ടിന് കാരണമാകുന്ന പ്രശ്നങ്ങൾ പഠിച്ച് റിപ്പോർട്ട് സമർപ്പിക്കാൻ ബ്ലോക്ക് പഞ്ചായത്ത് എഞ്ചിനീയറിംഗ് വിഭാഗം ഉടൻ തന്നെ പ്രദേശം സന്ദർശിക്കുമെന്നും അവർ വ്യക്തമാക്കി. ഗ്രാമപഞ്ചായത്തിന്റെ സഹകരണത്തോടെ കോളനിയിലെ കാനകൾ നവീകരിക്കുക, വെള്ളക്കെട്ട് പൂർണ്ണമായും ഒഴിവാക്കുക, പ്രദേശത്തെ ശുചീകരണ പ്രവർത്തനങ്ങൾ ഊർജ്ജിതമാക്കുക, റോഡിന്റെ തകർച്ച പരിഹരിക്കുക എന്നിവയാണ് ലക്ഷ്യമിടുന്നത്. ഈ പദ്ധതിക്കായി ആവശ്യമായ ഫണ്ട് അടിയന്തരമായി വകയിരുത്തി നിർമ്മാണ പ്രവർത്തനങ്ങൾ ആരംഭിക്കുമെന്നും പ്രസിഡന്റ് കൂട്ടിച്ചേർത്തു.
കോളനിയിലെ രൂക്ഷമായ വെള്ളക്കെട്ട് പരിഹരിക്കണമെന്ന് ആവശ്യപ്പെട്ട് പ്രദേശവാസികൾ ബ്ലോക്ക് പഞ്ചായത്തിന് നൽകിയ പരാതിയെ തുടർന്നായിരുന്നു പ്രസിഡന്റിന്റെയും സംഘത്തിന്റെയും സന്ദർശനം. ബ്ലോക്ക് ഡിവിഷൻ അംഗങ്ങളായ ഉഷ മുകുന്ദൻ, വിമൽ രവീന്ദ്രൻ എന്നിവരും പ്രസിഡന്റിനൊപ്പം കോളനി സന്ദർശിക്കുകയും ജനങ്ങളുമായി സംസാരിച്ച് സ്ഥിതിഗതികൾ വിലയിരുത്തുകയും ചെയ്തു. അധികൃതരുടെ ഈ അടിയന്തര ഇടപെടൽ വർഷങ്ങളായി ദുരിതത്തിലായിരുന്ന കോളനിവാസികൾക്ക് വലിയ ആശ്വാസമായിരിക്കുകയാണ്
