​നെടുങ്കണ്ടത്ത് നാടിനെ നടുക്കിയ ക്രൂരത അമ്മയെയും മകനെയും കൊന്നു കുഴിച്ചുമൂടി ഇളയ മകൻ ഒളിവിൽ

​നെടുങ്കണ്ടത്ത് വീടിന് പിന്നിൽ അമ്മയെയും മകനെയും കുഴിച്ചുമൂടിയ നിലയിൽ കണ്ടെത്തി; ഇളയ മകൻ ഒളിവിൽ

​തൊടുപുഴ : പച്ചടി പൊന്നുട്ടയിൽ നാടിനെ നടുക്കിയ കൊലപാതക വിവരം പുറത്ത്. കാണാതായ വീട്ടമ്മയെയും മകനെയും വീട്ടുപറമ്പിൽ കുഴിച്ചുമൂടിയ നിലയിൽ കണ്ടെത്തി. പൊന്നുട്ട സ്വദേശി മേരി (70), മകൻ റെജി (48) എന്നിവരുടേതാണ് മൃതദേഹങ്ങളെന്ന് സംശയിക്കുന്നു. സംഭവത്തിന് ശേഷം ഒളിവിൽ പോയ ഇളയ മകൻ സജിക്കായി പോലീസ് തിരച്ചിൽ ഊർജ്ജിതമാക്കി.

​കുറച്ചു ദിവസങ്ങളായി മേരിയെയും റെജിയെയും കാണാനില്ലായിരുന്നു. ഇവരോടൊപ്പം താമസിച്ചിരുന്ന സജിയോട് നാട്ടുകാർ വിവരം തിരക്കിയപ്പോൾ പരസ്പരവിരുദ്ധമായ മറുപടികളാണ് ലഭിച്ചത്. ഇതിൽ സംശയം തോന്നിയ നാട്ടുകാർ വിവരം മേരിയുടെ മകൾ സിനിയെ അറിയിച്ചു. തുടർന്ന് സിനി നൽകിയ പരാതിയിൽ നെടുങ്കണ്ടം പോലീസ് നടത്തിയ പരിശോധനയിലാണ് മൃതദേഹങ്ങൾ കണ്ടെത്തിയത്.കൊലപാതകമെന്ന് പ്രാഥമിക നിഗമനംവീട്ടുപറമ്പിൽ മണ്ണ് ഇളകിക്കിടന്ന ഭാഗത്ത് നടത്തിയ പരിശോധനയിൽ വെറും ഒരടി താഴ്ചയിലാണ് മൃതദേഹങ്ങൾ കണ്ടെത്തിയത്. സഹോദരങ്ങൾ തമ്മിൽ നിരന്തരം വഴക്കിടാറുണ്ടായിരുന്നെന്നും ഇവർക്ക് നാട്ടുകാരുമായി വലിയസമ്പർക്കമില്ലായിരുന്നുവെന്നും പോലീസ് പറയുന്നു. മൃതദേഹങ്ങൾ ശാസ്ത്രീയ പരിശോധനകൾക്കായി മാറ്റി. ഇന്നലെ മുതൽ സജിയുടെ ഫോൺ സ്വിച്ച് ഓഫ് ചെയ്ത നിലയിലാണ്. ഒളിവിൽ  പോയ സജിക്കായി പോലീസ് തിരച്ചിൽ തുടരുന്നു.