നമ്മൾ ലഹരിമുക്ത സമൂഹത്തിനായുള്ള യോദ്ധാക്കൾ റോട്ടറി ക്ലബ്ബിന്റെ ലഹരിവിരുദ്ധ ക്യാമ്പയിൻ

​കോതമംഗലം റോട്ടറി ക്ലബ്ബിന്റെ നേതൃത്വത്തിൽ തൂഫാൻ വാരിയർ ബാഡ്ജ് വിതരണവും ലഹരിവിരുദ്ധ സെമിനാറും

കോതമംഗലം: സ്വാതന്ത്ര്യ ദിനാഘോഷങ്ങളുടെ ഭാഗമായി കോതമംഗലം റോട്ടറി ക്ലബ്ബിന്റെ ആഭിമുഖ്യത്തിൽ റോട്ടറി കരാട്ടെ ക്ലബ്ബിന്റെ സഹകരണത്തോടെ തൂഫാൻ വാരിയർ ബാഡ്ജ് വിതരണവും ലഹരിവിരുദ്ധ ബോധവൽക്കരണ സെമിനാറും കോതമംഗലം റോട്ടറി ഭവനിൽ വെച്ച് സംഘടിപ്പിച്ചു.

​വിദ്യാർത്ഥികൾക്കുള്ള ബാഡ്ജ് വിതരണവും സെമിനാറിന്റെ ഉദ്ഘാടനവും കോതമംഗലം എക്സൈസ് സർക്കിൾ ഇൻസ്പെക്ടർ സാദിഖ് എ. നിർവഹിച്ചു. ലഹരിമുക്ത സമൂഹത്തിനായി പോരാടുന്ന യോദ്ധാക്കളാണ് നമ്മളെന്ന തിരിച്ചറിവോടെ തിന്മകളെ ചെറുത്തുതോൽപ്പിക്കാൻ ഓരോരുത്തരും മുന്നോട്ടുവരണമെന്ന് അദ്ദേഹം ഉദ്ബോധിപ്പിച്ചു.

​റോട്ടറി ക്ലബ് പ്രസിഡന്റ് ജെബിൻ എം. പുതുക്കയിൽ ചടങ്ങിൽ അധ്യക്ഷത വഹിച്ചു. ലഹരിക്കെതിരെയുള്ള കോതമംഗലം റോട്ടറി ക്ലബ്ബിന്റെ സാമൂഹിക പ്രതിബദ്ധതയെ അഭിനന്ദിച്ചുകൊണ്ട് മുൻ ആഭ്യന്തര മന്ത്രി രമേശ് ചെന്നിത്തല അയച്ച ആശംസാസന്ദേശം ഡോ. എബിൻ റ്റി. എം. വേദിയിൽ വായിച്ചു.

​തുടർന്ന് പ്രൊഫ. ഡോ. ഷാജൻ കുര്യാക്കോസ് ചൊല്ലിക്കൊടുത്ത ലഹരിമുക്ത പ്രതിജ്ഞ സദസ്സ് ഏറ്റുചൊല്ലി. പ്രോഗ്രാം കോർഡിനേറ്റർമാരായ സോണി തോമസ്, ജോയി പോൾ, പ്രോജക്ട് ചെയർമാൻ അഡ്വ. കെ. ഐ. ജേക്കബ് എന്നിവർ സംസാരിച്ചു. ബേസിൽ കൊറ്റാഞ്ചേരിയിൽ സ്വാഗതവും ഷാലു ജെബിൻ നന്ദിയും പറഞ്ഞു.