തിരുവനന്തപുരത്തിന് ബജറ്റ് തിളക്കം ലൈറ്റ് മെട്രോയും രണ്ടാമത്തെ മെഡിക്കൽ കോളേജും വരുന്നു വിഴിഞ്ഞത്തിന് കോടികൾ
തിരുവനന്തപുരം ജില്ലയുടെ സമഗ്ര വികസനത്തിന് ഊന്നൽ നൽകി പുതിയ ബജറ്റ് പ്രഖ്യാപനങ്ങൾ. ലൈറ്റ് മെട്രോ, രണ്ടാമത്തെ മെഡിക്കൽ കോളേജ്, വിഴിഞ്ഞം ഹാർബർ വികസനം എന്നിവയ്ക്കായി കോടികൾ അനുവദിച്ചു
Angel Varghese 
തലസ്ഥാനത്തിന് ബജറ്റ് തിളക്കം: ലൈറ്റ് മെട്രോയും രണ്ടാമത്തെ മെഡിക്കൽ കോളേജും വരുന്നു; വിഴിഞ്ഞത്തിന് വൻ വികസനം
തിരുവനന്തപുരം: തലസ്ഥാന നഗരിയുടെ മുഖച്ഛായ മാറ്റുന്ന സമഗ്ര വികസന പദ്ധതികളുമായി പുതിയ ബജറ്റ് പ്രഖ്യാപനം. ഗതാഗതം, ആരോഗ്യം, അടിസ്ഥാന സൗകര്യം, തീരദേശ വികസനം, തീർത്ഥാടനം തുടങ്ങി എല്ലാ മേഖലകൾക്കും തുല്യ പ്രാധാന്യം നൽകുന്നതാണ് പുതിയ പദ്ധതികൾ. നഗരത്തിലെ യാത്രാക്ലേശത്തിന് പരിഹാരമായി 'തിരുവനന്തപുരം ലൈറ്റ് മെട്രോ' പദ്ധതി യാഥാർത്ഥ്യമാക്കുമെന്നതാണ് പ്രധാന പ്രഖ്യാപനം.
യാത്രാക്ലേശത്തിന് പരിഹാരമായി ലൈറ്റ് മെട്രോ
തലസ്ഥാനത്തെ ഗതാഗത സംവിധാനങ്ങളെ ഒന്നാകെ മാറ്റിയെഴുതുന്ന ലൈറ്റ് മെട്രോ പദ്ധതിയുടെ വിശദമായ പ്രോജക്ട് റിപ്പോർട്ട് (DPR) തയ്യാറാക്കിവരികയാണ്. പദ്ധതിയുടെ പ്രാരംഭ പ്രവർത്തനങ്ങൾക്കായി ബജറ്റിൽ 20 കോടി രൂപ വകയിരുത്തി. കൂടാതെ, നഗരത്തിലെ വിവിധ ഗതാഗത സംവിധാനങ്ങൾ ഏകോപിപ്പിക്കുന്നതിനായി 'യൂണിഫൈഡ് മെട്രോപോളിറ്റൻ ട്രാൻസ്പോർട്ട് അതോറിറ്റി' ജില്ലയിൽ സ്ഥാപിക്കും.
രണ്ടാമതൊരു മെഡിക്കൽ കോളേജ് കൂടി
ജില്ലയിലെ പൊതുജനാരോഗ്യ രംഗം കൂടുതൽ ശക്തമാക്കുന്നതിന്റെ ഭാഗമായി തിരുവനന്തപുരത്ത് രണ്ടാമതൊരു മെഡിക്കൽ കോളേജ് കൂടി പ്രവർത്തനക്ഷമമാക്കും. ഇതോടെ സാധാരണക്കാർക്ക് കൂടുതൽ മികച്ച ചികിത്സാ സൗകര്യങ്ങൾ ലഭ്യമാകും.
വിഴിഞ്ഞം മാറും; കപ്പൽ നിർമ്മാണ കേന്ദ്രവും ഭൂഗർഭ റെയിൽവേയും
വിഴിഞ്ഞം അന്താരാഷ്ട്ര തുറമുഖ വികസനവുമായി ബന്ധപ്പെട്ട് ഭൂഗർഭ റെയിൽവേ, വിഴിഞ്ഞം - നാവായിക്കുളം ഔട്ടർ റിംഗ് റോഡ് എന്നിവയ്ക്കായുള്ള സ്ഥലമേറ്റെടുപ്പും നിർമ്മാണവും വേഗത്തിലാക്കും. ഗ്രീൻ ബങ്കറിംഗ് (പരിസ്ഥിതി സൗഹൃദ ഇന്ധനം നൽകുന്ന) സേവനം നൽകുന്ന ഇന്ത്യയിലെ ആദ്യ തുറമുഖമായി വിഴിഞ്ഞത്തെ മാറ്റും. മദർ ഷിപ്പുകളുടെ നിർമ്മാണവും അറ്റകുറ്റപ്പണികളും ലക്ഷ്യമിട്ട് ഇവിടെ പുതിയ കപ്പൽ നിർമ്മാണ കേന്ദ്രവും വരും. ബാലരാമപുരം - നാവായിക്കുളം റിംഗ് റോഡ് പദ്ധതിക്കായി 100 കോടി രൂപ അനുവദിച്ചിട്ടുണ്ട്.
ഇക്കണോമിക് കോറിഡോറും നോളജ് ഹബ്ബും
തിരുവനന്തപുരം, കൊല്ലം, ആലപ്പുഴ ജില്ലകളെ ബന്ധിപ്പിച്ച് 'സതേൺ കേരള ഇക്കണോമിക് കോറിഡോർ' രൂപീകരിക്കും. ഇതിന്റെ ഭാഗമായി തിരുവനന്തപുരത്തെ പ്രധാന 'നോളജ് ആൻഡ് സ്പേസ് ടെക്നോളജി ഹബ്ബ്' ആയി വികസിപ്പിക്കും. റയർ എർത്ത് കോറിഡോറിന് 100 കോടിയും സാമ്പത്തിക ഇടനാഴിക്ക് 50 കോടിയും അനുവദിച്ചു. തിരുവനന്തപുരം ഗവൺമെന്റ് എഞ്ചിനീയറിംഗ് കോളേജിന് കോൺസ്റ്റിറ്റിയൂവന്റ് കോളേജ് ഓഫ് ദി യൂണിവേഴ്സിറ്റി പദവി നൽകാനും ബജറ്റിൽ തീരുമാനമായി.
തീരദേശ വികസനവും മുതലപ്പൊഴി നവീകരണവും
മത്സ്യത്തൊഴിലാളികളുടെ വലിയ ആവശ്യമായിരുന്ന മുതലപ്പൊഴി ഹാർബറിന്റെ അശാസ്ത്രീയ നിർമ്മാണത്തിലെ അപാകതകൾ പരിഹരിക്കും. പൂന്തുറയിൽ പുതിയ ഫിഷിങ് ഹാർബറും പൂന്തുറ-ഇടയാർ പാലവും നിർമ്മിക്കും. വിനോദസഞ്ചാര കേന്ദ്രമായ കോവളത്ത് സ്ത്രീകളെ ഉൾപ്പെടുത്തി പരീക്ഷണാടിസ്ഥാനത്തിൽ 'ഗ്രീൻ മാർഷൽ' പദ്ധതി ആരംഭിക്കും.
തീർത്ഥാടന മേഖലയ്ക്കും പരിഗണന
ശിവഗിരി തീർത്ഥാടന പ്ലാറ്റിനം ജൂബിലി സ്മാരക കൺവെൻഷൻ സെന്ററിനായി 5 കോടി രൂപ വകയിരുത്തി. ചരിത്രപ്രസിദ്ധമായ തിരുവല്ലം പരശുരാമസ്വാമി ക്ഷേത്രം തിരുപ്പതി മോഡലിൽ വികസിപ്പിച്ച് ദേശീയ തീർത്ഥാടന കേന്ദ്രമാക്കും. മുൻ മുഖ്യമന്ത്രി ആർ. ശങ്കറിന് പട്ടത്ത് സ്മാരക മന്ദിരം നിർമ്മിക്കുന്നതിനായി ഒരു കോടി രൂപയും ബജറ്റിൽ അനുവദിച്ചിട്ടുണ്ട്. നെയ്യാർ ജലസേചന പദ്ധതി നവീകരണവും നെട്ടുകാൽത്തേരിയിൽ പുതിയ സംസ്ഥാന തീറ്റപ്പുൽ ഫാമും മാതൃകാ ക്ഷീര യൂണിറ്റും ബജറ്റിലെ മറ്റ് പ്രധാന ആകർഷണങ്ങളാണ്
