അളവിൽ കൂടുതൽ മദ്യം സൂക്ഷിച്ച കേസ് ആന്റോ അഗസ്റ്റിന് ഉപാധികളോടെ ജാമ്യം അനുവദിച്ച് ഹൈക്കോടതി

അനുവദനീയമായ അളവിൽ കൂടുതൽ മദ്യം സൂക്ഷിച്ച കേസ്: ആന്റോ അഗസ്റ്റിന് ഉപാധികളോടെ ജാമ്യം അനുവദിച്ച് ഹൈക്കോടതി

​കൊച്ചി: അനുവദനീയമായ അളവിൽ കൂടുതൽ മദ്യം കൈവശം വച്ചെന്ന അബ്കാരി കേസിൽ റിപ്പോർട്ടർ ബ്രോഡ്‌കാസ്റ്റിങ് കമ്പനി മാനേജിങ് ഡയറക്ടർ (എംഡി) ആന്റോ അഗസ്റ്റിന് ഹൈക്കോടതി ഉപാധികളോടെ ജാമ്യം അനുവദിച്ചു. സുൽത്താൻ ബത്തേരി ഫസ്റ്റ് ക്ലാസ് മജിസ്‌ട്രേട്ട് കോടതി മുൻപ് ജാമ്യാപേക്ഷ തള്ളിയതിനെ തുടർന്നാണ് ആന്റോ അഗസ്റ്റിൻ ഹൈക്കോടതിയെ സമീപിച്ചത്. കേസിൽ ജസ്റ്റിസ് കൗസർ എടപ്പഗത്തിന്റെ ബെഞ്ചാണ് ഉത്തരവ് പുറപ്പെടുവിച്ചത്.

​നേരത്തെ പ്രതിക്ക് ഇടക്കാല ജാമ്യം അനുവദിക്കാൻ കോടതി വിസമ്മതിച്ചിരുന്നു. തുടർന്ന് ഇന്ന് കേസ് വീണ്ടും പരിഗണിച്ചപ്പോൾ പ്രതിഭാഗത്തിന്റെയും പ്രോസിക്യൂഷന്റെയും വിശദമായ വാദങ്ങൾ കേട്ട ശേഷമാണ് ജസ്റ്റിസ് കൗസർ എടപ്പഗത്തിന്റെ ബെഞ്ച് ഉത്തരവിട്ടത്. ഇന്ത്യൻ നിർമിത വിദേശമദ്യവുമായി ബന്ധപ്പെട്ട കേസുകളിൽ സാധാരണ ജാമ്യം നൽകാറുണ്ടെന്നതും, ആന്റോ അഗസ്റ്റിന് എതിരെ സമാനമായ മുൻ കേസുകളില്ലെന്നതും കണക്കിലെടുത്താണ് നടപടിയെന്നാണ് സൂചന. ഉത്തരവിന്റെ പൂർണരൂപം പുറത്തുവരുന്നതോടെ കൂടുതൽ വിശദാംശങ്ങൾ ലഭ്യമാകും.

​കോടതിയിലെ വാദപ്രതിവാദങ്ങൾ

​മദ്യം കണ്ടെത്തിയ കെട്ടിടം 2022-ൽ ബാങ്ക് ജപ്തി നടപടികൾ വഴി മറ്റൊരാൾക്ക് വിറ്റതാണെന്നും, കഴിഞ്ഞ നാല് വർഷമായി ഈ വീടുമായി ആന്റോയ്ക്ക് യാതൊരുവിധ കൈവശാവകാശമോ ബന്ധമോ ഇല്ലെന്നുമാണ് പ്രതിഭാഗം കോടതിയിൽ പ്രധാനമായും വാദിച്ചത്.

​എന്നാൽ, 2026 മാർച്ച് മാസത്തിലും ഈ കെട്ടിടത്തിന്റെ നികുതി അടച്ചിരിക്കുന്നത് ആന്റോ അഗസ്റ്റിന്റെ പേരിലാണെന്ന് പ്രോസിക്യൂഷൻ ചൂണ്ടിക്കാട്ടി. ഇത്രയും വലിയ അളവിലുള്ള വിദേശമദ്യത്തിന്റെ ഉറവിടം കണ്ടെത്താനും നികുതി വെട്ടിപ്പ് നടന്നിട്ടുണ്ടോ എന്ന് പരിശോധിക്കാനും വിശദമായ അന്വേഷണം ആവശ്യമാണെന്ന് വ്യക്തമാക്കിയ പ്രോസിക്യൂഷൻ ജാമ്യാപേക്ഷയെ ശക്തമായി എതിർത്തു.

​പരിശോധനയും കേസെടുക്കലും

​അർജന്റീന ഫുട്ബോൾ ടീമിന്റെയും ലയണൽ മെസ്സിയുടെയും കേരള സന്ദർശനവുമായി ബന്ധപ്പെട്ട് ഉയർന്ന സാമ്പത്തിക ക്രമക്കേട് ആരോപണങ്ങളിൽ പ്രത്യേക അന്വേഷണ സംഘം (SIT) അന്വേഷണം നടത്തുന്നതിനിടെയാണ് ഈ അബ്കാരി കേസിന് വഴിവച്ച സംഭവങ്ങൾ ഉണ്ടാകുന്നത്. ആന്റോ അഗസ്റ്റിന്റെ വയനാട് വാഴവറ്റയിലുള്ള തറവാട്ട് വീട്ടിൽ പൊലീസ് സംഘം നടത്തിയ പരിശോധനയ്ക്കിടെയാണ് വൻതോതിൽ മദ്യശേഖരം കണ്ടെത്തിയത്.

​തുടർന്ന് പൊലീസ് വിവരം എക്‌സൈസ് വകുപ്പിന് കൈമാറുകയും, എക്‌സൈസ് സംഘം സ്ഥലത്തെത്തി കേസെടുത്ത് ആന്റോ അഗസ്റ്റിന്റെ അറസ്റ്റ് രേഖപ്പെടുത്തുകയുമായിരുന്നു.

​പരിശോധനയിൽ വീട്ടിൽനിന്ന് 43 ലീറ്ററിലധികം വിദേശ നിർമിത വിദേശമദ്യവും, 4.8 ലീറ്റർ വിദേശനിർമിത വൈനും, അഞ്ചര ലീറ്റർ കേരള നിർമിത വൈനും, 860 മില്ലി ലീറ്റർ മിലിട്ടറി മദ്യവും ഉൾപ്പെടെ ഏകദേശം 67 ലീറ്ററോളം മദ്യശേഖരമാണ് എക്സൈസ് പിടിച്ചെടുത്തത്. അബ്കാരി ആക്ടിലെ 55(i), 55(a), 58 എന്നീ വകുപ്പുകൾ പ്രകാരമാണ് നിലവിൽ കേസ് രജിസ്റ്റർ ചെയ്തിരിക്കുന്നത്.