3,000 രൂപയുടെ കഞ്ചാവ് വിൽക്കുന്നത് 25,000 രൂപയ്ക്ക് 12 കിലോ കഞ്ചാവുമായി ബംഗാൾ സ്വദേശി പിടിയിൽ
ഓപ്പറേഷൻ തൂഫാന്റെ ഭാഗമായി മൂവാറ്റുപുഴ പോലീസും ഡാൻസാഫ് ടീമും ചേർന്ന് നടത്തിയ പരിശോധനയിൽ 12 കിലോ കഞ്ചാവുമായി പശ്ചിമ ബംഗാൾ സ്വദേശി പിടിയിലായി. ഒഡീഷയിൽ നിന്ന് തീവണ്ടി മാർഗം എത്തിച്ച കഞ്ചാവാണ് തൃക്കളത്തൂരിൽ വെച്ച് പിടികൂടിയത്.
Angel Varghese 
3,000 രൂപയുടെ കഞ്ചാവ് വിൽക്കുന്നത് 25,000 രൂപയ്ക്ക് 12 കിലോ കഞ്ചാവുമായി മൂവാറ്റുപുഴയിൽ പിടിയിൽ; 'ഓപ്പറേഷൻ തൂഫാൻ' പരിശോധനയിൽ വലയിലായത് ബംഗാൾ സ്വദേശി
മൂവാറ്റുപുഴ: 'ഓപ്പറേഷൻ തൂഫാൻ' പരിശോധനയുടെ ഭാഗമായി 12 കിലോ കഞ്ചാവുമായി ഇതര സംസ്ഥാന തൊഴിലാളി പോലീസ് പിടിയിലായി. വെസ്റ്റ് ബംഗാൾ മൂർഷിദാബാദ് സ്വദേശി മസാദുൽ ഇസ്ലാം (39) നെയാണ് റൂറൽ ജില്ലാ ഡാൻസാഫ് (DANSAF) ടീമും മൂവാറ്റുപുഴ പോലീസും ചേർന്ന് അറസ്റ്റ് ചെയ്തത്.
ഒഡീഷയിൽ നിന്ന് വാങ്ങിയ കഞ്ചാവ് തീവണ്ടി മാർഗ്ഗമാണ് ഇയാൾ ആലുവയിൽ എത്തിച്ചത്. തുടർന്ന് അവിടെ നിന്ന് ഓട്ടോറിക്ഷയിൽ മൂവാറ്റുപുഴ ഭാഗത്തേക്ക് യാത്ര ചെയ്യുന്നതിനിടെ തൃക്കളത്തൂർ സംഗമം പടിയിൽ വെച്ചാണ് പോലീസ് ഇയാളെ വളഞ്ഞത്. പരിശോധനയിൽ ഇയാളുടെ ബാഗിൽ പ്രത്യേകം പാക്ക് ചെയ്ത നിലയിലാണ് 12 കിലോ കഞ്ചാവ് കണ്ടെത്തിയത്.
കിലോയ്ക്ക് 3,000 രൂപ നിരക്കിൽ ഒഡീഷയിൽ നിന്ന് വാങ്ങുന്ന കഞ്ചാവ് കേരളത്തിലെ ഇതര സംസ്ഥാന തൊഴിലാളികൾക്കിടയിൽ കിലോയ്ക്ക് 25,000 രൂപയ്ക്കാണ് ഇയാൾ വിൽപ്പന നടത്തിയിരുന്നത്. മുൻപും സമാന രീതിയിൽ കഞ്ചാവുമായി ഇയാളെ പോലീസ് അറസ്റ്റ് ചെയ്തിട്ടുണ്ട്.
ഡാൻസാഫ് ടീമിന് പുറമെ നർക്കോട്ടിക് സെൽ ഡി.വൈ.എസ്.പി സി. ബിനു കുമാർ, മൂവാറ്റുപുഴ ഡി.വൈ.എസ്.പി കെ.ആർ. മനോജ്, മൂവാറ്റുപുഴ ഇൻസ്പെക്ടർ എം.എസ്. ഫൈസൽ, സ്റ്റേഷൻ ഹൗസ് ഓഫീസർ സുബിൻ ബിജു, എസ്.ഐ മാരായ എസ്. ശ്രീനാഥ്, ദിലീപ് കുമാർ, ബിനു വർഗീസ്, സീനിയർ സി.പി.ഓ മാരായ കെ.വി. ഗിരീഷ് കുമാർ, കെ.ടി. നിജാസ്, ബിനിൽ എൽദോസ് എന്നിവരടങ്ങുന്ന അന്വേഷണ സംഘമാണ് പ്രതിയെ പിടികൂടിയത്.
