ഐടി ഉദ്യോഗസ്ഥ കാർത്തികയുടെ മരണം ഭർത്താവിനെതിരെ ദുരൂഹത ആരോപിച്ച് കുടുംബം മുഖ്യമന്ത്രിക്ക് പരാതി നൽകി
ബെംഗളൂരുവിൽ മരിച്ച അഞ്ചൽ സ്വദേശിനി കാർത്തികയുടെ മരണത്തിൽ ദുരൂഹത ആരോപിച്ച് മാതാപിതാക്കൾ. ഭർത്താവിനെതിരെ മുഖ്യമന്ത്രിക്ക് പരാതി നൽകി.
അനില എം കൃഷ്ണൻ 
ഐടി ഉദ്യോഗസ്ഥ കാർത്തികയുടെ മരണം: ഭർത്താവിനെതിരെ ദുരൂഹത ആരോപിച്ച് മാതാപിതാക്കൾ മുഖ്യമന്ത്രിയെ സമീപിച്ചു
ബെംഗളൂരുവിൽ ഐടി ഉദ്യോഗസ്ഥയായിരുന്ന അഞ്ചൽ പനയഞ്ചേരി സ്വദേശിനി കാർത്തിക വി. നായരുടെ (35) മരണത്തിൽ ദുരൂഹത ആരോപിച്ച് കുടുംബം രംഗത്തെത്തി. കാർത്തികയുടെ മരണം കൊലപാതകമാകാൻ സാധ്യതയുണ്ടെന്ന് ചൂണ്ടിക്കാട്ടി പിതാവ് എസ്. വേണുഗോപാലൻ നായരും മാതാവ് കെ.ജി. ഇന്ദിരകുമാരിയും മുഖ്യമന്ത്രി പിണറായി വിജയനും സംസ്ഥാന പൊലീസ് മേധാവിക്കും പരാതി നൽകി. കഴിഞ്ഞ ഫെബ്രുവരി 20-നാണ് ബെംഗളൂരുവിലെ ഫ്ലാറ്റിൽ കാർത്തികയെ മരിച്ച നിലയിൽ കണ്ടെത്തിയത്. എംടെക് ബിരുദധാരിയായ കാർത്തിക തിരുവനന്തപുരം പട്ടം സ്വദേശിയായ ഭർത്താവിനും അഞ്ചു വയസ്സുകാരിയായ മകൾക്കുമൊപ്പം താമസിച്ചു വരികയായിരുന്നു.
അഞ്ചടി ഏഴിഞ്ച് ഉയരമുള്ള കാർത്തിക, ആറടി മാത്രം ഉയരമുള്ള ശുചിമുറിയിലെ വെന്റിലേറ്ററിൽ തൂങ്ങിമരിച്ചു എന്നത് വിശ്വസിക്കാൻ കഴിയില്ലെന്നാണ് മാതാപിതാക്കൾ പ്രധാനമായും ഉന്നയിക്കുന്ന ആരോപണം. മൃതദേഹം കണ്ടെത്തിയ സമയത്ത് ശുചിമുറിയുടെ വാതിൽ തുറന്നു കിടന്ന നിലയിലായിരുന്നുവെന്നും ഇത് അസ്വാഭാവികമാണെന്നും അവർ പറയുന്നു. മരണത്തിന് തൊട്ടുമുൻപ് കാർത്തിക മാതാപിതാക്കളുമായി ഫോണിൽ സംസാരിച്ചിരുന്നു. ജോലി കഴിഞ്ഞ് ഫ്ലാറ്റിലേക്ക് മടങ്ങുന്ന സിസിടിവി ദൃശ്യങ്ങൾ ലഭ്യമാണ്. മരണസമയത്ത് കാർത്തികയുടെ ഭർത്താവ് ഫ്ലാറ്റിന് സമീപമുണ്ടായിരുന്നുവെന്നും ലിഫ്റ്റ് ഉപയോഗിക്കാതെ സ്റ്റെപ്പ് വഴി ഇറങ്ങിപ്പോകുന്ന ദൃശ്യങ്ങൾ ഉണ്ടെന്നും മാതാപിതാക്കൾ ആരോപിക്കുന്നു. "അച്ഛാ വാ, അമ്മയെ ആശുപത്രിയിൽ കൊണ്ടുപോ" എന്ന് കുഞ്ഞ് വിളിച്ചു പറയുന്നത് കേട്ടതായും അവർ വെളിപ്പെടുത്തി.
എട്ടു വർഷം മുൻപായിരുന്നു കാർത്തികയുടെ വിവാഹം. ഭർത്താവ് നിഖിൽ ജോലിയുടെ ഭാഗമായി മെക്സിക്കോയിൽ പോയി വന്ന ശേഷം കുടുംബപ്രശ്നങ്ങൾ രൂക്ഷമായതായാണ് മാതാപിതാക്കൾ പറയുന്നത്. പ്രശ്നങ്ങൾ പരിഹരിക്കണമെന്ന് ആവശ്യപ്പെട്ട് കാർത്തിക അയച്ച വാട്സാപ്പ് സന്ദേശങ്ങൾ തെളിവായി കുടുംബം സൂക്ഷിച്ചിട്ടുണ്ട്. ബെംഗളൂരു പൊലീസിന്റെ ഭാഗത്തുനിന്നും കാര്യമായ അന്വേഷണം നടക്കുന്നില്ലെന്നും, സംഭവം നടന്ന് മാസങ്ങൾ പിന്നിട്ടിട്ടും തുടർനടപടികൾ സ്വീകരിക്കാത്തത് സംശയാസ്പദമാണെന്നും കാർത്തികയുടെ കുടുംബം ആരോപിക്കുന്നു. നീതിക്കായി കൂടുതൽ നിയമനടപടികളുമായി മുന്നോട്ടുപോകാനാണ് ഇവരുടെ തീരുമാനം.
