സൗജന്യ യാത്രാസൗകര്യം മുതലാക്കി പ്രിയദർശിനി ബസിലെ തിക്കിലും തിരക്കിലും മാല മോഷണം
കെഎസ്ആർടിസി പ്രിയദർശിനി ബസുകളിലെ തിരക്കിനിടയിൽ യാത്രക്കാരുടെ സ്വർണ്ണമാല കവരുന്ന തമിഴ്നാട് സ്വദേശിനി മഞ്ജുള ചവറയിൽ പിടിയിലായി. യാത്രക്കാരും നാട്ടുകാരും ചേർന്നാണ് ഇവരെ പിടികൂടി പൊലീസിലേൽപ്പിച്ചത്.
Rajeev 
കെഎസ്ആർടിസി ബസുകളിൽ മാല മോഷണം പതിവാക്കിയ തമിഴ്നാട് സ്വദേശിനി പിടിയിൽ; ജാഗ്രത പാലിക്കാൻ മുന്നറിയിപ്പുമായി പോലീസ്
ചവറ: കെഎസ്ആർടിസി ബസുകളിലെ തിരക്കിന്റെ മറവിൽ സ്വർണ്ണമാല മോഷണം പതിവാക്കിയ തമിഴ്നാട് സ്വദേശിനിയായ യുവതിയെ യാത്രക്കാരും നാട്ടുകാരും ചേർന്ന് പിടികൂടി പോലീസിന് കൈമാറി. തിരുനെൽവേലി മുക്കടൽ ആറ്റാൻകര സ്വദേശി മഞ്ജുള (35) ആണ് പിടിയിലായത്.
പത്തനംതിട്ട - കൊല്ലം റൂട്ടിൽ സർവീസ് നടത്തുന്ന വേണാട് പ്രിയദർശിനി ബസിൽ വെച്ചായിരുന്നു സംഭവം. അടൂർ പറക്കോട് അർഷഹൗസിൽ സുധീനയുടെ മൂന്നരപ്പവന്റെ മാല കവരാൻ ശ്രമിക്കുന്നതിനിടെയാണ് മഞ്ജുള പിടിയിലാകുന്നത്.
പന്മന മുഖംമൂടി ജങ്ഷനിലെ ബസ് സ്റ്റോപ്പിൽ ബസിറങ്ങാൻ ശ്രമിക്കവേ സുധീനയുടെ കഴുത്തിലെ മാല മഞ്ജുള പൊട്ടിക്കുകയായിരുന്നു. എന്നാൽ സമയോചിതമായി സുധീന മാലയിൽ പിടിമുറുക്കിയതോടെ പൊട്ടിയ മാല കൈയിൽത്തന്നെ വീണു. മോഷണശ്രമം മനസ്സിലാക്കിയ ബസിലുണ്ടായിരുന്നവർ ബഹളം വെച്ചതോടെ ഓടിരക്ഷപ്പെടാൻ ശ്രമിച്ച മഞ്ജുളയെ യാത്രക്കാരും നാട്ടുകാരും ചേർന്ന് ഓടിച്ചിട്ട് പിടികൂടുകയായിരുന്നു.
കൂടുതൽ മോഷണങ്ങൾ പുറത്ത്
തുടർന്ന് ചവറ പോലീസ് സ്ഥലത്തെത്തി മഞ്ജുളയെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് മറ്റ് രണ്ട് യാത്രക്കാരുടെ മാലകൾ കൂടി ഇവർ കവർന്നതായി തെളിഞ്ഞത്. കഴിഞ്ഞ മാസം ശാസ്താംകോട്ട ആഞ്ഞിലിമൂട് സ്വദേശി റോസമ്മയുടെ നാലേകാൽ പവന്റെ മാലയും, ചവറ പുതുക്കാട് സ്വദേശി ലില്ലിക്കുട്ടിയുടെ ഒരു പവന്റെ മാലയും കവർന്നത് താനാണെന്ന് ഇവർ സമ്മതിച്ചു.
കഴിഞ്ഞ മാസം 29-ന് താലൂക്ക് ആശുപത്രിയിലെത്തിയ ലില്ലിക്കുട്ടി നീണ്ടകര ജങ്ഷനിൽ ബസിറങ്ങുമ്പോൾ, സഹായിക്കാനെന്ന വ്യാജേന ഒപ്പം കൂടി മാല കവരുകയായിരുന്നു.
മുന്നറിയിപ്പുമായി പോലീസ്
ഇവർ മുൻപും സമാനമായ ഒട്ടേറെ കേസുകളിൽ പ്രതിയാണെന്ന് പോലീസ് അറിയിച്ചു. സൗജന്യ യാത്രാസൗകര്യം മുതലാക്കി കെഎസ്ആർടിസി ബസുകളിൽ കയറി പണം, സ്വർണ്ണം എന്നിവ കവരുന്ന സംഘങ്ങൾ സജീവമാണെന്നും, തിരക്കേറിയ ബസുകളിൽ യാത്ര ചെയ്യുന്നവർ ആഭരണങ്ങളും വിലപിടിപ്പുള്ള വസ്തുക്കളും ശ്രദ്ധിക്കണമെന്നും ചവറ പോലീസ് മുന്നറിയിപ്പ് നൽകി.
